Faataoto 10:1-32
10 Ko faigamuna a Solomona.+
A te tamaliki poto e fakafiafia ne ia tena tamana,+Kae ko te tamaliki valea e fakafanoanoa ne ia tena mātua.
2 A koloa e maua e auala i amioga ma‵sei ka se aoga,Kae ko te amiotonu e fakasao ei mai te mate.+
3 Ka se fai ne Ieova a te tino amiotonu ke fiakai,+Kae ka se talia ne ia a mea e ma‵nako malosi ki ei a tino amio ma‵sei.
4 A lima e se gasue‵sue ka māfua mai i ei te mativa,+Kae ko lima e ga‵lue malosi e aumai i ei te maumea.+
5 A te tama tagata telā e gasuesue mo te ‵loto o te malamalama e fakaputu aka ana fuataga i te taimi o te tau ‵vela,Kae ko te tama tagata telā e ‵nau tena moe i te taimi e tau ei a fuataga e aumai ne ia te masiasi ki a ia eiloa.+
6 A fakamanuiaga e i luga i te ulu o te tino amiotonu,+Kae ko te gutu o te tino amio masei e ‵funa ne ia a amioga fakasaua.
7 A fakamasausauga o te tino amiotonu se fakamanuiaga,+Kae ko te igoa o te tino amio masei ka pala eiloa.+
8 A te tino telā e poto tena loto, ka talia ne ia a fakatonuga,+Kae ko te tino e faipati mo te valea ka lakalaka ki lalo.+
9 A te tino e sasale mo te fakamaoni ka sasale i te tokagamalie,+Kae ko te tino e fakapikopiko ne ia ana auala ka ‵poa aka eiloa.+
10 A te tino e fakakivi tena mata mo te faitogafiti e maua ne ia te fanoanoa,+Kae ko te tino e faipati mo te valea ka lakalaka ki lalo.+
11 A te gutu o te tino amiotonu ko te pogai o te ola,+Kae ko te gutu o te tino amio masei e ‵funa ne ia a amioga fakasaua.+
12 A te takalialia e fakatupu i ei a kinauga,Kae ko te alofa e ufi ne ia a mea ‵se katoa.+
13 A te poto e maua i laugutu o te tino e atamai i te faiga o faka‵tauga ‵lei,+Kae ko te lakau e ‵kini ki ei te tua o te tino e se lava te faka‵tau.+
14 A tino ‵poto e tausi faka‵lei ne latou a te iloaga,+Kae ko te gutu o te tino valea e ‵kami mai ne ia a te fakamaseiga.+
15 A koloa o te tagata maumea ko tena fakai malosi.
A te fakamaseiga a tino ma‵tiva ko te lotou mativa eiloa.+
16 A faifaiga a te tino amiotonu e takitaki atu ei ki te ola;Kae ko fuataga a te tino amio masei e takitaki atu ei ki te agasala.+
17 A te tino e tautali atu i polopolokiga ko te auala ki te ola,Kae ko te tino e manatu māmā ki polopolokiga ‵mafa e takitaki fakaa‵tea ne ia a nisi tino.
18 A te tino e ‵funa ne ia tena takalialia e faipati ki te loi,+Kae ko te tino e fakasalalau atu ne ia a lipoti ma‵sei* e valea.
19 Kafai e uke a pati, e se mafai o fakaseke i ei mai amioga solitulafono,+Kae ko so se tino e pule atu ki ana laugutu e gasuesue mo te poto.+
20 A te alelo o te tino amiotonu e pelā mo te ‵toe siliva ‵lei,+Kae ko te loto o te tino amio masei e foliki tena aoga.
21 A laugutu o te tino amiotonu e fagai* ne ia a tino e tokouke,+Kae ko te tino valea e mate ona ko te sē ‵lei o tena mafaufau.+
22 Ko te fakamanuiaga a Ieova e fai ei te tino ke maumea,+Kae seai se ‵mae* e fakaopoopo atu ne Ia ki ei.
23 A te aofia i amioga fakamasiasi e fai pelā me se tafaoga ki te tino valea,Kae ko te poto e maua ne te tagata e atamai i te faiga o faka‵tauga ‵lei.+
24 A te mea telā e mataku ki ei te tino amio masei ka oko atu ki a ia;Kae ko te manakoga o te tino amiotonu ka tuku atu ki a ia.+
25 Kafai ko seke te afā, ko galo atu ei te tino amio masei,+Kae ko te tino amiotonu ko te fakavae ki te se-gata-mai.+
26 E pelā mo vinika i ou nifo mo te au i ou mata,E penā eiloa a te tino paie ki te tino telā e uga mai ne ia a ia.*
27 A te mataku ki a Ieova e fakaloa ne ia te ola,+Kae ko tausaga o tino amio ma‵sei ka ‵kati ‵mutu.+
28 A te mea e fakamoe‵moe ki ei a tino amio‵tonu e aumai ei te fiafia,+Kae ko te fakamoemoega o tino amio ma‵sei ka galo atu.+
29 A te auala o Ieova se ‵pui malosi ki te tino amio ‵lei,+Kae ko te fakamaseiga ki tino amio matagā.+
30 A te tino amiotonu ka se mafai eiloa o siga,+Kae ko te tino amio masei ka se toe nofo eiloa i te lalolagi.+
31 A te gutu o te tino amiotonu e maua mai i ei te poto,Kae ko te alelo fakaloiloi ka ‵kati kea‵tea.
32 A laugutu o te tino amiotonu e iloa ne ia a te mea fakafiafia,Kae ko te gutu o te tino amio masei e loi.
Fakamatalaga mai lalo
^ Io me “tala sē ‵tonu.”
^ Io me “takitaki.”
^ Io me “fanoanoa; mea faigata.”
^ Io me “ki tena tino fakagalue.”