E masani o taku ne te Tusi Tapu a Iesu ki “te Tama a te Atua.” (Ioane 1:49) A te tugapati ko te “Tama a te Atua” e fakaasi mai i ei me i te Atua ko te Mafuaga, io me ko te Pogai o te ola o tino katoa, e aofia i ei a Iesu. (Salamo 36:9; Fakaasiga 4:11) E se akoako mai te Tusi Tapu me ne fai te Atua mo fai se tamana tonu ki se tamaliki i te auala e faka‵fua ei ne tino a tama‵liki.

E taku foki i te Tusi Tapu a agelu me ko “tama tāgata a te Atua tonu.” (Iopu 1:6) Kae fai mai foki te Tusi Tapu me i te tagata muamua, ko Atamu, ko “te tama a te Atua.” (Luka 3:38) Kae ona ko Iesu ko te mea muamua ne faite tokotasi eiloa ne te Atua, e fakasino te Tusi Tapu ki a Iesu e pelā me ko te ‵toe Tama sili a te Atua.

•  E mata, ne nofo a Iesu i te lagi a koi tuai o fanau mai i te lalolagi?

•  Ne a mea ne fai ne Iesu a koi tuai o vau ki te lalolagi?

Ao. Ne fai a Iesu pelā me se tino faka-te-agaga i te lagi a koi tuai o fanau mai pelā me se tino i te lalolagi. Ne fai mai foki eiloa a Iesu: “Au ne fanaifo mai te lagi.”—Ioane 6:38; 8:23.

Ne faite ne te Atua a Iesu a koi tuai o faite a nisi mea katoa. E fai mai te Tusi Tapu e uiga ki a Iesu, penei:

• “A ia . . . ko te uluaki o mea katoa ne faite.”—Kolose 1:15.

• A ia “ko te kamataga o mea kolā ne faite ne te Atua.”—Fakaasiga 3:14.

Ne fakataunu ne Iesu te valoaga e uiga ki te tino telā “ne māfua mai i aso mua, mai i aso mua eiloa.”—Mika 5:2; Mataio 2:4-6.

Ne maua ne ia se tulaga maluga i te lagi. Ne fakasino atu a Iesu ki te tulaga tenei i te taimi ne ‵talo atu ei a ia: “Tamana, ke faka‵malu ne koe au i ou tafa e pelā eiloa mo te ‵malu telā ne maua ne au i ou tafa kae koi tuai o faite te lalolagi.”—Ioane 17:5.

Ne fesoasoani atu a ia ki tena tamana i te faitega o nisi mea katoa. Ne galue a Iesu i tafa o te Atua e pelā me “se tufuga apo i te faite mea.” (Faataoto 8:30) E fai mai te Tusi Tapu e uiga ki a Iesu: “Ne faite a nisi mea katoa i te lagi mo te lalolagi e auala i a ia.”—Kolose 1:16.

Ne galue te Atua e auala i a Iesu i te faitega o nisi mea katoa. E aofia i nisi mea konei a tino faka-te-agaga, e pelā foki mo te iunivesi. (Fakaasiga 5:11) I nisi fakamatalaga, a te ga‵lue fakatasi tenei o te Atua mo Iesu e mafai o faka‵pau ki se tino ‵lomi ata o fale telā e ga‵lue fakatasi mo se tino faite fale. E ‵lomi ne te tino ‵lomi ata a te ata o te fale; kae ko te tino faite fale e faite ne ia.

Ne tavini atu e pelā me ko te Muna. I te fakasino atu ki te olaga o Iesu a koi tuai o fai mo fai se tino, e taku ne te Tusi Tapu a Iesu ko “te Muna.” (Ioane 1:1) E fakamaoni mai i ei me ne fakaaoga ne te Atua tena Tama ke tuku atu ne ia a fakamatalaga mo fakatonuga ki nisi tino faka-te-agaga.

E foliga mai foki me ne fai a Iesu e pelā me se Tukumuna a te Atua ki tino i te lalolagi. Kāti ne faipati atu a te Atua e auala i a Iesu e pelā me ko te Muna i te taimi ne tuku atu ei a fakatonuga ki a Atamu mo Eva i te fatoaga o Etena. (Kenese 2:16, 17) Kāti ko Iesu foki te agelu telā ne takitaki ne ia te kau Isalaelu mua i loto i te koga lavaki kae ko tena leo foki ne ‵tau o faka‵logo ki ei a te kau Isalaelu.—Esoto 23:20-23. *