Mbali 4
Kukamulicisya Masengo Cenene Mbiya
“Yakusaka ŵandu kutenda yikusakwanilicikwa naga akuŵecetana.”
Wosopewe tukusasosecela mbiya kuti tupateje yindu yakusosecela m’maŵasa getu. (Miyambo 30:8) Soni “mbiya sikusacenjela.” (Mlaliki 7:12) Mpela liŵasa, mpaka yiŵe yakusawusya kutagulilana ya mbiya, nambo akakunda kuti mbiya sisokonasye ulombela wawo. (Aefeso 4:32) Ŵalombane akusosekwa kuŵa ŵakulupicika kwa jwine ni mjakwe, soni kukamusyangana pakuganisya ya mbiya syakusosekwa kusikamulicisya masengo.
1 AGANISYEJE MWAKUSAMALA YAKUSAKA KUSUMA
YAJIKUSASALA BAIBULO: “Naga jumo jwa jemanja akusaka kutaŵa nyumba jekulungwa, ana ngatama kaje pasi ni kuŵalanjila mbiya sitisisosekwe kuti jwalakwejo apakombole kulola naga akwete mbiya syakwanila kumalicisya nyumbajo?” (Luka 14:28) Luli lunda kamusyanganaga pakakamulicisye masengo ka mbiya syawo. (Amosi 3:3) Aganicisyeje ya yindu yakusosecela kusuma, soni ya mbiya syampaka akombole kusumila yinduyo. (Miyambo 31:16) Akagambaga kusuma yindu ligongo lyakuti akwete mbiya. Aŵambaleje ngongole. Akamulicisyeje masengo mbiya syakwete basi.—Miyambo 21:5; 22:7.
YAMPAKA ATENDE:
-
Naga pakumala kwa mwesi akwete mbiya sine syakonjecesya, atagulilane kuti alole yampaka atende ni mbiyasyo
-
Naga nganakola mbiya syakwanila, atende yakuti anandiye mbiya syakusakamulicisya masengo. Mwambone, mpaka ateleceje yakulya yawo, mmalo mwakuja kusuma yakulya kumalo kwakusasumisya yakulya yetelece kala
2 AŴECETANEJE MWAGOPOKA PAKWAMBA YA MBIYA
YAJIKUSASALA BAIBULO: ‘Atendeje yindu yambone [“mwakuwona mtima,” NW], ngaŵa pameso pa Ambujepe, nambosoni pameso pa ŵandu.’ (2 Akolinto 8:21) Ŵasalileje mwakuwona mtima ŵamkwawo pakwamba ya mbiya syakusapata, soni syakusakamulicisya masengo.
Ndaŵi syosope pakusaka kusuma yindu yekulungwakulungwa, aŵecetaneje ni ŵamkwawo. (Miyambo 13:10) Kuŵecetana pakwamba ya mbiya kucikamucisya kuti liŵasa lyawo liŵeje lya mtendele. Akasiwonaga mbiya syakusapata kuŵa syawope, nambo asiwoneje kuŵa sya liŵasa.
YAMPAKA ATENDE:
-
Akamulaneje pa winji wa mbiya syampaka jwalijose akamulicisye masengo mwangamsalila mjakwe
-
Aŵecetaneje pakwamba ya mbiya cakusawusya mkanicipagwe