Failauga 3:1-22
3 E isi se taimi tonu mō mea katoa,Se taimi mō mea katoa e fai mai lalo o te lagi:
2 Se taimi e fa‵nau mai ei mo te taimi e ‵mate ei;Se taimi e ‵toki ei a lakau mo te taimi e unu ei a mea ne ‵toki;
3 Se taimi e tamate ei a tino mo te taimi e faka‵lei ei;Se taimi e ofa ei ki lalo mo te taimi e ati aka ei;
4 Se taimi ke ‵tagi mo te taimi ke ‵kata;Se taimi ke ‵tagi mautuutu mo te taimi ke ‵saka;
5 Se taimi ke ‵pei kea‵tea ei a fatu mo te taimi ke ‵luku fakatasi ei a fatu;Se taimi ke ‵sai tasi mo te taimi ke se ‵sai tasi;
6 Se taimi ke salasala mo te taimi ke tuku ei me ko galo;Se taimi ke tausi mo te taimi ke ‵pei kea‵tea;
7 Se taimi ke saesae+ mo te taimi ke ‵sui fakatasi;Se taimi ke nofo ‵mu+ mo te taimi ke faipati;+
8 Se taimi o te alofa mo te taimi o te takalialia;+Se taimi o te taua mo te taimi o te filemu.
9 Se a te mea e maua ne te tino galue mai i ana taumafaiga katoa?+
10 Ko oti ne lavea ne au a te galuega ne tuku atu ne te Atua ki tama a tāgata ke fai ei latou ke fakalave‵lave.
11 Ne fai ne ia a mea katoa ke ‵gali i te taimi tonu.+ Ko oti foki ne tuku atu ne ia a te se-gata-mai ki olotou loto; kae ka se mafai eiloa o iloa ne tino a te galuega ne fai ne te Atua tonu mai te kamataga ke oko eiloa ki te fakaotiga.
12 Ko oti ne fakaiku aka ne au me e seai se mea e ‵lei atu mō latou i lō te fia‵fia kae fai a te mea ‵lei i olotou olaga,+
13 kae e ‵tau foki mo tino katoa o ‵kai kae inu kae maua te fiafia mai i olotou galuega ‵mafa katoa. A te mea tenā ko te meaalofa mai i te Atua.+
14 Ko oti ne iloa aka ne au me i mea katoa ne fai ne te Atua tonu ka tumau ki te se-gata-mai. E seai se mea e fakaopoopo ki ei kae seai se mea e toese mai i ei. Ne fai eiloa ne te Atua i te auala tenei, ko te mea ke ma‵taku a tino ki a ia.+
15 So se mea e tupu ko oti eiloa ne tupu, kae ko te mea ka oko mai ko oti eiloa ne oko mai;+ kae ko te Atua tonu e salasala ki mea ko oti ne kausaki ki ei.*
16 Ko oti foki ne lavea ne au te mea tenei i lalo o te la: I te koga o te fai mea tonu e isi i ei a te amio masei, kae i te koga o te amiotonu e isi i ei a te amio masei.+
17 Ne fai ifo au i toku loto: “A te Atua tonu ka fakamasino ne ia a tino amio‵tonu mo tino amio ma‵sei,+ me e isi se taimi mō mea katoa mo faifaiga katoa.”
18 Ne fai ifo foki au i toku loto e uiga ki tama a tāgata me i te Atua tonu ka tofotofo ne ia latou kae fakaasi atu ki a latou me e ‵pau latou mo manu,
19 me e isi se ikuga o tino mo te ikuga o manu; e ‵pau katoa te lotou ikuga.+ Kafai e mate te mea e tasi, e mate foki te suā mea; kae e tasi te agaga* o latou katoa.+ Tela la, a te tagata e se maluga atu i te manu, me i mea katoa e seai ne aoga.
20 E olo atu a mea katoa ki te koga e tasi.+ Ne o‵mai katoa latou mai te ‵pefu,+ kae ka toe ‵foki atu katoa latou ki te ‵pefu.+
21 Ko oi e iloa ne ia i agaga* o tino e olo aka ki luga, kae ko agaga o manu e olo ifo ki lalo i te laukele?+
22 Kae ne lavea ne au me e seai se mea e ‵lei atu i lō te mauaga ne se tagata te fiafia i tena galuega,+ me tenā eiloa tena taui;* me ko oi e mafai o fai ne ia ke lavea ne tou tagata a te mea ka tupu māfai ko galo atu a ia?+
Fakamatalaga mai lalo
^ Io me kāti, “ko mea kolā ko ‵galo atu.”
^ Io me “te malosi o te ola.”
^ Io me “te malosi o te ola.”
^ Io me “vaega.”
