Atamose alinjelinje kuti liŵasa lyawo liŵeje lyakusangalala, nambo yindu yine yanganayijembeceya mpaka yitendece, yampaka yitendekasye kuti akasangalalaga. (Mlaliki 9:11) Mlungu mwacinonyelo akusatukamucisya patusimene ni yipwetesi. Naga akamulicisya masengo malamusi gakutulongola gakuyicisyaga, mpaka gakamucisye wawojo, soni ŵamwiŵasa mwawo kupilila atamose pasimene ni yipwetesi yekulungwa.

YAJIKUSASALA BAIBULO: “Mtule pa jwalakwejo yidandawulo yenu yosope, pakuti jwalakwejo ni jwakusamsamalila jemanja.” (1 Petulo 5:7) Ndaŵi syosope akumbucileje kuti ngatukusosekwa kumjimba magambo Mlungu ligongo lya yipwetesi yatukusimana nayo. (Yakobo 1:13) Jwalakwe tacakamucisya naga akum’ŵandicila. (Yesaya 41:10) “Amkusulile jwalakwe ya mumtima mwawo.”—Salimo 62:8.

Mpaka apatesoni citondoyo pakulijiganya Baibulo lisiku lililyose. Pakutenda yeleyi, caciyiwona kuti “Mlungu akusatulimbisya mitima mu yisawusyo yetu yosope.” (2 Akolinto 1:3, 4; Aloma 15:4) Jwalakwe akusatusalila kuti cacitupa “mtendele wa Mlungu, wele wuli wakupunda umanyilisi wosope wa ŵandu.”—Afilipi 4:6, 7, 13.

YAMPAKA ATENDE:

• Apopeleje kwa Yehofa kuti ŵakamucisye kuŵa ŵakutulala mtima, soni kuti aganisyeje cenene

• Awungunyesoni cenene nganisyo syawo ni kutenda yindu yampaka yakamucisye

YAJIKUSASALA BAIBULO: “Mtima wa mundu jwakupikanicisya ucimanyilila yindu, soni liwiwi lya mundu jwalunda licisacilila kumanyilila yindu.” (Miyambo 18:15) Amanyilileje yosope yakusosecela jwalijose mwiŵasa mwawo. Aŵecetaneje nawo, soni kwapikanila.—Miyambo 18:15.

Nambi uli naga jwakunonyelwa jwetu ajasice? Akajogopa kulosya mwakupikanila mumtima mwawo. Akumbucileje kuti atamose Yesu “ŵalisile.” (Yohane 11:35; Mlaliki 3:4) Kupumula, soni kugona mwakwanila kuli kwakusosekwa. (Mlaliki 4:6) Kutenda yeleyi mpaka kutukamucisye patusimene ni yipwetesi.

YAMPAKA ATENDE:

• Akole cisyoŵe cakuŵecetana ni ŵamwiŵasa mwawo mkanasimane ni yipwetesi. Yeleyi mpaka yakamucisye kuti caŵe ŵagopoka kuŵecetana nawo pasimene ni yipwetesi

• Aŵecetane ni mundu juŵasimene ni yipwetesi yakulandana ni yasimene nayo

YAJIKUSASALA BAIBULO: “Mjetu jusyesyene akusatunonyela ndaŵi syosope, soni jwalakwe ali m’bale juŵapagwile kuti atukamucisyeje patusimene ni yipwetesi.” (Miyambo 17:17) Acimjawo mpaka asace kwakamucisya wawojo nambo komboleka kuti ngaŵa mkumanyilila yampaka atende. Akusosekwa kwasalila yakusaka kuti ŵakamucisye. (Miyambo 12:25) Akusosekwasoni kupata cikamucisyo causimu kutyocela kwa ŵandu ŵakusajipikanicisya Baibulo. Cikamucisyo cakutyocela m’Baibulo campaka ŵape mpaka cakamucisye mnope.—Yakobo 5:14.

Cikamucisyo cakusosecela mpaka acipate naga akusakunguluka ni ŵandu ŵakusamkulupilila Mlungu yisyesyene, soni ŵakusakulupilila yacacitenda m’bujo muno. Kulimbikasya ŵandu ŵali pa yipwetesi, kucakamucisyasoni wawojo kuti aŵe ŵakulimba pali payipwetesi. Ŵasalile yakusakulupilila, soni yacacitenda Yehofa msogolo. Aŵe ŵamtawu pakwakamucisya ŵandu ŵakusosekwa cikamucisyo cawo, soni akalisapulaga pasikati pa ŵandu ŵakusiŵanonyela soni ŵakusasamala ya wawojo.—Miyambo 18:1; 1 Akolinto 15:58.

YAMPAKA ATENDE:

• Am’ŵende mjawo jwapamtima kuti ŵakamucisye

• Amsalile cilicose cakusosecela