Failauga 7:1-29
7 A te igoa ‵lei* e ‵lei atu i lō te sinu ‵lei,+ kae ko te aso e mate ei se tino e ‵lei atu i lō te aso ne fanau mai ei a ia.
2 E ‵lei atu ke fano ki te fale e fanoa‵noa ei a tino i lō te fale o fakafiafiaga,+ me tenā te ikuga o tāgata katoa, kae e ‵tau mo tino ola o tausi a te mea tenei i olotou loto.
3 E ‵lei atu te fanoanoa i lō te katakata,+ me i te mata fanoanoa e fai i ei ke ‵lei te loto.+
4 A te loto o te tino poto e nofo i te fale e fanoa‵noa ei a tino, kae ko te loto o te tino valea e nofo i te fale o fakafiafiaga.+
5 E ‵lei atu ke fakalogologo ki pati polopoloki a se tagata poto+ i lō te fakalogologo ki te pese a tino va‵lea.
6 E pelā mo te pake‵ke mai o lakau tala‵tala kolā ko ‵ka i lalo o se ulo, e penā eiloa te katakata a te tino valea;+ kae ko te mea foki tenei e seai se aoga.
7 Kae ko fakasauaga e mafai o fai ei te tino poto ke fakavalevale, kae ko te ‵togi fakakolekole e mafai o fakamasei ei te loto.+
8 E ‵lei atu a te fakaotiga o se mea i lō te kamataga. E ‵lei atu ke kufaki i lō te loto fakamaualuga.+
9 Ke mo a ma ita vave,+ me i te ita vave e nofo i fatafata o tino va‵lea.+
10 Ke mo a ma fai aka, “Kaia e ‵lei atu ei a aso mua i lō aso nei?” me ne fesili mai ne koe te mea tenei e aunoa mo te poto.+
11 A te poto fakatasi mo se tofi se mea ‵lei kae e aoga ki a latou kolā e lavea ne latou te mainaga o te ao.*
12 Me i te poto se puipuiga+ e pelā eiloa mo tupe se puipuiga,+ kae tenei te aoga o te iloaga: A te poto e tausi ne ia tena matai ke ola.+
13 Mafaufau ki galuega a te Atua tonu, me ko oi e mafai o faka‵tonu ne ia a mea ko oti ne fai ne ia ke ‵piko?+
14 I se aso ‵lei, ke fakaasi atu te aga‵lei tenei,+ kae i te aso o te puapuaga,* ke masaua me ne faite ne te Atua a te aso tenei e pelā foki te suā aso,+ ko te mea ke se mautinoa i tino a te mea telā ka tupu ki a latou i aso mai mua.+
15 I aso o toku olaga sē aoga+ ne lavea ne au i ei a mea katoa—mai te tino amiotonu telā ko mate i tena amiotonu+ ki te tino amio masei telā e ola leva faitalia ana mea ma‵sei ne fai.+
16 Ke mo a ma tō fia amiotonu,+ io me fakaasi atu te lasi o tou poto.+ Kaia e aumai ei ne koe te fakamaseiga ki a koe eiloa?+
17 Ke mo a ma tō amio masei, io me fakavalevale.+ Kaia e ‵tau ei koe o mate kae koi tuai o oko ki tou taimi?+
18 E sili atu i te ‵lei ke puke ‵mau ki te fakatonuga e tasi kae ke mo a ma tiaki ne koe te suā fakatonuga;+ me i te tino e mataku ki te Atua ka fakalogo ki te avā mea konā.
19 A te poto e fai ne ia te tagata ke malosi atu i lō tāgata e tokosefulu i loto i se fakai.+
20 Me e seai se tagata amiotonu i te lalolagi e fai faeloa ne ia te mea ‵lei kae e se agasala.+
21 Ke mo a foki ma tausi i tou loto a pati katoa e fai ne tino;+ i te mea ma lagona ei ne koe tau tavini e faipati sē ‵lei e uiga ki a koe;
22 me iloa ‵lei ne koe i tou loto me e uke foki a taimi ne faipati sē ‵lei ei koe e uiga ki nisi tino.+
23 A mea katoa konei ne tofotofo ne au ki te poto, kae ne fai aka au: “Au ka poto.” Kae e seki oko eiloa au ki ei.
24 A te mea ko oti ne tupu e se mafai o oko ki ei kae e ‵poko ‵ki. Ko oi e mafai o malamalama i ei?+
25 Ne fakatonu ne au toku loto ke iloa kae ke iloilo kae ke sukesuke ki te poto mo te uiga o mea, kae ke malamalama i te masei o te valea mo te sē aoga o te fakavalevale.+
26 Tenā ne iloa aka ei ne au te mea tenei: A te fafine telā e fai pelā me se matasele a te tino tuli manu e sili atu tena masei i lō te mate, e fai tena loto e pelā me se tili, kae ko ana lima e fai pelā me ne filifili o te falepuipui. A te tino e fakafiafia ne ia te Atua tonu ka sao mai i tou fafine,+ kae ko te tino agasala ka ‵poa aka ne tou fafine.+
27 “Kiloke, tenei te mea ne maua ne au,” ko pati a te failauga.+ “Ne iloilo ne au a te mea e tasi mai tua o te suā mea ke maua ne au se ikuga,
28 kae ko te mea ne ‵sala faeloa au ki ei, ne seki maua ne au. E tokotasi te tagata* ne maua ne au mai te tokoafe, kae seai se fafine ne maua ne au mai i a latou.
29 Tenei te mea e tasi ne maua ne au: Ne fai ne te Atua tonu a tino ke fai te mea tonu,+ kae ne ‵sala atu fua latou ki togafiti e uke.”+
Fakamatalaga mai lalo
^ Io me “A te ata ‵lei.”
^ Telā ko latou kolā e ola.
^ Io me “malaia.”
^ Io me “tagata fai mea tonu.”