Ngani Syambone Syaŵalembile Mateyu 19:1-30
19 Yesu paŵamasile kuŵecheta maloŵe gelega, jwatyosile ku Galileya ni jwayiche m’malile mwa chigawo* cha Yudeya, lisi line lya Yolodani.
2 Gulu jekulungwa ja ŵandu jamkuyisyesoni mwamti jwalakwe ŵaposisye* ŵandu ŵaŵaliji ŵakulwala.
3 Kaneko Afalisi ŵayiche kwa jwalakwe ni chakulinga chakuti amlinje, ni ŵamwusisye kuti, “Ana yili yakuŵajilwa kuti jwamlume amasye ulombela ni ŵamkwakwe paligongo lililyose?”
4 Yesu ŵajanjile kuti, “Ana jemanja nganimŵalanjeje kuti jwele juŵapanganyisye ŵandu pandanda, ŵampanganyisye jwamlume ni jwamkongwe?
5 Ana nganimŵalanjejesoni kuti ŵatite, ‘Paligongo lyeleli jwamlume chachaleka babagwe ni mamagwe ni kuja kutama* ni ŵamkwakwe, soni ŵaŵiliwo tachiŵa chilu chimpepe’?
6 Mwamti nganaŵasoni ŵaŵili, nambo chilu chimpepe. Myoyo, yayilumbikenye Mlungu pampepe, mundu jwine akayilekanganya.”
7 Jemanjajo ŵamwusisyesoni jwalakwejo kuti, “Sambano ligongo chichi Mose jwalamwile kuti jwamlume apelecheje chikalata chakumachisya ulombela kwa jwamkongwe ni kumleka?”
8 Jwalakwe jwajanjile kuti, “Ligongo lya kumula kwa mitima jenu, Mose ŵamkundile jemanja kumasyaga ulombela ni achiŵamkwenu, nambo kutandila pandanda pene nganiyiŵa myoyo.
9 Une ngumsalila jemanja kuti jwalijose jwakwaleka ŵamkwakwe ni kulombela ŵane ngaŵaga paligongo lyakuti ŵamkwakwewo atesile chikululu,* nikuti jwalakwejosoni akutenda chikululu.”*
10 Kaneko ŵakulijiganya ŵakwe ŵamsalile kuti, “Naga yili myoyo kwa jwamlume ni ŵamkwakwe, ni kuli chenene kutama ngalombela.”
11 Jwalakwe ŵasalile jemanjajo kuti, “Ngaŵa wosope ŵampaka akombole kutenda yeleyi, nambo ŵele pewo ŵaŵapochele mtuka basi.
12 Pakuŵa pana ŵandu ŵane ŵangalombela ligongo lyakuti ŵapagwile myoyo, soni ŵane ligongo lyakuti ŵatesile yakwachela,* nambosoni pana ŵandu ŵane ŵangalombela ligongo lya Uchimwene wakwinani. Jwalijose jwampaka akombole kutenda yeleyi, ayitende.”
13 Kaneko ŵandu ŵayiche kwa jwalakwe ni tuŵanache kuti atusajiche makono gakwe soni kutupopelela, nambo ŵakulijiganyawo ŵakalipile ŵanduwo.
14 Nambo Yesu jwatite, “Atuleche tuŵanacheto, akatulekasya kuti tuyiche kwa une, pakuŵa Uchimwene wakwinani uli wa ŵandu ŵamti mpela tuŵanachetu.”
15 Ni jwalakwe ŵatusajiche makono gakwe tuŵanacheto kaneko ŵatyosile kweleko.
16 Kaneko mundu jwine jwayiche kwa jwalakwe ni kumwusya kuti, “Mwalimu, ana ngusosekwa kutenda yindu yapi yambone kuti ngapate umi wangamala?”
17 Jwalakwe jwamjanjile kuti, “Ligongo chichi mkumbusya une pakwamba ya yindu yayili yambone? Jwambone apali jumope. Nambo naga mkusaka kupata umi wangamala, mpitilisye kupikanila malamusi ga Mlungu.”
18 Jwalakwe ŵamwusisye kuti, “Malamusi gakwe gapi?” Yesu jwajanjile kuti, “Mkawulaga mundu, mkatenda chikululu,* mkajiŵa, mkapeleka umboni waunami,
19 mwachimbichisyeje baba ni mama ŵenu, soni mumnonyeleje mjenu mpela mwamkusalinonyelela mwasyene.”
20 Mnyamatajo jwatite, “Mbele ndili mkukuya yindu yosopeyi, sambano ana ngusosekwasoni kutenda chichi?”
21 Yesu ŵamsalile jwalakwejo kuti, “Naga mkusaka kuti mŵe jwamlama,* mjawule mkasumisye yindu yenu yosope ni mbiyasyo mkape ŵakulaga, mwamti chimchikola chipanje kwinani. Kaneko myiche, mŵe jwakulijiganya jwangu.”
22 Mnyamatajo paŵapikene yeleyi, ŵatyosile ali mkudandawula mnope ligongo ŵakwete chipanje chejinji.
23 Pelepo Yesu ŵasalile ŵakulijiganya ŵakwe kuti, “Nditu ngumsalichisya kuti, yichiŵa yakusawusya kuti mundu jwakusichila akajinjile mu Uchimwene wakwinani.
24 Ngumsalilasoni kuti, yili yangasawusya kuti ngamila jijinjile pebowo lya singano kulekangana ni kuti mundu jwakusichila akajinjile mu Uchimwene wa Mlungu.”
25 Ŵakulijiganyawo paŵapikene yeleyi, ŵasimonjile mnope ni ŵatite, “Naga yili myoyo, ni ŵani ŵampaka akulupuche?”
26 Yesu ŵalolechesye jemanjajo, ni ŵasalile kuti, “Ni ŵandu, yeleyi yili yangakomboleka, nambo ni Mlungu yindu yosope yili yakomboleka.”
27 Kaneko Petulo ŵajanjile kuti, “Alole! M’we tulesile yindu yosope ni kwakuya wawojo, ana sambano tuchipata chichi?”
28 Yesu ŵasalile ŵakulijiganyawo kuti, “Nditu ngumsalichisya kuti, pandaŵi jakupanganyasoni yindu, Mwanache jwa mundu pachachitama pampando wakwe wa uchimbichimbi, jemanja ŵamunguyisye une chimchitama pa mipando 12, ni kulamulilaga mbumba 12 sya Yisalayeli.
29 Soni jwalijose jwalesile nyumba jakwe, achakulugwe, achapwakwe, achalumbugwe, babagwe, mamagwe, ŵanache ŵakwe kapena migunda ligongo lya lina lyangu, chachipochela yejinji kupunda yeleyi nambosoni chachipata umi wangamala.
30 “Nambo ŵajinji ŵali ŵandanda sambano jino chachiŵa ŵakumalisya soni ŵali ŵakumalisya chachiŵa ŵandanda.
Maloŵe Gamwiŵanda
^ Ku Mozambique akusati “província.”
^ Kapena kuti, “ŵalamisye.”
^ Maloŵega mu Chigiliki gakusagopolela kuti “kulumbikana mwamachili mpela yindu yakumata ni yakumatila.”
^ Mu Chigiliki akusati, por·neiˈa. Alole Kugopolela kwa Maloŵe Gane
^ Mu Chigiliki akusati, moi·kheiʹa. Alole Kugopolela kwa Maloŵe Gane
^ Ŵane akusati “kuwulaga kumakongolo.”
^ Mu Chigiliki akusati, moi·kheiʹa. Alole Kugopolela kwa Maloŵe Gane
^ Kugopolela kuti kuŵa ŵakwanila pameso pa Mlungu.
