Chikalata Chandanda Chakwawula kwa Akolinto 7:1-40
7 Sambano pakwamba ya yindu yimwalembele une yila, kuli chenene kuti jwamlume akamkwaya jwamkongwe.*
2 Nambo ligongo lya kuwanda kwa ndamo ja chikululu,* kuli chenene kuti jwamlume jwalijose akoleje ŵakongwe ŵakweŵakwepe soni jwamkongwe jwalijose akoleje ŵalume ŵakweŵakwepe.
3 Jwamlume apelecheje kwa ŵamkwakwe yakusaka* yawo, nombenajo jwamkongwe apelecheje kwa ŵamkwakwe yakusaka yawo.
4 Jwamkongwe nganakola machili pa chilu chakwe, nambo ŵamkwakwe ni ŵakwete machili pa chilu cha ŵakongwewo. Nombenajo jwamlume nganakola machili pa chilu chakwe, nambo ŵamkwakwe.
5 Mkakanyanaga, akaŵe naga mkamulene kuti mjimichile kwakandaŵi ni chakulinga chakuti mpate ndaŵi jakupopela, kuti kaneko mtamilejesoni pampepe. Mtendeje yeleyi kuti Satana akapitilisya kumlinga naga mkulepela kulikamula.
6 Nambope ngumsalila yeleyi mwakumpa ufulu wakusagula, ngaŵaga mwakumlamula.
7 Nambo nganonyele ŵandu wosope akaŵe mwambelele une. Nambope Mlungu ŵampele mundu jwalijose upile wakwe, jwine upile awu, jwinesoni upile winewo.
8 Sambano nguŵecheta kwa ŵele ŵanganaŵa peŵasa soni kwa achakongwe ŵamasije kuti, yikaŵele chenene kuti aŵe myoyo mpela mwambelele une.
9 Nambo naga akulepela kulikamula, alombele. Pakuŵa kuli chenene kuti alombele kulekangana ni kuti alajeje ni kumbila.
10 Kwa ŵele ŵali peŵasa ngwapa lilamusi lyakuti, ŵakongwe akalekangana ni ŵamkwawo. Jwanguŵecheta yeleyi ngaŵa une, nambo Ambuje.
11 Nambo naga akulekangana, atame myoyo ngalombedwa, naga iyayi awujilanesoni ni ŵamkwakwe. Soni jwamlume akalekangana ni ŵamkwakwe.
12 Nambo kwa ŵanewo, une, elo unejo, ngaŵaga Ambuje, ngumsalila kuti, naga jwamlume jwakulupilila akwete jwamkongwe jwangakulupilila soni jwamkongwejo akukunda kuti atameje najope, akamleka.
13 Nambosoni naga jwamkongwe akwete jwamlume jwangakulupilila soni jwamlumejo akukunda kuti atameje najo, akamleka jwamlumejo.
14 Pakuŵa jwamlume jwangakulupilila akusaŵaga jwamswela ligongo lya ŵamkwakwewo, soni jwamkongwe jwangakulupilila akusaŵaga jwamswela ligongo lya ŵalumewo. Yikaŵe kuti nganiyiŵa myoyo, nikuti ŵanache ŵenu akaŵele ŵangaswejela pameso pa Mlungu, nambo sambano ali ŵaswela.
15 Nambo naga jwangakulupililajo asagwile kutyoka,* atyoche. Pelepo, jwamlume kapena jwamkongwe jwakulupililajo nganaŵa jwakutaŵika. Pajatu Mlungu ŵamsagwile kuti mtameje mwamtendele.
16 Pakuŵa mmwe ŵakongwe, mkumanyilila uli, mwine chimchakulupusya ŵamkwenu. Soni mmwe ŵamlume, mkumanyilila uli, mwine chimchakulupusya ŵamkwenu.
17 Mwakamulana ni mtuka uŵapochele kutyochela kwa Yehofa, mundu jwalijose apitilisye kuŵa muŵaŵelele pandaŵi jiŵamŵilangaga. Yeleyi ni yangujisalila mipingo josope.
18 Naga pasikati penu pana mundu juŵamŵilasile ali jwamwumbale, atame jwamwumbale myoyo. Soni naga pasikati penu pana mundu juŵamŵilasile ali jwangawumbala, jwelejo akawumbala.
19 Kuwumbala kapena ngawumbala, yosopeyi yangali masengo. Nambo chindu chakusosekwa mnope ni kupikanila malamusi ga Mlungu.
20 Muŵaŵelele mundu jwalijose pandaŵi jiŵamŵilangaga, apitilisye kuŵa myoyo.
21 Ana ŵamŵilasile mli kapolo? Mkasimdandawula nayo yeleyo. Nambo naga upile wakumgopola upatikene, mwukamulichisye masengo.
22 Pakuŵa jwalijose juŵaliji kapolo pandaŵi jiŵamŵilangaga kuti ŵakuyeje Ambuje, mundu jwelejo ali mfulu* soni ali jwa Ambuje. Myoyosoni, jwalijose juŵamŵilasile ali mfulu, jwelejo ali kapolo jwa Klistu.
23 Jemanja ŵamsumile pamtengo wapenani, myoyo mleche kuŵa achikapolo ŵa ŵandu.
24 Achalongo achimjangu, mulimose muŵaŵelele mundu pandaŵi jiŵamŵilangaga, apitilisye kuŵa myoyo pameso pa Mlungu.
25 Pakwamba ŵele ŵanganaŵa peŵasa, nganingola lilamusi lililyose lyakutyochela kwa Ambuje. Nambo chinasalile nganisyo syangu, pakuŵa Ambuje ŵandendele chanasa kuti mbe jwakulupichika.
26 Nganisyo syangu ni syakuti, ligongo lya kusawusya kwa yindu, jwalijose apitilisye kutama mwaŵelele.
27 Ana mkwete ŵakongwe? Mkatanda kusosasosa matala gakuti mlekangane nawo. Ana nganimkola ŵakongwe? Mkatanda kusosasosa ŵakongwe.
28 Nambo atamose mli mlombele, ngamkulemwa. Soni naga mundu jwanganaŵa peŵasa akulombela, mundu jwelejo ngakulemwa. Nambope, ŵele ŵakulombela chachikola yakusawusya m’chilu mwawo. Myoyo, une ngwamba kusaka kuti namchenjele.
29 Nambosoni, ngumsalila jemanja achalongo achimjangu kuti, ndaŵi jajisigeleji jinandipe. Kutandila apano, wosope ŵakwete achakongwe aŵeje mpela ŵangali.
30 Nambosoni ŵandu ŵakulila aŵeje mpela ngakulila, ŵele ŵakusangalala aŵeje mpela ngakusangalala, ŵele ŵakusasuma yindu aŵeje mpela nganakola yindu,
31 soni ŵele ŵakuchikamulichisya masengo chilambochi aŵeje mpela ngakuchikamulichisya masengo mwakwanila, pakuŵa yakutendekwa ya pachilambopa yikuchenga.
32 Yosopeyitu ngumsalila ni chakulinga chakuti mkalagasikaga nganisyo. Jwamlume jwangalombela akusaganichisyaga yindu ya Ambuje, mnopemnope yampaka atende kuti ŵasangalasyeje Ambujewo.
33 Nambo jwamlume jwamlombele akusaganichisyaga yindu ya m’chilambo, mnopemnope yampaka atende kuti ŵasangalasyeje ŵamkwakwe,
34 soni akusaŵaga jwagaŵikangana. Nambosoni jwamkongwe jwangalombedwa soni mwali akusaganichisyaga yindu ya Ambuje, mnopemnope yampaka atende kuti aŵe jwamswela ku chilu chakwe soni kwa Mlungu. Nambo jwamkongwe jwamlombedwe akusaganichisyaga yindu ya m’chilambo, mnopemnope yampaka atende kuti ŵasangalasyeje ŵamkwakwe.
35 Ngumsalilatu yeleyi kuti yindu yimjendeleje chenene, ngaŵaga pakusaka kumtendekasya kuti mŵe ŵakutaŵika. Ngumsalila yeleyi kuti namtendekasye kutenda yakuŵajilwa soni kuti ndaŵi syosope mlipelecheje kwa Ambuje pali pangali chakusokonasya.
36 Nambo naga jwine akuyiwona kuti yikumsawusya kutama ngalombela, soni jupundile pa unyamata, jwalakwejo akusosekwa kutenda yakusakayo. Alombele, soni ngalemwa.
37 Naga jwine aganisisye yakuti ngakusaka kulombela soni asimichisye mumtima mwakwe nambosoni akukombola kulikamula, mpaka atame myoyo ngalombela soni chatende chenene.
38 Nambosoni jwalijose jwalombele atesile chenene, nambo jwele jwanganalombela atesile chenene mnope.
39 Jwamkongwe akusaŵa jwakulumbikana ni ŵamkwakwe pandaŵi josope jele ŵamkwakwewo ali chiŵela umi. Nambo naga ŵamkwakwewo awile, jwamkongwejo komboleka kulombedwa ni jwamlume jwakumsaka, nambo alombedwe mwa Ambuje.
40 Nambope jwamkongwejo mpaka aŵe jwakusangalala naga akutama ngalombedwasoni. Nganisyo syangu ni syelesi soni ndili jwakusimichisya kuti msimu wa Mlungu uli mwa une.
Maloŵe Gamwiŵanda
^ Gopolela kuti, jwamlume akagona ni jwamkongwe.
^ Mu Chigiliki akusati, por·neiʹa. Alole Kugopolela kwa Maloŵe Gane.
^ Pelepa akwamba gona ni ŵamkwawo.
^ Kapena kuti, “kumasya ulombela.”
^ Ŵane akusati “mlukosyo.”
