Chikalata Chandanda cha Petulo 3:1-22
3 Myoyosoni, jemanja achakongwe, mwapikanileje achiŵamkwenu, ni chakulinga chakuti naga ŵane mwa jemanjaji ali ŵangapikanila Maloŵe ga Mlungu, atande kugapikanila, ngaŵaga ni maloŵe genu nambo ligongo lya yitendo yenu yambone,
2 soni pakulola ndamo syenu syeswela soni uchimbichimbi wekulungwa.
3 Kulisalalisya kwenu kukaŵa kwakusape, mpela kutiŵa wumbo kapena kuwala yakulisalalisya yagolide kapena kuwala yakuwala yapenani mnope.
4 Nambo kuŵeje kwa mundu jwakusisika jwamkati. Myoyo mlisalalisyeje ni yakuwala yangajonasika yayili kufasa* soni kuwusimana mtima. Ndamo syelesi ni syasili syakusosekwa mnope pameso pa Mlungu.
5 Pakuŵa mwelemu ni muŵatendelaga pakulisalalisya achakongwe ŵakala ŵaŵaliji ŵaswela soni ŵaŵamjembecheyaga Mlungu. Jemanjaji ŵapikanilagasoni achiŵamkwawo ni mtima wosope,
6 mpela muŵatendelaga Sala pakumpikanila Abulahamu, mwamti ŵamkolangaga kuti ambuje. Jemanja mŵele ŵanache ŵakwe soni chimŵepe ŵanache ŵakwe naga mkupitilisya kutenda yambone soni naga ngamkogopa chindu chine chilichose.
7 Jemanjasoni achalume, mpitilisye kutama ni achiŵamkwenu mwakwamanyilila chenene.* Mwachimbichisyeje achakongwewo mpela yiŵiga yangakaŵa kasika, pakuŵa jemanjaji chachipochela pampepe ni jemanja umi wele Mlungu chachimpa ligongo lya umbone mtima wakwe. Mtendeje yeleyi kuti Mlungu akaleka kugapikanila mapopelo genu.
8 Pakumalisya, jemanja wosope mŵeje ŵanganisyo simpepe,* ŵakwaganichisya ŵane, ŵakunonyelana, ŵakutendelana chanasa soni ŵakulinandiya.
9 Ŵane pamtendele yakusakala, mkawuchisyagasoni ni yakusakala, soni ŵane pamtendele yachipongwe, mkawuchisyagasoni ni yachipongwe. Mmalomwakwe, mwatendeleje yambone pa yakusakala yamtendeleyo, pakuŵa Mlungu ŵamŵilasile ku umi mpela welewu, mwamti Mlungujo chachimpa upile.
10 Pakuŵa Malemba gakusati, “Jwalijose jwakusaka kusangalala ni umi soni kugawona masiku gambone, akusosekwa kululekasya lulumi lwakwe kuti lukaŵechetaga yakusakala soni ngomo syakwe kuti sikaŵechetaga yaunami.*
11 Jwalakwe aleche kutenda yakusakala ni kutendaga yambone. Jwalakwe asosejesoseje mtendele soni atendeje yiliyose yakomboleka kuti aŵeje pamtendele ni achimjakwe.
12 Pakuŵa meso ga Yehofa gakusaŵa pa ŵandu ŵakutenda yachilungamo, soni mawiwi gakwe gakusapikanila lipopelo lyawo, nambo ngope ja Yehofa jikusaŵengana ni ŵandu ŵakutenda yakusakala.”
13 Yisyene, ana ŵani ŵampaka amtendele yindu yakusakala naga mkulipeleka pakutenda yindu yambone?
14 Atamose msimaneje ni yakusawusya ligongo lyakutenda yambone,* chimchiŵa ŵakusangalala. Nambope, ngamkusosekwa kogopa yakusajogopa* jemanjajo, soni mkadandawulaga ni chilichose.
15 Nambo mjitichisyeje m’mitima jenu kuti Klistu ali Ambuje, soni kuti ali jwamswela. Ndaŵi syosope mŵeje ŵakoseka kumjanga jwalijose jwakumwusya pakwamba ya chembecheyo chimkwete, nambo mtendeje yeleyi mwakuwusimana mtima soni mwauchimbichimbi wekulungwa.
16 Mŵeje ni chikumbumtima chambone, kuti ŵele ŵakumŵechetela yindu yakusakala atende sooni pakulola ndamo syenu syambone mpela ŵakumkuya ŵa Klistu.
17 Kuli chenene kuti mlajeje ligongo lyakutenda yindu yambone, naga Mlungu akundile, kulekangana ni kuti mlajeje ligongo lyakutenda yakusakala.
18 Klistu ŵawile kampepe basi ligongo lya yakulemwa yetu. Mundu jwakulungama jwawilile ŵandu ŵakusakala, ni chakulinga chakuti amlongolele jemanja kwa Mlungu. Jwalakwe ŵawile ali akwete chilu chaumundu, nambo ŵajimwiche ni chilu chausimu.
19 Kaneko ŵapite kukujilalichila misimu jajaliji mu ndende.
20 Misimu jeleji jaliji jangapikanila pandaŵi jele Mlungu ŵaliji mkwembecheya mwakuwusimana mtima, m’masiku ga Nowa. Pandaŵiji, chombo chaliji chili mkati mwakuchipanganya chele chakulupwisye ŵandu ŵakuŵalanjikape, ŵakwana 8 basi, pachigumula chamesi.
21 Chakulandana ni chombochi chili ubatiso, wele ukumkulupusya jemanja sambano jino kupitila mu kwimuka ku chiwa kwa Yesu Klistu. Ubatiso nganiwuŵa kwamba kutyosya likaku pachilu, nambo uli kumŵenda Mlungu kuti ŵape chikumbumtima chambone.
22 Yesujo ali kumkono wamlyo wa Mlungu, pakuŵa ŵapite kwinani, mwamti Mlungu ŵaŵisile malayika, maulamusi soni machili pasi pa ulamusi wakwe.
Maloŵe Gamwiŵanda
^ Ŵane akusati “kulijinichila.”
^ Kapena kuti, “mwakwaganichisya; mwakwapikanichisya.”
^ Kapena kuti, “mganisyeje mwakulandana.”
^ Kapena kuti, “yachinyengo.”
^ Kapena kuti, “yachilungamo.”
^ Kagopolele kanesoni, “mkajogopa pakumjogoya.”
