Te Tusi ki te Kau i Kolose 1:1-29
1 Au ko Paulo, se apositolo a Keliso Iesu ona ko te loto o te Atua, mo Timoteo+ te ‵tou taina
2 ki tino tapu mo taina fakamaoni i te ‵kau fakatasi mo Keliso i Kolose:
Ke i luga i a koutou a te alofa tauanoa mo te filemu mai te Atua te ‵tou Tamana.
3 E fakafetai atu faeloa matou ki te Atua te Tamana o te ‵tou Aliki ko Iesu Keliso i omotou talosaga mō koutou,
4 me ko oti ne ‵logo matou i te otou fakatuanaki ki a Keliso Iesu mo te a‵lofa o koutou ki tino tapu katoa
5 ona ko te fakamoemoega telā e tausi mō koutou i te lagi.+ Ne lagona muamua ne koutou a te fakamoemoega tenei e auala i te fekau o te munatonu e uiga ki te tala ‵lei
6 telā ne oko atu ki a koutou. E pelā eiloa mo te fua mai mo te gasolo ki mua o te tala ‵lei i te lalolagi kātoa,+ tenā foki eiloa te mea ko tupu ki a koutou talu mai te aso ne lagona kae iloa tonu ei ne koutou a te munatonu e uiga ki te alofa tauanoa o te Atua.
7 Tenā te mea ne tauloto ne koutou mai i a Epafala+ te ‵tou taina pele telā e pologa fakatasi mo tatou, se tavini fakamaoni a Keliso telā e sui ne ia matou.
8 Ne fakailoa mai foki ne ia ki a matou a te otou a‵lofa i te feitu faka-te-agaga.
9 Tenā foki te pogai e se gata ei te motou ‵talo mō koutou,+ talu mai te aso ne ‵logo ei matou i te mea tenā kae fakatagi atu ko te mea ke faka‵fonu koutou ki te iloaga tonu+ e uiga ki tena loto i poto katoa mo te malamalama i mea faka-te-agaga,+
10 ko te mea ke sa‵sale koutou i se auala telā e talia ne Ieova* kae ke fakafiafia katoatoa atu ki a ia e auala i fua o otou galuega ‵lei katoa kolā e fai faeloa ne koutou kae ga‵solo ki mua i te iloaga tonu e uiga ki te Atua;+
11 ke na fakama‵losi aka koutou ki te malosi sili o te Atua e ‵tusa mo tena ‵mana sē fuafuagina+ ko te mea ke mafai o katoatoa te otou fa‵ki fakatasi mo te kufaki mo te fia‵fia.
12 Kae ke fakafetai atu koutou ki te Tamana telā ne fai ne ia ke mafai o maua otou tusaga i te tofi o tino tapu+ kolā e sa‵sale i te mainaga.
13 Ne faka‵sao ne ia tatou mai te malosi o te pouliga+ kae avatu tatou ki loto i te malo o tena Tama fagasele,
14 e auala i a ia ko fakasaoloto ei tatou e alatu i te togiola, ko te fakamagaloga tenā o ‵tou agasala.+
15 A ia ko te fakatusa o te Atua telā e se lavea,+ ko te uluaki o mea katoa ne faite;+
16 me ne faite a nisi mea katoa i te lagi mo te lalolagi e auala i a ia, ko mea e lavea mo mea e se lavea,+ faitalia me ne nofogaaliki io me ne aliki io me ne malo io me ne pulega. Ne faite a nisi mea katoa e alatu i a ia+ kae mō ia foki.
17 E se gata foki i ei, ko ia ne mua i mea katoa+ kae e auala i a ia ne faite ei a nisi mea katoa,
18 kae ko ia ko te ulu o te foitino, telā ko te fakapotopotoga.+ A ia ko te kamataga, ko te tino muamua ne toe fakatu aka mai i te mate,+ ko te mea ke fai a ia mo fai te tino muamua i mea katoa;
19 me ne fiafia eiloa te Atua o fai ke katoatoa i a ia a mea katoa,+
20 kae e auala i a ia ke toe faka‵lei aka ei te fesokotakiga o nisi mea katoa ki a ia,+ mai te faiga ke maua te filemu e alatu i tena toto+ telā ne ‵ligi i luga i te pou fakasaua,* faitalia me ko mea i te lalolagi io me ko mea i te lagi.
21 E tonu, a koutou kolā ne ‵vae kea‵tea kae ne fai muamua mo fai ana fili ona ko koutou ne mafau‵fau faeloa ki galuega kolā e ma‵sei,
22 kae nei la ko oti ne faka‵lei aka ne ia koutou mo ia e alatu i te foitino o te tino tenā e auala i tena mate, ko te mea ke tuku atu koutou ki a ia e pelā me ne tino ‵ma, e seai ne pona, kae e seai foki ne ‵losiga ki a koutou+—
23 māfai fua e tumau koutou i te fakatuanaki,+ ne fakatu i luga i te fakavae+ kae tu ‵mautakitaki,+ e se ‵to kea‵tea mai te fakamoemoega o te tala ‵lei telā ne lagona ne koutou kae telā ko oti ne talai atu ki tino katoa mai lalo o te lagi.+ Au ko Paulo, ko te tavini o te tala ‵lei tenei.+
24 Ko fiafia au i oku logo‵maega mō koutou,+ kae nei e seki katoatoa a puapuaga o toku foitino ke pelā mo puapuaga o te foitino o Keliso,+ telā ko tena fakapotopotoga.+
25 Ne fai au mo fai te tavini a te fakapotopotoga tenei e ‵tusa mo te galuega fakasituati+ mai te Atua telā ne tuku mai ki a au mō koutou ke talai katoatoa atu te muna a te Atua,
26 ko te mea ‵funa kae tapu+ telā ne ‵funa aka i aso mua+ mo kautama ko ‵teka. Kae tenei ko fakaasi mai ki ana tino tapu,+
27 ko tino kolā ko oti ne fiafia te Atua ke fakaasi atu ki atufenua a te koloa gali o te mea ‵funa kae tapu,+ ko te ‵kau fakatasi tenā o koutou mo Keliso, ko te fakamoemoega o tena ‵malu sili.+
28 Ko ia eiloa te tino e folafola atu ne matou, o fakamalosi atu ki tino katoa kae akoako atu ki tino katoa a poto katoa, ko te mea ke mafai ne matou o tuku katoatoa atu a tino taki tokotasi i te ‵kau fakatasi mo Keliso.+
29 Tenei eiloa te pogai e galue malosi ei au, e fakapalele oku mafi fakatasi mo tena malosi telā e galue mo te ‵mana i loto i a au.+