Iopu 1:1-22
1 E isi se tagata i te fenua ko Usa e igoa ki a Iopu.*+ A ia se tagata fai mea tonu kae fakamaoni;+ ne mataku a ia ki te Atua kae ‵kalo kea‵tea mai mea ma‵sei.+
2 E tokofitu ana tama tāgata kae tokotolu ana tama fāfine.
3 A te aofaki o ana lafu manu e 7,000 mamoe, 3,000 kamela, 1,000 pulumakau* kae 500 asini,* fakatasi mo se aofaki lasi o ana tavini, tenā ne sili atu ei a ia i tino katoa i Saegala.
4 Ne fai sāle ne ana tama tāgata taki tokotasi se ‵kaiga i olotou fale i te aso ko oti ne fakatoka ne latou.* E masani o ‵kami mai ne latou olotou tuagane e tokotolu ke ‵kai kae inu fakatasi mo latou.
5 Mai tua o aso ne fai ei a ‵kaiga, e ‵kami mai latou ne Iopu ko te mea ke fakatapu latou. Tenā ko tu aka ei a ia i te tafataeao ‵malu o ofo atu a taulaga ‵sunu+ mō latou taki tokotasi. Me ne fai aka a Iopu: “Kāti ne agasala aku tama kae fai ne pati sē ‵lei ki te Atua i olotou loto.” Tenā eiloa te mea e fai sāle ne Iopu.+
6 Kae ne oko ki te aso ne ulu atu ei a tama tāgata a te Atua* tonu+ o ‵tu i olotou tulaga i mua o Ieova,+ kae ko Satani+ ne ulu atu foki i a latou.+
7 Tenā ne fai atu ei a Ieova ki a Satani: “A koe ne vau mai fea?” Ne tali atu a Satani ki a Ieova: “Mai te fanofanoga i te lalolagi kae sasale i ei.”+
8 Kae ne fai atu a Ieova ki a Satani: “E a, kai lavea ne koe* taku tavini ko Iopu? E seai se tino e ‵pau mo ia i te lalolagi. A ia se tagata fai mea tonu kae fakamaoni,*+ e mataku ki te Atua kae ‵kalo kea‵tea mai mea ma‵sei.”
9 I konā loa, ne tali atu a Satani ki a Ieova: “E a, ka mataku eiloa a Iopu ki te Atua māfai e seai ne ana mea?+
10 E a, e seki fakatu fakatamilo ne koe se ‵pui lakau ke puipui ei a ia+ mo tena kāiga mo ana mea katoa? Ko oti ne fakamanuia ne koe a galuega o ana lima,+ kae ko salalau ana lafu manu ki te fenua kātoa.
11 Kae nei la, ‵kapa atu tou lima kae fakaseai ana mea katoa, e mautinoa eiloa me ka muna masei a ia ki ou mata.”
12 Tenā ne fai atu ei a Ieova ki a Satani: “Kiloke! A mea katoa a ia ko avatu ki ou lima.* Kae ke mo a fua ma fakaoko atu ou lima ki a ia eiloa!” Tenā ne fano ei kea‵tea a Satani mai i mua o Ieova.+
13 Ko oko atu ki te aso ne ‵kai kae inu uaina ana tama tāgata mo ana tama fāfine i te fale o te lotou taina matua,+
14 ne vau se avefekau ki a Iopu kae fai atu: “A pulumakau ne fakamalū te laukele kae ko asini e kai‵kai i olotou tafa
15 i te taimi ne taua mai ei a tino Sapeana kae puke ne latou a manu, kae tamate ne latou a tavini ki te pelu. Ko au fua tokotasi ne sao ke fakailoa mai ki a koe a te mea tenei.”
16 Kae koi faipati a ia, ne vau te suā tino kae fai atu: “A te afi mai te Atua* ne tō ifo mai te lagi kae ‵ka i ei a mamoe mo tavini kae ‵mate i ei latou! Ko au fua tokotasi ne sao ke fakailoa mai ki a koe a te mea tenei.”
17 Kae koi faipati a ia, ne vau te suā tino kae fai atu: “Ne fakatoka ne tino Kaletaia+ a potukau e tolu kae ne taua mai latou kae puke a kamela, kae tamate ne latou a tavini ki te pelu. Ko au fua tokotasi ne sao ke fakailoa mai ki a koe a te mea tenei.”
18 Kae koi faipati a ia, kae ne vau te suā tino kae fai atu: “Au tama tāgata mo au tama fāfine ne ‵kai kae inu uaina i te fale o te lotou taina matua.
19 Ne oko fakavave mai se matagi lasi mai te koga lavaki kae poko atu ki ‵kōna e fa o te fale, siga ei ki luga i tama‵liki kae ne ‵mate i ei latou. Ko au fua tokotasi ne sao ke fakailoa mai ki a koe a te mea tenei.”
20 I konā loa, ne tu aka a Iopu kae saesae ana gatu kae ‵kati a laulu o tena ulu; tenā ne fakasiga ifo ei a ia ki te laukele kae ifo ki lalo
21 kae fai aka:
“Au ne vau ki tua mo te moegatama o toku mātua e aunoa mo se mea,Kae ka toe foki au e aunoa mo se mea.+
Ko Ieova ne tuku mai ne ia,+ kae ko Ieova foki e ave kea‵tea ne ia.
Ke vikia faeloa a te igoa o Ieova.”
22 I mea katoa konei, e seki agasala eiloa a Iopu io me ‵losi atu me ko te Atua ne fai ne ia mea konei.*
Fakamatalaga mai lalo
^ Kāti ko tena uiga “Se Mea e Kaitāua ki ei a Tino.”
^ Epelu, “500 ‵pea pulumakau.”
^ Epelu, “asini fāfine.”
^ Io me “i te fale o tino taki tokotasi māfai ko oko ki tena taimi.”
^ Se tugapati Epelu telā e fakasino atu ki tama faka-te-agaga a te Atua ko agelu.
^ Epelu, “tuku tou loto ki.”
^ Io me “se tagata e seai sena mea ‵se kae fai mea tonu.”
^ Io me “nofo mai lalo i tau pule.”
^ Io me kāti, “te uila.”
^ Io me “fai atu me e isi se mea sē ‵lei ne māfua mai i te Atua.”
