Faataoto 26:1-28
26 E pelā mo te kiona i te tau vela mo te vaiua i te taimi e ‵kati ei a saito,E penā eiloa te sē fetaui ke fakaaloalo atu ki se tino valea.+
2 E isi se pogai e lele ei kea‵tea a te manu eva kae eva a te manu ko te sualou,E penā foki eiloa a pati fetū e se sona oko mai e aunoa mo se pogai tonu.
3 A te ‵kini ne fai mō te solofanua, a te fagutu ne fai mō te asini,+Kae ko te lakau e ‵kini ki ei a tua o tino va‵lea.+
4 Ke mo a ma tali atu ki se tino valea e ‵tusa mo tena fakavalevale,Ko te mea ke se fai ei ke ‵pau tou tulaga mo ia.
5 Tali atu ki te tino valea e ‵tusa mo tena fakavalevale,Ko te mea ke mo a ma mafaufau i a ia e poto.+
6 E pelā mo te tino e fai ne ia ke ‵pili ana vae kae fakalogo‵mae ne ia a ia eiloaE penā foki a te tino e tuku atu ne ia a mea ki se tino valea.
7 E pelā mo vae o se tino ‵pili telā e ketuketu,E penā eiloa a te faigamuna i gutu o tino va‵lea.+
8 E pelā mo te ‵sai atu o se fatu ki se siligi,E penā eiloa a tavaega e tuku atu ki se tino valea.+
9 E pelā mo se lakau talatala i lima o se tino vale,E penā eiloa a te faigamuna i gutu o tino va‵lea.
10 E pelā mo te tino sana matasana telā e fakapakia ne ia so se mea,*E penā eiloa a te tino e fakagalue ne ia se tino valea io me ko latou kolā e olo atu i ana tafa.
11 E pelā me se kuli e toe foki ki ana luaga,A te tino valea e toe fai eiloa ne ia tena mea valea.+
12 Kai lavea aka loa ne koe se tagata e mafaufau i a ia e poto?+
E lasi atu te fakamoemoega e maua ne se tino valea i lō te tino tenā.
13 Muna a te tino paie: “E isi se leona i te auala,Se leona i te malae o te fakai!”+
14 A te mataloa e miomio eiloa i luga i ana inisisi,Kae ko te tino paie i luga i tena moega.+
15 A te tino paie e tanu ana lima i loto i se pōla fai meakai,Kae ko tō fi‵ta a ia ma tapale mai ki tua o tuku ki tena gutu.+
16 A te tino paie e mafaufau me e poto atu a iaI lō tino e tokofitu kolā e tuku mai ne latou se tali ‵lei.
17 E pelā me se tino e puke ki taliga o se kuliE penā eiloa te tino e ui atu i konā kae kaitaua malosi ki* te kinauga a te suā tino.+
18 E pelā me se tagata fakavalevale telā e sana ne ia a matasana ‵ka, matasana, mo te mate
19 Ko te tagata e fakaloiloi ne ia tena tuakoi kae fai atu, “Au e fai fa‵kata fua!”+
20 Kafai e seai ne fafie, ko mate ei te afi,Kafai e seai se tino gutu fatufatu, e seai ne kinauga.+
21 E pelā eiloa mo malala mō te malala ‵ka mo fafie mō te afi,E penā foki a te fai ne te tagata kaitaua ke lasi te kinauga.+
22 A pati a se tino gutu fatufatu e pelā me ne meakai ‵gali;E vave folo ki loto i te tinae.+
23 E pelā mo mea fakagaligali siliva e faka‵piki ki luga i se mea e faite ki te keleE penā eiloa a pati fakaalofalofa e māfua mai i se loto telā e masei.+
24 A te tino e takalialia ki nisi tino e ‵funa ne ia te mea tenā ki ana laugutu,Kae e ita fakamoemoe a ia i tena loto.
25 E tiga loa e faipati a ia i se auala gali, ke mo a ma talitonu ki a ia,Me e fitu a mea fakatakalialia i tena loto.*
26 E tiga eiloa e ‵funa aka a tena takalialia e auala i amioga fakaloiloi,Ka fakaasi faka‵sau atu tena amioga matagā i loto i te fakapotopotoga.
27 A te tino e keli ne ia se lua ka tō foki eiloa a ia ki loto i ei,Kae ko so se tino e fakateka kea‵tea ne ia se fatu—ka toe foki mai eiloa te fatu tenā ki a ia.+
28 A te gutu loi e takalialia ki a latou kolā ne tuki pala ne ia,Kae ko te gutu fakamatamata e māfua mai i ei a fakamaseiga.+
Fakamatalaga mai lalo
^ Io me “e fakapakia ne ia a tino katoa.”
^ Io me kāti, “e aofia i.”
^ Io me “Me i tena loto se mea fakatakalialia eiloa.”
