Chikalata Chakwawula kwa Akolose 4:1-18
4 Jemanja achambuje, mwatendeleje yindu achikapolo ŵenu mwachilungamo soni mwakuŵajilwa, pakuŵa mkumanyilila kuti jemanjasoni mkwete Ambuje ŵenu kwinani.
2 Mlimbichileje kupopela, mŵeje mesope pangani jakupopelaji soni mŵeje ŵakuyamichila.
3 Pamkutenda yeleyi, mtupopelelejesoni kuti Mlungu atuwugulile litanga kuti tulalichile maloŵe soni kuti tukombole kuŵecheta ya yakusisika ya Mlungu yakwamba Klistu, yele une andaŵile nayo,
4 soni kuti lalichile chenene yakwamba yakusisikayo mpela munasosechelaga.
5 Mpitilisye kwenda mwalunda pamkutenda yindu ni ŵandu ŵangakulupilila, soni mkamulichisyeje masengo chenene ndaŵi jenu.*
6 Ndaŵi syosope maloŵe genu gaŵeje gambone, gakunong’a mpela kuti mgatasile njete, kuti mmanyilile mwampaka mumjanjile mundu jwalijose.
7 Tukiko, mlongo mjangu jwapamtima soni mtumiki jwakulupichika, soni kapolo mjetu mwa Ambuje, chiŵasalile yosope yakwamba une.
8 Ngumtumisya jwalakweju kwa jemanja ni chakulinga chakuti mmanyilile mwatuŵelele m’weji, soni kuti jwalakweju alimbisye mitima jenu.
9 Akwika pampepe ni Onesimo, mlongo mjangu jwakulupichika soni jwapamtima, jwele juŵatyochele pasikati penu. Jemanjaji chiŵasalile yosope yayikutendekwa akuno.
10 Alisitako, kapolo mjangu, akupeleka moni. Nambosoni Maliko, msuŵani jwa Balanaba (jwele twamsalile jemanja kuti mumpochele chenene ndaŵi jilijose jichachiyika kweleko),
11 soni Yesu jwakolanjidwa Yusito, akupelekasoni moni. Jemanjaji ali mu gulu ja ŵandu ŵaŵawumbele, soni ni ŵaŵaŵape ŵali ŵamasengo achimjangu pa masengo ga Uchimwene wa Mlungu soni ŵaŵele ali mkulimbikasya* mnope une.
12 Epafula, kapolo jwa Klistu Yesu juŵatyochele pasikati penu akumpasoni moni. Jwalakweju ndaŵi syosope akusalipeleka mnope pakumpopelela, kuti pambesi pakwe mŵe ŵakulimba soni ŵakomangala mwausimu nambosoni kuti mŵe ŵangakayichila ata panandi yakusaka ya Mlungu yosope.
13 Pakuŵa ngumtendela umboni jwalakweju kuti akusalipeleka mnope mmalo mwa jemanja soni mmalo mwa achalongo achimjetu ku Laodikaya ni ku Helapoli.
14 Luka, dokotala jwetu jwapamtima akupeleka moni. Nombenajo Dema akupeleka moni.
15 Mumbelechele moni kwa achalongo achimjetu ku Laodikaya soni kwa Nimfa ni ku mpingo wosope wawukusasongana pa nyumba jakwe.
16 Chikalatachi pachachiŵalanje kumangwenuko, mlinganyesoni yakuti akachiŵalanje ku mpingo wa Laodikaya soni jemanja mŵalanje chikalata chinatumisye ku Laodikayako.
17 Mumsalilesoni Alikipo kuti, “Mlolechesye kuti mkukwanilisya utumiki wamwawupochele mwa Ambuje.”
18 Sambano apochele moni wangu wangulemba jika ni ligasa lyangu, une Paulo. Akumbuchileje maunyolo gandaŵile nago kundende kuno. Umbone mtima wekulungwa uŵe ni jemanja.
