Ki te kau Loma 12:1-21
12 Tela la, e fakamalosi atu au ki a koutou e auala i te alofa atafai o te Atua, e oku taina, ke ofo atu otou foitino+ ke fai mo taulaga ola, e tapu+ kae talia ne te Atua, se taviniga tapu mai te fakaaogaga o te malosi o otou mafaufau.+
2 Kae fakagata te fakaakoako ki te olaga masani tenei, kae ke ‵fuli otou mafaufau,+ ko te mea ke fakatalitonu aka ne koutou+ me se a te loto o te Atua telā e gali, e logomalie, kae e ‵lei katoatoa.
3 Me e auala i te alofa tauanoa telā ne tuku mai ki a au, ko fai atu ei au ki tino taki tokotasi katoa i a koutou ke mo a ma tō fakatāua ne se tino a ia eiloa,+ kae ke mafaufau ke maua ne ia se mafaufau ‵lei, e ‵tusa mo te vaega o te fakatuanaki telā ne tuku atu ne te Atua ki a koutou taki tokotasi.+
4 Me e pelā eiloa mo te uke o vaega kese‵kese i loto i te foitino e tasi,+ kae e se tasi fua te galuega e fai ne vaega katoa konei,
5 e tiga eiloa e tokouke tatou kae e tasi fua te foitino i te ‵kau fakatasi mo Keliso, kae ko tatou taki tokotasi e fakalagolago te suā tino ki te suā tino.+
6 Tela la, ona ko te kese‵kese o meaalofa ne maua ne tatou e ‵tusa mo te alofa tauanoa ne tuku mai ki a tatou,+ kafai ko valoaga, ke na ‵valo atu tatou e ‵tusa mo te vaega o te ‵tou fakatuanaki;
7 io me kafai ko te galuega talai, ke na ga‵lue tatou i ei, io me ko te tino telā e akoako, ke na akoako atu eiloa a ia;+
8 io me ko te tino telā e fakamalosi, ke na tuku atu ne ia a fakamalosiga;+ ko te tino telā e tufa atu ana mea, ke na fai ne ia te mea tenā mo te kaimalie;+ ko te tino telā e tausi, ke na fai faka‵lei ne ia te mea tenā;+ ko te tino telā e fakaasi atu te alofa fakamagalo, ke na fai ne ia te mea tenā mo te loto fiafia.+
9 Ke se a‵lofa fakaloi‵loi koutou.+ Takalia‵lia ki mea ma‵sei;+ kae puke ‵mau ki mea ‵lei.
10 Ke fakatau a‵lofa koutou i te alofa fakataina te suā tino ki te suā tino. Ke mua o fakaasi atu te āva o te suā tino ki te suā tino.+
11 Ke ga‵lue malosi kae sa paie.+ Ke faka‵fonu koutou ki te agaga tapu.+ Ke pologa mō Ieova.+
12 Ke fia‵fia ki te otou fakamoemoega. Ke kufaki i puapuaga.+ Tumau faeloa i te ‵talo.+
13 Fesoasoani ki tino tapu e ‵tusa mo mea e ma‵nako latou ki ei.+ Fakatumau te uiga talimalo.+
14 Fakamanuia atu faeloa ki a latou kolā e fakasaua mai;+ fakamanuia atu kae sa fetūgina latou.+
15 Ke fia‵fia fakatasi mo latou kolā e fia‵fia; kae ‵tagi fakatasi mo latou kolā e ‵tagi.
16 Ke ‵pau otou kilokiloga ki nisi tino e pelā mo koutou ki a koutou eiloa; ke mo a ma tuku otou mafaufau ki mea ma‵luga,* kae ke maua ne koutou te loto maulalo.+ Sa fia ‵poto koutou.+
17 Sa taui atu te masei ki te masei.+ Mafaufau me se a te mea ‵lei i te kilokiloga a tino katoa.
18 Fai te mea e mafai o fai ne koutou ke tausi te filemu i te va o koutou mo tino katoa.+
19 Aku fagasele, sa taui ma sui, kae tuku atu eiloa ki te kaitaua o te Atua,+ me ne tusi mai penei: “I a aku te taui ma sui. Ka toe ‵togi atu ne au, ko muna a Ieova.”+
20 Kae “kafai e fiakai tou fili, fagai atu a ia; kafai e fiainu, fainu atu a ia; me i te faiga o mea konei ka ‵luku atu ei ne koe a malala ‵ka ki luga i tena ulu.”+
21 Ke se fakatakavale koe ne te masei, kae ke fakatakavale faeloa a te masei ki te ‵lei.+
Fakamatalaga mai lalo
^ Io me “‵toki a manatu fia ‵poto.”