Te Tusi a Mataio 2:1-23
2 Mai tua o te fanauga o Iesu i Peteleema+ i Iuta, i aso o Helota*+ te tupu, kiloke! ne olo atu ki Ielusalema a tino iloilo fetū* mai te feitu ki Saegala,
2 kae fai atu: “Tefea te tupu o Iutaia telā ko oti ne fanau mai?+ Me ne lavea ne matou tena fetū kae koi ‵nofo atu matou i te feitu ki Saegala, kae ko o‵mai nei matou o ifo atu ki a ia.”
3 I te logoga a te tupu ko Helota i te mea tenei, ne manavase valevale a ia e pelā foki mo tino katoa i Ielusalema.
4 I te taimi ne fakamaopoopo fakatasi ei ne ia a faitaulaga sili katoa mo failautusi, ne fesili atu a ia ki a latou me tefea te koga e ‵tau o fanau i ei te Keliso.*
5 Ne fai atu latou ki a ia: “I Peteleema+ i Iuta, me konei a pati ne tusi e auala i te pelofeta:
6 ‘Kae ko koe e Peteleema i te fenua o Iuta, ko te ‵toe fakai fatauva i kovana o Iuta, me ka vau mai i a koe se takitaki telā ka tausi ne ia oku tino Isalaelu.’”+
7 Tenā ne ‵kami ‵funa ei ne Helota a tino iloilo fetū konā kae ne fakamautinoa faka‵lei aka ne ia mai i a latou te taimi ne sae aka ei te fetū.
8 I te taimi ne uga atu ei ne ia latou ke olo ki Peteleema, ne fai atu a ia: “Olo o salasala faka‵lei te tamaliki, kae kafai ko maua ne koutou fakailoa mai ki a au ko te mea ke fanatu foki au o ifo ki a ia.”
9 I te otiga ne lagona ne latou a pati a te tupu, olo ei latou, kae kiloke! a te fetū telā ne matea ne latou kae koi ‵nofo atu latou i te feitu ki Saegala+ e fano i olotou mua, kae ne tu tonu eiloa i luga i te fale telā e nofo i ei te tamaliki.
10 I te mateaga ne latou a te fetū ne fia‵fia malosi eiloa latou.
11 Kae i te taimi ne ulu atu ei latou ki loto i te fale ne matea ne latou te tamaliki mo Malia tena mātua, kae to‵tuli o ifo atu ki a ia. Ne ‵tala foki olotou koloa tāua kae tuku atu ki a ia a meaalofa—ko aulo mo pulu lipano mo pulu mulo.
12 Kae ona ko te fakatonuga a te Atua e auala i se moemiti+ ke mo a ma toe ‵foki ki a Helota, ne ‵foki atu ei latou ki te lotou fenua i te suā auala.
13 I te lotou ologa kea‵tea, kiloke! ne fakasae atu te agelu a Ieova* i se moemiti ki a Iosefa,+ ana muna: “Tu ki luga, puke te tamaliki mo tena mātua kae ‵tele ki Aikupito kae ‵nofo eiloa i konā ke oko ki te taimi e toe fai atu ei au ke toe ‵foki mai koutou, me i a Helota ko pili o ‵sala ki te tamaliki ke tamate ne ia.”
14 Tenā ne tu aka ei a Iosefa i te po, puke te tamaliki mo tena mātua kae olo atu ki Aikupito.
15 Ne nofo eiloa a ia i konā ke oko ki te taimi ne mate ei a Helota. Ne fakataunu i ei a pati a Ieova* e auala i tena pelofeta, ana muna: “Ne kalagagina ne au taku tamaliki tagata ke vau ki tua mo Aikupito.”+
16 I te iloaga ne Helota me ko oti ne fakaloiloi a ia ne tino iloilo fetū konā, ne kaitaua malosi tou tagata kae ne fakatonu atu ke tamate a tama‵liki tāgata katoa i Peteleema mo kogā koga katoa, mai te lua tausaga o fano ki lalo e ‵tusa mo te taimi telā ne fakamautinoa faka‵lei aka ne ia mai i tino iloilo fetū.+
17 Tenā ne fakataunu ei a pati kolā ne fai mai e auala i te pelofeta ko Ielemia, ana muna:
18 “E isi se leo ne lagona atu i Lama, e tagi lotulotu kae tagi mautuutu. Ko Lasela+ e tagi ona ko ana tama‵liki, kae e se manako a ia ki se fakamafanafanaga, me ko ‵galo atu latou.”+
19 I te matega a Helota, kiloke! ne fakasae atu te agelu a Ieova* ki a Iosefa i Aikupito i se moemiti,+
20 kae fai atu: “Tu ki luga, puke te tamaliki mo tena mātua kae olo ki te fenua o Isalaelu, me ko oti ne ‵mate a latou kolā ne salasala ke tamate te tamaliki.”
21 Tenā ne tu aka ei a ia ki luga, puke te tamaliki mo tena mātua kae olo atu ki te fenua o Isalaelu.
22 Kae i tena logoga me ko pule a Alekilao i Iuta e sui ei tena tamana ko Helota, ne mataku tou tagata ma fano ki ei. E se gata i ei, ona ko te fakatonuga a te Atua e auala i se moemiti,+ ne fano ei a ia ki Kalilaia.+
23 Kae ne fanatu a ia o nofo i te fakai e igoa ko Nasaleta,+ ko te mea ke fakataunu ei a pati ne fai e auala i pelofeta: “Ka taku a ia se tino Nasaleta.”*+
Fakamatalaga mai lalo
^ Io me “tino fakataulaitu i te fakaaogaga o fetū.”
^ Io me “te Mesia; te Tino Fakaekegina.”
^ Kāti mai te tugapati Epelu “somo.”