Wa maʼ ta kanáantik baʼax ka jaantikeʼ jeʼel a kʼojaʼantaleʼ. Le paalaloʼob maʼ suuk u kanáantkubaʼoboʼ bey ken u beetiloʼob tak kéen nojochchajkoʼoboʼ. Le oʼolal desde beoraaʼ kʼaʼabéet a kanáantik baʼax ka jaantik.

•  Kanáant baʼax ka jaantik

•  Jaant baʼaloʼob ka u beettech uts

•  Baʼax ku yaʼalik uláakʼ paalaloʼob

 Le Bibliaoʼ ku yaʼalikeʼ unaj k-tsʼáaik u pʼiis tuláakal baʼax k-beetik (1 Timoteo 3:11). Le oʼolal maʼalob ka a beet le baʼaxoʼob ku yaʼalik le xookaʼ.

•   Baʼaloʼob unaj a jaantik. Yaan cinco baʼaloʼob jach kʼaʼabéet tiʼ u wíinklil máak, ichileʼ tiaʼan le proteínaoboʼ, le frutaʼoboʼ, le verduraʼoboʼ, le baʼaxoʼob yaan leche ichiloʼ yéetel le cerealoʼoboʼ jeʼex arroz, avena yéetel cebada. Yaan máakoʼobeʼ ku jáawal u jaantikoʼob tumen ku tuklikoʼobeʼ jeʼel u poloktaloʼobeʼ. Chéen baʼaleʼ wa ku xuʼulul u jaantik máak le baʼaloʼobaʼ jeʼel u beetik u kʼojaʼantaleʼ.

   Beet lelaʼ: Kaxt áantaj wa kʼáat tiʼ juntúul doctor bey baʼaxoʼob jeʼel u páajtal a jaantikeʼ. Por ejemploeʼ:

   Le carbohidratosoʼ ku beetik u yantal u muukʼ máak. Le proteínas xanoʼ ku yáantaj utiaʼal u séeb utstal le infeccionoʼoboʼ yéetel utiaʼal u meyaj tubeel u wíinklil máak. Jujunpʼéel janaloʼob maʼ yaʼab grasa yaantiʼeʼ ku yáantik máak utiaʼal u yuʼubikuba maʼalobil yéetel utiaʼal maʼ u jáan kʼojaʼantal tiʼ u corazón.

   Brendaeʼ ku yaʼalik: «Kin kanáantik tuláakal baʼax kin jaantik. Pero yaan hora xaneʼ kin jáan manik baʼal in jaante wa kin jaantik baʼaloʼob jach yaan u azucaril. Baʼaleʼ u jaajileʼ kʼaʼabéet k-kanáantik yéetel k-tsʼáaik u pʼiis baʼaxoʼob k-jaantik».

•   Maʼ a u píitmáan a beetik dieta. Maʼ u jach píitmáan a kanáantkaba ka tak pʼáatak maʼ a janal. Maʼ u píit máan a janal yéetel maʼ u xuʼulul a jaantik baʼax jach kiʼ a wuʼuyik.

   Beet lelaʼ: Tsʼíibt tuláakal baʼax ta jaantaj ichil junpʼéel mes. Tsʼoʼoleʼ ilawil jaytéen maʼ ta kanáantaj baʼax ta jaantiʼ. Yéetel ilawil baʼax unaj a beetik utiaʼal a wutskíintik.

   Haileyeʼ ku yaʼalik: «Yaan horaeʼ jach kin píitmáan, kin jaantik baʼaloʼob yaʼab u azucaril, yaan kʼiin xaneʼ jach kin kanáantik baʼaxoʼob kin jaantik. Pero tin xulaj in sen chʼíikil in wil bukaʼaj calorías yaan tiʼ baʼax kin jaantik yéetel bejlaʼeʼ kin tsʼáaik u pʼiis in janal. Maʼ fáciliʼ pero bejlaʼeʼ maʼatech u píitmáan in beetik dieta».

•   Ilawil baʼax unaj a beetik. Le Bibliaoʼ ku yaʼalik: «Le baʼax ku chʼaʼtuklik le máax sáakʼóoloʼ ku jóokʼol maʼalobil» (Proverbios 21:5). Le oʼolaleʼ utiaʼal a kanáantik baʼax ken a jaanteʼ kʼaʼabéet a chʼaʼtuklik bix kéen a beetil.

   Thomaseʼ ku yaʼalik: «Utiaʼal a kanáantik baʼax ken a jaanteʼ kʼaʼabéet a planeartik antes. Yaan horaeʼ teech ken a preparart baʼax ken a jaante. Pero tu tsʼookeʼ yaʼab utsiloʼob ken a kʼameʼ hasta yaan a maas ahorrar».

•   Jaant baʼaloʼob jeʼel u beetik uts tiʼ a wíinklileʼ. Le Bibliaoʼ ku yaʼalik: «Kanáant le naʼatoʼ» (Proverbios 3:21). Le naʼatiloʼ yaan u yáantkech utiaʼal a kanáantik baʼax ka jaantik.

   Kiaeʼ ku yaʼalik: «Káaj in jaantik baʼaloʼob jeʼel u yáantkeneʼ. Tu lugar in jaantik baʼal chʼujukeʼ kin jaantik junpʼéel manzana. Lelaʼ yaʼab utsiloʼob tsʼoʼok u taasikten».

•   Maʼ a sen tuklik. Le Bibliaoʼ ku yaʼalik: «Jaant a woʼoch yéetel kiʼimak óolal» (Eclesiastés 9:7). A kanáantik baʼax ka jaantikeʼ maʼ u kʼáat u yaʼal wa yaan a pʼatik a janal wa yaan a jach chʼíikil a wil baʼax unaj a jaantik. Wa taak a wéemsik a wíinklileʼ maʼ u tuʼubultecheʼ le baʼax maas kʼaʼanaʼanoʼ a toj óolal le oʼolaleʼ maʼ a sen tuklik.

   Melanieeʼ ku yaʼalik: «Táant in wéemsik 13 kiloseʼ pero mix juntéen tin máansaj wiʼijil hasta yaan horaeʼ kin jaantik junpʼéel chan postre. In wojel maʼ chéen chʼaʼabiliʼ pero utiaʼal in kanáantik in toj óolaleʼ kʼaʼabéet in beetik le kʼeexoʼobaʼ».