Faataoto 15:1-33
15 A te tali atu mo te filemu e fai ei ke galo te kaitaua,+Kae ko pati ‵mafa* e fakamalosi aka i ei te kaitaua.+
2 A te gutu o te tino poto e fakaaoga faka‵lei ne ia te iloaga,+Kae ko te gutu o te tino valea e fai atu ne ia a mea va‵lea.
3 A mata o Ieova e oko atu ki koga katoa,E kilokilo ki mea ma‵sei mo mea ‵lei.+
4 A te gutu telā e filemu se lakau o te ola,+Kae ko pati sē ‵lei e māfua mai ei te fanoanoa.
5 A te tino valea e se āva ki polopolokiga a tena tamana,+Kae ko te tino atamai e talia ne ia a pati fakatonutonu.*+
6 E uke a koloa i te fale o te tino amiotonu,Kae ko mea e maua* mai i te tino amio masei e aumai i ei a fakalavelave ki a ia.+
7 A laugutu o tino ‵poto e fakasalalau atu i ei te iloaga,+Kae e se fai penā te loto o te tino valea.+
8 A te taulaga a te tino amio masei se mea fakatakalialia ki a Ieova,+Kae ko te ‵talo a te tino fai mea tonu se mea fakafiafia ki a Ia.+
9 E takalialia a Ieova ki te auala o te tino amio masei,+Kae e alofa a ia ki te tino e kausaki ki te amiotonu.+
10 A polopolokiga e foliga ma‵sei* ki te tino e tiaki ne ia te auala,+Kae ko so se tino e takalialia ki polopolokiga ‵mafa ka mate.+
11 A te Tanuga* mo te koga o fakaseaiga* e lavea faka‵lei eiloa ne Ieova.+
Kae e sili atu la i ei a loto o tāgata!+
12 A te tino fakatauemu e se alofa ki te tino e fakatonutonu* atu ki a ia.+
Ka se ‵sala atu a ia ki te fesoasoani mai i tino ‵poto.+
13 A te loto fiafia e fai ei ke mata fiafia se tino,Kae ko te loto mafatia e tuki palapala ne ia te agaga.+
14 A te loto malamalama e ‵sala ki te iloaga,+Kae ko te gutu o te tino valea e kai* ki te valea.+
15 A aso katoa o te tino puapuaga e ma‵sei,+Kae ko te tino e loto fiafia* e tumau eiloa i te fai ‵kaiga.+
16 E ‵lei atu ke mu‵tana a mea e maua ona ko te mataku ki a Ieova+I lō te mauaga o koloa e uke fakatasi mo te manavase.*+
17 E ‵lei atu se pōla vesiapolo i se koga e isi se alofa i ei+I lō se pulumakau putaputa* i se koga e isi ne takalia‵liaga i ei.+
18 A te tagata mata itaita e faka‵tupu ne ia a taua,+Kae ko te tino e tuai o ita e faka‵noga ne ia se kinauga.+
19 A te auala o te tino paie e pelā me se ‵pui lakau talatala,+Kae ko te ala o te tino fai mea tonu e pelā me se auala laugatasi.+
20 A te tamaliki poto e fai ne ia tena tamana ke fiafia,+Kae ko te tagata valea e takalialia ki tena mātua.+
21 A te valea se mea fakafiafia ki se tino e se lava te faka‵tau,+Kae ko te tagata e atamai i te faiga o faka‵tauga ‵lei e sasale ‵tonu eiloa.+
22 A palani e se taunu māfai e se fai‵pati faka‵lei* ki ei,Kae ka taunu eiloa a palani e auala i tino fakatonutonu e tokouke.+
23 A te tagata e fiafia māfai e tuku atu ne ia te tali tonu,*+Kae ko te pati e faipati atu i te taimi tonu—ko oko eiloa i te ‵lei!+
24 A te tino telā e ‵loto tena malamalama e fanaka i te ala ki te ola,+Ko te mea ke ‵kalo kea‵tea a ia mai te Tanuga* i lalo.+
25 Ka ofa ki lalo ne Ieova a te fale o te tino fakamaualuga,+Kae ka faka‵tonu ne ia te tuakoi o te fafine ko mate tena avaga.+
26 E takalialia eiloa a Ieova ki togafiti a te tino amio masei,+Kae ko pati ‵gali e ‵ma ki a Ia.+
27 A te tino e maua ana tupe silia i se auala sē tonu e aumai ne ia a fakalavelave* ki tena kāiga,+Kae ko te tino e takalialia ki ‵togi fakakolekole ka tumau i te ola.+
28 A te loto o te tino amiotonu e mafaufau ‵loto kae koi tuai o tali atu,*+Kae ko te gutu o te tino amio masei e fai atu i ei a mea ma‵sei.
29 A Ieova e ‵mao ‵ki mai tino amio ma‵sei,Kae lagona ne ia a te ‵talo a tino amio‵tonu.+
30 A mata fia‵fia e fai ei te loto ke fiafia;A te lipoti ‵lei e fakamalosi i ei a ivi.*+
31 A te tino e fakalogo ki polopolokiga ‵mafa kolā e maua i ei te olaE ‵nofo fakatasi eiloa mo tino ‵poto i te fale.+
32 So se tino e ita ki polopolokiga e takalialia ki tena ola,+Kae ko so se tino e fakalogo ki polopolokiga ‵mafa e maua ne ia te malamalama.*+
33 A te mataku ki a Ieova se akoakoga o te poto,+Kae e mua mai a te loto maulalo i te ‵malu.+
Fakamatalaga mai lalo
^ Io me “fakalogo‵mae.”
^ Io me “polopolokiga ‵mafa.”
^ Io me “peofuga.”
^ Io me “faigata.”
^ Io me “mo Apatoni.”
^ Io me “polopoloki ‵mafa.”
^ Io me “kausaki.”
^ Io me “‵lei.”
^ Io me “‵numi.”
^ Epelu, “ne fagai i se tali fagai manu.”
^ Io me “faipatiga ‵funa.”
^ Epelu, “ki te tali mai i tena gutu.”
^ Io me “te masiasi.”
^ Io me “e mafaufau faka‵lei ki te auala ke tali atu ei; e mafaufau muamua kae koi tuai o faipati.”
^ Epelu, “e fai ei a ivi ke puta‵puta.”
^ Epelu, “loto.”
