Ulombela ukusatendekasya kuti papagwe liŵasa lyasambano. Atamose kuti ndaŵi syosope mpaka ŵanonyeleje acinangolo ŵawo, soni kwacimbicisya, nambo pajinjile mu ulombela, ŵamkwawo ni ŵali mundu jwakusosekwa mnope pacilambo cosope kwa wawojo. Acanasi ŵawo ŵane mpaka yasawusyeje kwiticisya yeleyi. Nambo yajikusasala Baibulo mpaka yakamucisye kuti atameje mwamtendele ni acanasi ŵawo pakulingalinga kulimbisya mkamulano wa liŵasa lyasambano.

YAJIKUSASALA BAIBULO: “Mwacimbicisyeje atati ŵenu ni mama ŵenu.” (Aefeso 6:2) Cinga wawojo akwete yaka yejinji kapena iyayi, akusosekwa ndaŵi syosope kwacimbicisyaga acinangolo ŵawo. Akumbucilejesoni kuti ŵamkwawo akusosekwa kwacimbicisyaga acinangolo ŵawo. Pakuŵa “cinonyelo cangali wiwu,” yikasakalisyaga pakwawona ŵamkwawo ali mkukamulana ni acanasi ŵawo.—1 Akolinto 13:4; Agalatia 5:26.

YAMPAKA ATENDE:

• Aŵambaleje kuŵeceta maloŵe mpela gakuti, “ŵandu ŵakumangwenu ndaŵi syosope ŵanganjimbicisya” kapena gakuti “mama ŵenu ŵanganonyela yangusatenda”

• Alinjeje kuyiwona yindu mwakuyiwonela ŵamkwawowo

YAJIKUSASALA BAIBULO: “Mundu jwamlume akusatyokaga kwa babagwe ni mamagwe nikuja kulumbikana ni ŵamkwakwe ni kuŵa cilu cimo.” (Genesis 2:24) Acinangolo ŵawo mpaka aliwoneje kuti akwetepe ukumu pa wawojo atamose palombele. Jemanjaji mpaka asaceje kwinjilila ngani syejinji sya mu ulombela mwawo syangakusosecela kwinjilila.

Wawojo ni ŵamkwawo ni ŵakusosekwa kuŵecetana kuti aŵice malile pa yindu yampaka ajinjilileje jemanjajo, kaneko ni kwamanyisya yakamuleneyo nambo mwacinonyelo. Ŵasalile yeleyi mwakupikanika cenene, nambo ngaŵa mwamwano. (Miyambo 15:1) Kulinondiya, kulitimalika, soni kuwusimana mtima mpaka kwakamucisye kuti akamulaneje ni acanasi ŵawo, soni kwendelecela ‘kuwusimana mtima mwacinonyelo kwa jwine ni mjakwe.’—Aefeso 4:2.

YAMPAKA ATENDE:

• Naga akuyiwona kuti acanasi ŵawo akwinjilila mnope pa yindu ya mu liŵasa lyawo, aŵecetane ni ŵamkwawo ya nganiji pandaŵi jakuŵajilwa

• Akasajilecela ngani petala mpaka ali ayikene pakamulana cindu cimo