Chikalata Chakwawula kwa Akolose 3:1-25
3 Nambope, naga Mlungu ŵamjimwisye jemanja yimpepe ni Klistu, mpitilisye kusosasosa yindu yakwinani, kwele Klistu atemi kumkono wamlyo wa Mlungu.
2 Mŵicheje nganisyo syenu pa yindu yakwinani ngaŵaga pa yindu ya pachilambo.
3 Pakuŵa jemanja mwawile, umi wenu usunjidwe mwa Klistu jwali jwakamulana ni Mlungu.
4 Pandaŵi jachachiwonechela Klistu, jwali umi wetu, jemanjasoni chimchiwonechela mu uchimbichimbi pampepe ni jwalakwejo.
5 Myoyo, myitendekasye yiŵalo ya chilu chenu pachilambo chapasi kuŵa yewe ku yachikululu,* yausakwa, kumbila mnope yagonana, kumbila yakusakala, soni umbombo, wawulisoni kutindiŵalila milungu jakusepa.
6 Ligongo lya yindu yeleyi, ukali wa Mlungu ukwika.
7 Jemanjasoni mwatendaga yindu mpela yeleyi pandanda.
8 Nambo sambano, mkusosekwa kuyijasila yosopeyi kwakutalikangana ni jemanja. Mjasesoni ukali, kupya mtima, kusakala, maloŵe gachipongwe, soni pakamwa penu pakakopokaga maloŵe gakutukana.
9 Mkalambusyanaga. Mwule umundu wakala* pampepe ni masengo gakwe,
10 ni m’wale umundu wasambano wele Mlungu akusapeleka. Yeleyi yikugopolela kuti, mwakumanyilila chenene yindu, mtendekasye umundu wenu kuŵa wasambano mwakamulana ni ndamo sya Mlungu.
11 Pamkutenda yeleyi, ngasipaŵa Mgiliki kapena Myuda, kuwumbala kapena ungawumbala, mlendo, mjinga,* kapolo kapena mfulu,* pakuŵa Klistu ni jwali yindu yosope soni ali mwa wosope.
12 Myoyo, mpela ŵakusagulidwa ŵa Mlungu, ŵamli ŵaswela soni ŵakunonyeledwa, m’wale chanasa chekulungwa, umbone mtima, kulinandiya,* kufasa,* soni kuwusimana mtima.
13 Mpitilisye kupikana ya ŵane soni kululuchilana ni mtima wosope atamose jwine ali akwete ligongo lyakudandawulila ya mjakwe. Mpela muŵatendele Yehofa pakumkululuchila ni mtima wosope, jemanjasoni mtendeje myoyo.
14 Nambo kupunda pa yosopeyi, m’wale chinonyelo, pakuŵa ni chachili chakwakamulanya ŵandu chambone mnope.
15 Nambosoni, mkunde kuti mtendele wa Klistu ulamulileje* m’mitima mwenu, pakuŵa mwaŵilanjidwe ku mtendele welewu mpela yiŵalo ya chilu chimpepe. Soni mlosyeje kuti mli ŵakuyamichila.
16 Mkunde kuti maloŵe ga Klistu gatamilichiche mwa jemanja soni gampe lunda. Mpitilisye kwiganyana soni kulimbikasyana* kupitila mu masalimo, nyimbo syakumlumba Mlungu, soni nyimbo syausimu syakwimba mwakuyamichila.* Mpitilisye kumjimbila Yehofa m’mitima mwenu.
17 Chilichose chimkuŵecheta kapena kutenda, m’chitendeje m’lina lya Ambuje Yesu, soni myamichileje Mlungu Atati kupitila mwa jwalakwejo.
18 Jemanja achakongwe, mwapikanileje achiŵamkwenu, pakuŵa yeleyi ni yakuŵajilwa kutenda ŵandu ŵakusiŵakuya Ambuje.
19 Jemanja achalume, mkaleka kwanonyela achiŵamkwenu soni mkapilaga mnope mtima.*
20 Jemanja ŵanache, mwapikanileje achinangolo ŵenu pa chilichose, pakuŵa kutenda yeleyi kukusasangalasya Ambuje.
21 Jemanja achatati, mkasimwatumbilikasyaga* ŵanache ŵenu, kuti akatenguka.
22 Jemanja achikapolo, mwapikanileje achambuje ŵenu ŵapasi pano* pa chilichose, ngaŵaga pamesope, pakwamba kusaka kwasangalasya ŵandu, nambo mwakuwona mtima, soni mwakogopa Yehofa.
23 Chilichose chimkutenda, mchitendeje ni umi* wenu wosope, mpela kuti mkutendela Yehofa ngaŵaga ŵandu,
24 pakuŵa mkumanyilila kuti kwa Yehofa ni kuchimchipochela chipanje mpela mboto* jenu. Mwatumichileje Ambuje ŵenu, Klistu, mpela achikapolo.
25 Yisyene, jwalijose jwakusatenda yakulemwa, chachipochelasoni chilango* ligongo lya yakulemwa yakutendayo, pakuŵa Mlungu jwangali lusagu.
Maloŵe Gamwiŵanda
^ Mu Chigiliki akusati, por·nei′a. Alole Kugopolela kwa Maloŵe Gane.
^ Maloŵe gakwe gandanda, “mundu jwakala.”
^ Maloŵe gakwe gandanda, “Msukuti.” Linali lyagambaga ya ŵandu ŵaŵawonekaga ŵakusigalila ligongo lya ndamo syawo.
^ Ŵane akusati “mlukosyo.”
^ Kapena kuti, “kulitulusya.”
^ Ŵane akusati “kulijinichila.”
^ Kapena kuti, “ulongoleleje.”
^ Kapena kuti, “kalamusyana.”
^ Kapena kuti, “mwakamula mtima.”
^ Kapena kuti, “mkatendelaga ngalwe.”
^ Kapena kuti, “mkasakalisyaga.”
^ Maloŵe gakwe gandanda, “ŵaumundu.”
^ Alole Kugopolela kwa Maloŵe Gane.
^ Ŵane akusati “mbote; chakupochela.”
^ Ŵane akusati “chamuko.”
