LE PAALALOʼOBOʼ TAAK U YOJÉELTIKOʼOB
¿Kʼaas wa u coquetear máak?
¿Bix u coquetear máak?
U coquetear máakeʼ letiʼe u beetik wa u yaʼalik wa baʼax utiaʼal u yeʼesik tiʼ wa máax uts tu yichoʼ. Pero ¿maʼalob wa ka beetaʼak? Según baʼax oʼolal ku beetik máak. Anneʼ ku yaʼalik: «Maʼ xaaneʼ yaantech u edadil utiaʼal u tsʼoʼokol a beel yéetel yaan máax uts ta wich, pero wa maʼ tu beetik mix baʼal utiaʼal u yeʼesiktecheʼ, ¿bix ken a wojéeltil wa uts tu yichech?».
Teʼ xookaʼ yaan k-tʼaan tiʼ máax suuk u coquetear pero minaʼan u tuukulil tiʼ u tsʼoʼokol u beel.
Deannaeʼ ku yaʼalik: «Yaan horaeʼ yaan máaxeʼ ku coquetear yéetel wa máax tumen jach tu jaajil u kʼáat u bisuba tu yéetel. Pero yaneʼ chéen uts tu tʼaan u beetkoʼob u ilusionar máak».
¿Baʼaxten yaan máaxoʼob ku coquetearoʼob?
Yanoʼobeʼ ku beetkoʼob utiaʼal u yuʼubikubaʼob maʼalobil, chéen utiaʼal u yeʼeskoʼob minaʼan uláakʼ máax jeʼex letiʼobeʼ. Haileyeʼ ku yaʼalik: «Kéen a wil ka lúubul utsil tiʼ uláakʼ paalaloʼob ikil a coqueteareʼ jeʼel u maas taaktal a beetkeʼ».
Wa ka coquetear yéetel wa máax kex maʼ uts ta wicheʼ u kʼáat u yaʼaleʼ maʼ ta chʼaʼik en cuenta bix u yuʼubikuba u maasil. Tsʼoʼoleʼ ka weʼesik maʼ maʼalob a tuukuliʼ. Le Bibliaoʼ ku yaʼalikeʼ «le j-maʼ naʼatiloʼ ku taasik kiʼimak óolal tiʼ le máax maʼ maʼalob bix u tuukuloʼ» (Proverbios 15:21).
Haileyeʼ ku yaʼalik: «Maʼ xaaneʼ kéen káajak u coquetear máakeʼ maʼ tu jaajil u yóol ku beetkiʼ, pero tu tsʼookeʼ jeʼel u yoksikuba tiʼ yaʼab problemaseʼ».
¿Tiʼ baʼax problemas jeʼel u yoksikuba máax ku coqueteareʼ?
Ku yúuchul tʼaan kʼaas tu yoʼolal
Jeremyeʼ ku yaʼalik: «Le máax ku coquetearoʼ ku yeʼesik maʼ u yojel baʼax u kʼáatiʼ. Le kéen coquetearnak juntúul x-chʼúupal tin wéeteleʼ kin wuʼuyik chéen táan u báaxal tin wéetel».
Le Bibliaoʼ ku yaʼalik: «Le máax yaan u yaabilajeʼ [...] maʼ tu kaxtik chéen u yutsil» (1 Corintios 13: 4, 5).
Tukult lelaʼ: ¿Baʼax jeʼel in beetik utiaʼal maʼ u tuklaʼal táan in coqueteareʼ?
Ku beetik u yaatal u yóol yaanal máax
Jaquelineʼ ku yaʼalik: «Wa kin wilik juntúul xiʼipal suuk u coqueteareʼ ku xuʼulul in biskinba tu yéetel tumen kin tuklikeʼ chéen uts tu tʼaan u tuʼutusik le x-chʼúupalaloʼoboʼ. Le máax suuk u coquetearoʼ maʼ tu beetik tumen tu jaajil uts tu yichech, letiʼeʼ chéen u yutsil ku kaxtik».
Le Bibliaoʼ ku yaʼalik: «Cada juntúul máakeʼ maʼ u seguer u kaxtik chéen u yutsil, baʼaxeʼ u yutsil u yéet máakil» (1 Corintios 10:24).
Tukult lelaʼ: ¿Yaan wa máax káaj u coquetear ta wéetel pero tu tsʼookeʼ ta wileʼ chéen táan u báaxal? Wa tsʼoʼok u yúuchultech leloʼ, ¿bix ta wuʼuyilaba? ¿Baʼax jeʼel u yáantkech utiaʼal maʼ a beetik tiʼ wa máax beyoʼ?
Yaan u maas talamtal a kaxtik máax yéetel kun tsʼoʼokol a beel
Oliviaeʼ ku yaʼalik: «Teneʼ jach junpuliʼ maʼ ken in bisinba yéetel juntúul máax suuk u coquetear, menos u tsʼoʼokol in beel tu yéetel. ¿Bix jeʼel in confiar tiʼ juntúul máak beyoʼ?».
Juntéeneʼ le rey Davidoʼ tu tsʼíibtaj teʼ Bibliaoʼ de ke maʼ uts tu tʼaan u biskuba yéetel le «máaxoʼob ku taʼakikoʼob jach bixoʼoboʼ» (Salmo 26:4).
Tukult lelaʼ: Wa suuk a coqueteareʼ, ¿bix le máax ken u beet a cuentaoʼ? ¿A kʼáat wa tsʼoʼokol yéetel juntúul máax beyoʼ?