Te Tusi a Ioane 17:1-26
17 Ne faipati atu ne Iesu a mea konei, kae ne kilo aka ki te lagi, fai atu ei “Te Tamana, ko oko mai te itula. Faka‵malu tau tama ko te mea ke faka‵malu koe ne tau tama,+
2 e pelā eiloa mo te tukuatuga ne koe ki a ia a te pule i luga i tino katoa,+ ko te mea ke mafai o tuku atu ne ia a te ola se-gata-mai+ ki a latou katoa kolā ko oti ne tuku atu ne koe ki a ia.+
3 Tenei te uiga o te ola se-gata-mai,+ ke iloa tonu* ne latou a koe, ko te Atua tonu e tokotasi,+ e penā foki loa mo te tino telā ne uga mai ne koe, ko Iesu Keliso.+
4 Ko oti ne faka‵malu ne au a koe i te lalolagi,+ me ne fakaoti ne au a te galuega telā ne tuku mai ne koe ke fai ne au.+
5 Tela la, e te Tamana, ke faka‵malu ne koe au i ou tafa e pelā eiloa mo te ‵malu telā ne maua ne au i ou tafa kae koi tuai o faite te lalolagi.+
6 “Ko oti ne fakaasi* atu ne au tou igoa ki a latou kolā ne tuku mai ne koe ki a au mai te lalolagi.+ Ko ou tino latou, kae ne tuku mai ne koe latou ki a au, kae ne tausi* latou ki au muna.
7 Ko iloa nei ne latou me i mea katoa kolā ne tuku mai ne koe ki a au ne aumai i a koe;
8 me ko oti ne tuku atu ne au ki a latou a muna kolā ne tuku mai ne koe ki a au,+ kae ne talia ne latou kae ko iloa foki ne latou mo te mautinoa i a au ne vau e pelā me ko tou sui,+ kae ko tali‵tonu latou i a au ne uga mai ne koe.+
9 E fakatagi atu au e uiga mō latou; e se fakatagi atu au mō te lalolagi, kae mō latou kolā ko oti ne tuku mai ne koe ki a au, me i a latou ko ou tino;
10 kae ko aku mea katoa i a koe kae ko au mea i a aku,+ kae ko oti ne faka‵malugina au i tafa o latou.
11 “Au e se nofo faeloa i te lalolagi, kae ko latou e ‵nofo eiloa i te lalolagi,+ kae ka fanatu au ki a koe. Te Tamana Tapu, ke tausi ne koe latou+ ona ko tou igoa telā ko oti ne tuku mai ne koe ki a au, ko te mea ke tasi* latou e pelā mo tāua e tasi.*+
12 I te taimi ne ‵nofo fakatasi ei au mo latou, ne tausi faeloa ne au latou+ ona ko tou igoa telā ko oti ne tuku mai ne koe ki a au; kae ne puipui ne au latou, kae seai se tino i a latou ne fakaseai+ kae na ko te tama o te fakamaseiga,+ ko te mea ke fakataunu ei a Tusitusiga Tapu.+
13 Kae nei la au ka fanatu ki a koe, kae e fai atu ne au a mea konei i te lalolagi ko te mea ke katoatoa toku fiafia i loto i a latou.+
14 Ko oti ne tuku atu ne au tau muna ki a latou, kae ne takalia‵lia te lalolagi ki a latou, me i a latou e se ne vaega o te lalolagi,+ e pelā eiloa mo au e sē se vaega o te lalolagi.
15 “Au e se fakatagi atu ki a koe, ke ave latou kea‵tea mai te lalolagi, kae ke tausi ne koe latou ona ko te tino masei.+
16 A latou e se ne vaega o te lalolagi,+ e pelā eiloa mo au e sē se vaega o te lalolagi.+
17 Ke fakatapu latou* e auala i te munatonu;+ a tau muna ko te munatonu.+
18 E pelā eiloa mo au ne uga mai ne koe ki te lalolagi, e uga atu foki ne au latou ki te lalolagi.+
19 Kae ko fakatapu ne au a au eiloa mō latou, ko te mea ke mafai foki o fakatapugina latou e auala i te munatonu.
20 “E se fakatagi atu au mō latou fua konei, kae e pelā foki mo latou kolā e fakatuanaki mai ki a au e auala i olotou pati,
21 ko te mea ke tasi katoa latou,+ e pelā eiloa mo koe, te Tamana e ‵kau fakatasi mo au, kae ko au e ‵kau fakatasi mo koe,+ kae ke ‵kau fakatasi foki latou mo tāua, ko te mea ke tali‵tonu te lalolagi i a au ne uga mai ne koe.
22 Ko oti ne tuku atu ne au ki a latou a te ‵malu telā ko oti ne tuku mai ne koe ki a au, ko te mea ke tasi latou e pelā eiloa mo tāua e tasi.+
23 Au e ‵kau fakatasi mo latou kae ko koe e ‵kau fakatasi mo au, ko te mea ke mafai o katoatoa latou e pelā me se foitino e tasi, ke iloa ne te lalolagi i a au ne uga mai ne koe kae ko koe e alofa ki a latou e pelā eiloa mo tou alofa mai ki a au.
24 Te Tamana, au e manako ke ‵nofo a latou kolā ko oti ne tuku mai ne koe ki a au i te koga e nofo au i ei,+ ko te mea ke lavea ne latou toku ‵malu telā ne tuku mai ne koe ki a au, me i a koe ne alofa mai ki a au kae koi tuai o fakavae* te lalolagi.+
25 Te Tamana amiotonu, se mea tonu me e seki iloa koe ne te lalolagi,+ kae e iloa ne au a koe,+ ko iloa foki ne latou konei me i a au ne uga mai ne koe.
26 Ko oti ne fakailoa atu ne au tou igoa ki a latou kae ka toe fakailoa atu ne au,+ ko te mea ke maua ne latou te alofa telā ne alofa mai ei koe ki a au kae ko au ke ‵kau fakatasi foki mo latou.”+
Fakamatalaga mai lalo
^ E fakasino atu a te veape i te ‵gana Eleni ki se faifaiga masani telā e fai faeloa.
^ Io me “fakailoa.”
^ Io me “faka‵logo.”
^ Io me “‵kau fakatasi.”
^ Io me “‵kau fakatasi.”
^ Io me “‵Vae fakaa‵tea latou; Fai latou ke tapu.”
^ A te mea tenei e fakasino ki tama‵liki a Atamu mo Eva.
