Mpela mwalijiganyicisye m’buku ajino, Baibulo jikwete malamusi gampaka gakamucisye wawojo ni liŵasa lyawo. Yehofa akusasaka kuti wawojo asangalaleje. Jwalakwe akusasala kuti naga wawojo akusalongosya kumlambila, ‘tacapa yine yosope yakuyilajila.’ (Matayo 6:33) Jwalakwe akusacilila mnope kuti wawojo aŵe mjakwe. Atendeje cilicose campaka akombole kuti alimbisye unasi wawo ni Mlungu. Welewu uli upile wekulungwa.—Matayo 22:37, 38.

YAJIKUSASALA BAIBULO: “‘Tinjiŵa atatigwenu, nipo jemanja timciŵa ŵanace ŵangu ŵacalume ni ŵacakongwe,’ akuti myoyo Ambuje ŵamacili gosope.” (2 Akolinto 6:18) Mlungu akusaka kuti wawojo aŵe mjakwe jwapamtima. Lipopelo mpaka lyakamucisye kuti aŵe najo paunasi wakulimba. Yehofa akwasalila kuti ‘apopeleje mwangalecesya.’ (1 Atesalonika 5:17) Jwalakwe ali jwakusacilila kupikana nganisyo syawo, soni yayikusalagasya nganisyo. (Afilipi 4:6) Naga akupopela pampepe ni liŵasa lyawo, wosope ŵene cacimanyilila kuti wawojo akusamnonyela Mlungu kusyesyene.

Konjecesya pa kuŵecetana ni Mlungu, akusosekwasoni kumpikanilaga. Mpaka ampikanileje mwakulijiganya Maloŵe gakwe, soni mabuku gagakusala ya m’Baibulo. (Salimo 1:1, 2) Aganicisyeje mwakusokoka yindu yalijiganyisyeyo. (Salimo 77:11, 12) Kusimanikwa pamisongano ja Ciklistu ndaŵi syosope kuli kumpikanilasoni Mlungu.—Salimo 122:1-4.

Litala line lyampaka lyakamucisye kulimbisya unasi wawo ni Yehofa lili kuŵeceta ni ŵane yakwamba jwalakwejo. Pakulimbicila kulalicila, cacilipikanaga kuti ali paunasi wakulimba ni jwalakwejo.—Matayo 28:19, 20.

YAMPAKA ATENDE:

• Lisiku lililyose akoleje ndaŵi jakuŵalanga Baibulo, soni kupopela

• Wosope mwiŵasa ayiwoneje yindu yausimu kuŵa yakusosekwa mnope kupunda ni yakusangalasya

YAJIKUSASALA BAIBULO: ‘Am’ŵandicile Mlungu, nipo ŵalakwe tacaŵandicila.’ (Yakobo 4:8) Akusosekwa kulinganya yakuti atendeje kulambila kwa peŵasa mwakutamilicika, ni kulinjililaga kukuya yalinganyisyeyo. (Genesis 18:19) Akusosekwasoni kulolecesya kuti yakusatenda lisiku lililyose yili yakamulana ni lisosa lya Mlungu. Alimbisyeje mkamulano wa wosope mwiŵasa ni Mlungu mwakuŵeceta ya jwalakwe ‘pakutama pasi m’nyumba mwawo, soni pakwenda petala, soni pakugona pasi, soni pakwimuka.’ (Deuteronomo 6:6, 7) Asimicisye mtima kuŵa mpela Yoswa juŵaŵecete kuti: “Kwa une ni ŵam’nyumba jangu, tucimtumicila Yehofa.”—Yoswa 24:15.

YAMPAKA ATENDE:

• Akoleje ndaŵi jakutamilicika jakulola yakusosecela ya mundu jwalijose mwiŵasa mwawo