Yehofa * Mlungu ni juŵatandikasisye liŵasa lyandanda. Baibulo jikusatusalila kuti jwalakwe ŵapanganyisye jwamkongwe jwandanda ni “ŵapite najo kwa Adamu.” Adamu ŵasangalele najo mwati ŵatite: “Aju sambano ni liwupa lya maupa gangu, soni mnowu wa mnowu wangu.” (Genesis 2:22, 23) Yehofa akusakape kuti ŵandu ŵalombane aŵeje ŵakusangalala.

Mundu palombele mpaka aganisyeje kuti yindu ciyijendeje cenene ndaŵi syosope. Nambo kusala yisyene, atamose jwamlume ni jwamkongwe ŵalombane ŵakusanonyelana yisyesyene akusakola yakusawusya. (1 Akolinto 7:28) M’kabuku akano citupate maloŵe ga m’Baibulo gampaka gakamucisye ulombela wawo, soni liŵasa lyawo naga akugakamulicisya masengo.—Salimo 19:8-11.

YAJIKUSASALA BAIBULO: Jwamlume jwamlombele ali mtwe wa liŵasa.—Aefeso 5:23.

Naga wawojo ali jwamlume jwamlombele, Yehofa akusasaka kuti wawojo ŵasamalileje ŵamkwawo mwacinonyelo. (1 Petulo 3:7) Yehofa ŵampanganyisye jwamkongwe mpela jwakwakamucisya. M’yoyo, Mlungu akusasaka kuti ŵacimbicisyeje ŵamkwawo, soni ŵanonyeleje. (Genesis 2:18) Ŵanonyeleje mnope ŵamkwawo, soni ayiwoneje yakusaka ya ŵalakwewo kuŵa yakusosekwa mnope kupunda yawo.—Aefeso 5:25-29.

Naga wawojo ali jwamkongwe jwamlombegwe, Yehofa akusasaka kuti ŵacimbicisyeje mnope ŵamkwawo, soni kwakamucisya kukwanilisya masengo gawo. (1 Akolinto 11:3; Aefeso 5:33) Ŵakamucisyeje pa yasagwile, soni akamulaneje nawo ni mtima wosope. (Akolose 3:18) Naga akutenda yeleyi, caciŵa mundu jwakusalala pameso pa ŵamkwawo, soni pa Yehofa.—1 Petulo 3:1-6.

YAMPAKA ATENDE:

• Ŵawusye ŵamkwawo yampaka atende wawojo kuti aŵe jwamlume kapena jwamkongwe jwambone. Mjawojo pakwasalila, ampikanile cenene kaneko atende yampaka akombole kuti akwanilisye yeleyo

• Aŵe ŵakutulala mtima. Mpaka yijigale ndaŵi jelewu kuti jwalijose alijiganye kutenda yindu yakumsangalasya mjakwe

YAJIKUSASALA BAIBULO: Asaceje yakumnonyelesya mjawo jwa mu ulombela. (Afilipi 2:3, 4) Ŵawoneje ŵamkwawo kuŵa ŵakusosekwa mnope, soni akumbucileje kuti Yehofa akusasaka kuti ŵakutumicila ŵakwe aŵeje ‘ŵakuwusimana mtima kwa ŵandu wosope.’ (2 Timoteo 2:24) “Apali ŵakusaŵeceta mwangaganicisya mpela kusoma kwa upanga, nambo lulumi lwa ŵandu ŵalunda lukusaposyaga.” M’yoyo asaguleje cenene maloŵe pakuŵeceta. (Miyambo 12:18) Msimu wa Yehofa ucakamucisya kuti aŵeceteje mwakuwusimana mtima, soni mwacinonyelo.—Agalatia 5:22, 23; Akolose 4:6.

YAMPAKA ATENDE:

• Mkanatande kuŵecetana ni ŵamkwawo pa ngani jine jakwe, apopeleje kaje kuti aŵe ŵakutulala mtima, soni ŵakoseka kupikanila

• Aganicisye mwakusokoka yakusaka kuŵeceta, soni mwacaŵecetele

YAJIKUSASALA BAIBULO: Ŵandu ŵalombane akusaŵa “cilu cimpepe.” (Matayo 19:5) Nambo ligongo lyakuti ali ŵandu ŵaŵili komboleka kolaga nganisyo syakulekangana ni mjawo. M’yoyo akusosekwa kulijiganya kuti akamulaneje nganisyo, soni amanyilileje mwakupikanila jwine. (Afilipi 2:2) Mkamulano uli wakusosekwa pakusagula yakutenda. Baibulo jikusati: “Yakusaka ŵandu kutenda yikusakwanilicikwa naga akuŵecetana.” (Miyambo 20:18) Pakusagula yakutenda yakusosekwa mnope pampepe ni ŵamkwawo, akundeje kuti yajikusasala Baibulo yakamucisyeje.—Miyambo 8:32, 33.

YAMPAKA ATENDE:

• Ŵasalileje ŵamkwawo yamumtima. Akagambaga kwasalila nganipe kapena nganisyope

• Aŵecetaneje kaje ni ŵamkwawo mkanasagule kutenda yine yakwe