Te Tusi a Ioane 1:1-51
1 Ne ola te Muna+ i te kamataga, kae ne ‵nofo fakatasi te Muna mo te Atua,+ kae ko te Muna ne fai pelā me se atua.*+
2 Ne ‵nofo fakatasi a ia mo te Atua i te kamataga.
3 Ne faite a mea katoa e auala i a ia+ kae e seai eiloa se mea e tasi ne faite e aunoa mo tena fesoasoani.
A te mea ne faite
4 e auala i a ia ko te ola, kae ko te ola ko te mainaga o tino.+
5 E maina atu te mainaga i loto i te pouliga,+ kae e se mafai ne te pouliga o fakatakavale a te mainaga.
6 E isi se tagata ne uga mai e pelā me se sui o te Atua; a tena igoa ko Ioane.+
7 Ne vau te tagata tenei ke fai mo molimau, ko te mea ke molimau atu e uiga ki te mainaga,+ ke mafai o tali‵tonu a tino kese‵kese katoa e auala i a ia.
8 A ia e se ko te mainaga,+ kae ne uga mai a ia ke molimau atu e uiga ki te mainaga tenā.
9 Ko pili o vau ki te lalolagi a te mainaga tonu telā ka maina atu ki tino kese‵kese katoa.+
10 Ne nofo a ia i te lalolagi,+ kae ko te lalolagi ne faite e auala i a ia,+ kae ne seki iloa ne te lalolagi a ia.
11 Ne vau a ia ki tena fenua tonu kae ne seki talia a ia ne ana tino tonu.
12 E ui i ei, ne tuku atu ne ia te avanoaga ki tino katoa kolā ne talia ne latou a ia ke fai mo fai ne tama a te Atua,+ me ne fakaasi atu faeloa ne latou te fakatuanaki ki tena igoa.+
13 Ne seki fa‵nau mai latou i te toto io me ko pogai faka-te-foitino io me ko loto o tāgata, kae mai i te Atua.+
14 Tela la, ne liu tino+ te Muna kae ne ‵nofo fakatasi mo tatou, kae ne lavea ne tatou tena ‵malu, ko te vaegā ‵malu telā e maua fua ne se tama fagasele e tokotasi+ mai tena tamana; kae ne ‵fonu eiloa a ia i te alofa o te Atua* mo te munatonu.
15 (Ne molimau mai a Ioane e uiga ki a ia, e tonu, ne kalaga aka tou tagata: “Tenei te tino telā ne fai atu ei au penei, ‘A te tino telā e vau i oku tua ko leva ne mua atu i a au, me ne ola muamua a ia i a au.’”)+
16 Ne maua ne tatou katoa mai i a ia te alofa tauanoa, me e ‵fonu a ia i te alofa tauanoa.
17 Ne tuku mai te Tulafono e auala i a Mose,+ kae ko te alofa tauanoa+ mo te munatonu ne tuku mai e auala i a Iesu Keliso.+
18 E seai se tino kai lavea ne ia te Atua i se taimi e tasi;+ kae na ko te tama fagasele e tokotasi telā e fai pelā me se atua+ telā e nofo i te feitu o te Tamana,+ ko ia ne fakamatala mai ne ia a te Tamana.+
19 Tenei te molimau ne tuku mai ne Ioane i te taimi ne uga atu ei ne tino Iutaia a faitaulaga mo tino Levi mai i Ielusalema ke fesili atu ki a ia: “Ko oi koe?”+
20 Ne seki fakafiti a ia kae ne fakaasi ‵tonu atu penei: “Au e se ko te Keliso.”
21 Ne fesili atu latou ki a ia: “Ko oi la koe? A koe ko Elia?”+ Ne tali atu a ia: “Au e se ko ia.” “A koe ko te Pelofeta?”+ Kae ne tali atu a ia “Ikai!”
22 Tenā ne fai atu ei latou ki a ia: “Kae ko oi la koe? Fai mai ki a matou ko te mea ke isi se tali e tuku atu ne matou ki a latou kolā ne uga mai ne latou matou. Se a tau fakamatalaga e uiga ki a koe?”
23 Ana muna: “Au ko te leo o te tino telā e kalaga i te koga lavaki, ‘Fai ke ‵tonu te auala o Ieova,’+ e pelā eiloa mo pati a Isaia te pelofeta.”+
24 A tino konā ne uga atu ne te kau Falesaio.
25 Ne fesili atu latou ki a ia: “Kaia la e papatiso ei ne koe a tino māfai e se ko koe te Keliso io me ko Elia io me ko te Pelofeta?”
26 Ne tali atu a Ioane ki a latou: “Au e papatiso ki te vai. E isi se tino tenā e ‵tu fakatasi mai mo koutou kae e se iloa ne koutou,
27 ko te tino telā e vau i oku tua, kae e se ‵tau mo au o ‵tala a fusi o ana taka.”+
28 Ne ‵tupu a mea konei i Petania i te suā feitu o te Iolitana, telā ne fai ei te papatisoga a Ioane.+
29 I te suā aso, ne lavea ne ia a Iesu e fanatu ki a ia, kae ne fai aka a ia: “Kiloke, te Tamā Mamoe+ a te Atua telā ka ave ne ia kea‵tea a agasala+ a te lalolagi!+
30 Tenei eiloa te tino ne fai atu ei au: ‘E vau mai oku tua te tagata telā ko leva ne mua atu i a au, me ne ola muamua a ia i a au.’+
31 Ne seki iloa foki ne au a ia, kae ko te pogai ne vau ei au o papatiso ki te vai ko te mea ke mafai o iloa a ia ne tino Isalaelu.”+
32 Ne molimau mai foki a Ioane, ana muna: “Ne lavea ne au te agaga e fanaifo e pelā me se lupe mai te lagi, kae ne nofo eiloa i luga i a ia.+
33 Ne seki iloa foki ne au a ia, kae ko te Tino eiloa telā ne uga mai ne ia au ke papatiso ki te vai ne fai mai ki a au: ‘Ko te tino telā e lavea ne koe e fanaifo te agaga kae nofo i luga i ei,+ tenei eiloa te tino ka fai ne ia te papatisoga ki te agaga tapu.’+
34 Kae ko oti ne lavea ne au a ia, kae ko oti foki ne molimau atu au me i te tino tenei ko te Tama a te Atua.”+
35 I te suā aso, ne takatu‵tu a Ioane mo ana soko e tokolua,
36 kae i te laveaga ne ia a Iesu e sasale mai, ana muna: “Kiloke, te Tamā Mamoe+ a te Atua!”
37 I te lagonaga ne soko e tokolua ana pati, ne tau‵tali atu lāua i a Iesu.
38 Tenā ne mafuli atu ei a Iesu kae lavea ne ia a lāua e tau‵tali atu i a ia, fai atu ei: “Se a te mea e ‵sala koulua ki ei?” A lā muna ki a ia: “Te Lapi (ko tena uiga, te “Faiakoga”), tefea te koga e nofo koe i ei?”
39 Ana muna ki a lāua: “O‵mai ke lavea ne koulua.” Tenā ne olo atu ei lāua kae ne lavea ne lāua te koga e nofo ei a ia, ne ‵nofo fakatasi latou i te aso tenā; kāti ko te sefulu o itula.*
40 A Anitelea+ te taina o Simona Petelu se tokotasi i a lāua telā ne lagona ne ia a pati a Ioane kae tautali atu i a Iesu.
41 Ne maua muamua ne ia tena taina ko Simona kae fai atu ki a ia: “Ko oti ne maua ne māua te Mesia”+ (ko tena uiga māfai e ‵fuli, ko te “Keliso”),
42 kae ne ‵taki atu ne ia tou tagata ki a Iesu. I te kiloatuga a Iesu ki a ia, ana muna: “A koe ko Simona+ te tama a Ioane; a koe ka fakaigoa ki a Kefa” (telā e ‵fuli ki a “Petelu”).+
43 Ne manako a ia o fano ki Kalilaia i te suā aso. Ne maua ne Iesu a Filipo+ kae fai atu ki a ia: “Tautali mai i a au.”
44 A Filipo se tino mai Petesaita, te fakai o Anitelea mo Petelu.
45 Ne maua ne Filipo a Natanielu+ kae fai atu ki a ia: “Ko oti ne maua ne matou a te tino telā ne tusi mai ei a Mose i te Tulafono mo tusi a te kau Pelofeta: ko Iesu te tama a Iosefa+ mai Nasaleta.”
46 Kae ne fai atu a Natanielu ki a ia: “E a, e mafai o maua se mea ‵lei mai Nasaleta?” Ne fai atu a Filipo ki a ia: “Vau o onoono.”
47 Ne lavea ne Iesu a Natanielu e fanatu ki a ia kae fai atu e uiga ki a ia: “Kiloke, tenei eiloa te tino Isalaelu telā e seai se uiga fakaloiloi i a ia.”+
48 Ne fai atu a Natanielu ki a ia: “Ne iloa pefea ne koe au?” Ne tali atu a Iesu ki a ia: “Kae koi tuai o kalaga atu a Filipo ki a koe i lalo i te lakau ko te mati, kae ko leva ne lavea ne au a koe.”
49 Ne tali atu a Natanielu: “Te Faiakoga, a koe ko te Tama a te Atua, a koe ko te Tupu o Isalaelu.”+
50 Ne tali atu a Iesu ki a ia: “E a, ko talitonu koe ona ko au ne fai atu me ne lavea ne au a koe i lalo o te lakau ko te mati? Ka lavea eiloa ne koe a mea e sili fakafia atu i te ‵lasi i lō mea konei.”
51 Tenā ne fai atu ei a Iesu ki a ia: “Au e fai ‵tonu atu ki a koutou, ka lavea ne koutou a te lagi e matala mo agelu a te Atua e olo aka kae olo ifo ki te Tama a te tagata.”+
Fakamatalaga mai lalo
^ Io me “e pelā mo uiga o te Atua.”
^ Io me “alofa tauanoa.”
^ Telā kāti ko te 4:00 i te fakaafiafi.