Chikalata cha Yakobo 3:1-18
3 Achalongo achimjangu, pasikati penu pakaŵa ŵakwiganya ŵajinji, ligongo tukumanyilila kuti tuchipochela chilango* chamachili.*
2 Pakuŵa wosopewe tukusalemwesya* ndaŵi syejinji. Naga jwine jwangalemwesya pakuŵecheta, jwelejo ali mundu jwamlama, soni mpaka akombole kuchilamulila chenene chilu chakwe chosope.
3 Naga tutaŵilile ngonji kukamwa kwa hachi kuti jitupikanileje patukujilongolela, tukusakombolasoni kulamulila chilu chakwe chosope.
4 Ni mwayikusaŵelasoni ni sitima. Atamose kuti jikusaŵaga jekulungwa soni kuti jikusajendaga ni machili ga mbungo, nambo mundu jwatemi kunyuma kwakwe akusajijongolela ni litabwa lyamwana* soni sitimajo jikusajawulaga kulikose kwasachile mundujo.
5 Myoyosoni, lulumi luli kambali kamwana ka chilu chetu, nambo ni lulumilo tukusaŵechetaga yindu yakulikwesya mnope. Aganichisyesoni ya moto. Moto uli kachindu kamwana nambo ukusakombolaga kocha ngalango jekulungwa.
6 Lulumi lulisoni mpela moto. Pa yiŵalo yosope ya chilu, lulumi ni lwaluli lwagumbala ni yakusakala ligongo lukusasakasya chilu chosope. Lulumi mpaka lupambe moto ni konanga umi wosope wa mundu, konanga kwakwe mpelaga moto wa Gehena.*
7 Ŵandu mpaka akombole kulanga mitundu jakulekanganalekangana ja yinyama yakwitinji, yijuni, yakwaŵa soni ya m’nyasa, mwamti pakwete palanjile.
8 Nambotu pangali mundu jwampaka akombole kulanga lulumi. Luli lwangakomboleka kululamulila, lukwete machili gakuwulasya, soni luli lwagumbala ni ululu wakuwulaga.
9 Lulumi tukusalukamulichisya masengo pakumchimbichisya Yehofa, jwali Atati, nambo ni lulumi pelo, tukusatembelela nalo ŵandu ŵele ŵapali “m’chiwanichisyo cha Mlungu.”
10 Pakamwa pakusakoposya maloŵe gakumchimbichisya Mlungu, soni pakamwa papopo pakusakoposya yakutembelela.
Achalongo achimjangu, nganiyiŵa yakuŵajilwa kuti yindu yitendekweje m’litala lyeleli.
11 Ana nduluko ja mesi mpaka jikoposye mesi gambone soni mesi gakuŵaŵa palisimbo limo? Iyayi.
12 Achalongo achimjangu, ana mpaka yikomboleche kuti mkuju usogosye yisogosi ya mipeleya, kapena mpeleya kusogosya nguju? Nganiyiŵa yikomboleche. Myoyosoni nduluko ja mesi ganjete nganijiŵa jikopwesye mesi gambone.
13 Ana ŵani mwa jemanja jwakwete lunda soni jwakusapikanichisya yindu? Kupitila mu ndamo syakwe syambone, jwalakwejo alosye kuti lunda lukusamlongolela kutenda yindu ni mtima wakufasa.
14 Nambo naga m’mitima jenu mwana jelasi* jekulungwa soni yakangana,* mkatanda kulilapilila ni lunda lwenulo, pakuŵa kutenda myoyo kuli kulambusya.
15 Lwelelu nganiluŵa lunda lwakutyochela kwinani, nambo lwa pachilambo chapasi, lwakutenda yindu mpela chinyama soni lwa yiŵanda.
16 Pakuŵa palipose papali jelasi soni yakangana,* pakusaŵasoni ungapikangana soni yakusakala ya mtundu uliwose.
17 Nambo lunda lwakutyochela kwinani, chandanda, luli lweswela, kaneko lwamtendele, lwakunda nganisyo sya ŵane, lwakoseka kupikanila, lwagumbala ni umbone soni yisogosi yambone, lwangali lusagu, soni lwangatenda yachinyengo.
18 Nambosoni, ŵandu ŵakuyikasya mtendele akusapanda mbeju mumtendele soni chachigowola mbeju ja chilungamo.
Maloŵe Gamwiŵanda
^ Ŵane akusati “chamuko.”
^ Kapena kuti, “chakalalisya.”
^ Kapena kuti, “tukusakuŵala.”
^ Lina lya litabwa lyeleli akusati lemu.
^ Alole Kugopolela kwa Maloŵe Gane.
^ Ŵane akusati “dumbo.”
^ Kagopolele kanesoni, “yakumbila yakulinonyela.”
^ Kagopolele kanesoni, “yakumbila yakulinonyela.”
