Zimwi ziindi, bakombi bamwi ba Leza balalibuzya naa kupona kweelana azyeelelo zyamu Bbaibbele kulagwasya naa pe. (Intembauzyo 73:2, 3) Mane buya balakonzya kutalika kucita zintu zikazyanya amilawo ya Jehova alimwi akusola kucenga bakombi bamwi kwiinda mukusisa bukkale bwabo bubyaabi.

 Cibalo eeci cabambilwa kugwasya baabo bapona buumi bwakuupa-upa ameso pele bayanda kubuleka buumi oobo.

Izili apeeji eeyi:

•  Ino buumi bwakuupa-upa ameso ninzi?

•  Sena kupona buumi bwakuupa-upa ameso kundipa kuba muntu mubi?

•  Mbuti mbondikonzya kucileka kupona buumi bwakuupa-upa ameso?

•  Nzyobaamba beenzinyoko

 Kupona buumi bwakuupa-upa ameso caamba kuti ciindi nomuli abeenzinyoko ibatamumvwidi Jehova, mucita zintu acaali nzyomuzyi kuti taziluzi; pele ciindi nomuli abasimbungano basyomeka, mulibonesya kuti muliyandide kubelekela Jehova. Cili mbuli kuti mujisi maumi obilo, alimwi mumaumi aaya moonse kuli ncomusisa.

 “Ciindi nomupona buumi bwakuupa-upa ameso, kuli ncomusisa kubantu, aboobo kunyina uumuzyi ncobeni. Pele mubwini, kupona buumi buli boobu kumupa kutasyomeka kubantu boonse.”—Erin.

 Sena mulizyi? Buumi bwakuupa-upa ameso bulabikkilizya akucita zintu nzyatazumizyi Jehova ciindi nomuli nyolikke.

 “Nondakajisi myaka iili 14, ndakatalika kulanga zifwoto akweebelela mavidiyo aatali kabotu aintaneti. Nondakali abantu bamwi, ndakali kulitondezya mbuli kuti tandiziyandi zintu ziletela muzeezo wakoonana, pele mumoyo ndakalizyi kuti ndilazikkomanina.”—Nolan.

 Njiisyo yamu Bbaibbele: “Taakwe uukonzya kubelekela basimalelo bobilo; nkaambo uyoosula umwi akuyanda umbi, naa uyoosyomeka kuli umwi akusampula umbi.”—Matayo 6:24.

 Peepe. Masimpe kuti bamwi bantu basala kupona munzila iiteendelani azyeelelo zyamu Bbaibbele. Pele sena aaya masimpe kujatikizya ndinywe? Naa kuli cipa kuti kacili boobo, zintu mbuli:

•   Mulayoowa kucita zintu ziindene anzyobacita beenzinyoko.

•   Mulimvwa kuti kuli zintu zinji nzyomweendelana abasicikolonyoko kwiinda mbomweendelana abantu bamumbungano.

•   Mulimvwa kuti tamujisi luyandisisyo lwakutobela milawo ya Leza yoonse.

 “Ndiyeeya kuti bakubusi ibapona buumi bwakuupa-upa ameso balaanguluka kuba akati kabantu batatobeli zyeelelo zya Bunakristo akaambo kakuti inga bayanda kuzulilwa kulubazu lumwi, tacikwe makani naa lubazu oolo taluli kabotu naa pe.”—David.

 Pele masimpe ngakuti kunyina kaambo akati katwaambo twaambwa atala aawa ikazumizya muntu kupona buumi bwakuupa-upa ameso. Nokuba boobo, tutondezya buyo bantu bali kabotu mbobakonzya kucegwa. Ikuti naa cakamucitikila eeco, ncinzi ncomukonzya kucita?

1.  1. Amuyeeye kujatikizya buumi mbomupona lino. Amulibuzye kuti: ‘Sena oobu mbobuumi mbondiyanda kunoopona? Ikuti naa ndazumanana kupona buumi oobu, ino zyakusala zyangu inga zyandisololela kuli?’

    Njiisyo yamu Bbaibbele: “Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.”—Tusimpi 27:12.

2.  2. Amusyomeke. Amububandike bukkale bwanu abazyali banu naa muntu uumwi uusimide walo ulemeka milawo ya Jehova. Tacidoonekwi kuti inga bakkomana kapati kuti mwaboola kulomba lugwasyo kulimbabo. Alimwi inga bakkomana kubona kuti muyanda kucita cintu ciluzi!

    “Kulyaambilila bulubizi bwangu kubantu bamwi cakali cintu cakali kundikatazya kucita, pele nondakacita oobo ndakalimvwa kulemununwa.”—Nolan.

    Njiisyo yamu Bbaibbele: “Ooyo uusisa zinyonyoono zyakwe takoozwidilila pe, pele kufwumbwa uulyaambilila akuzileka ulafwidwa luse.”—Tusimpi 28:13.

3.  3. Amwaazumine mapenzi aaboola. Amuyeeye kuti, ikuti naa kuli cintu cimwi ncomwakali kusisa kubazyali banu alimwi akumbungano, eeco cakapa kuti bacileke kumusyoma. Akaambo kaceeci, bazyali banu naa baalu bamumbungano inga bamubikkila zisinkilizyo kwaciindi cili mbuli mbocibede. Amucizumine cisubulo eeco, alimwi akulibikkila makanze ‘aakusyomeka muzintu zyoonse’ kuzwa aciindi eeco.—Bahebrayo 13:18.

    Njiisyo yamu Bbaibbele: “Koswiilila lulayo akuzumina kulaigwa, kutegwa ukabe musongo kumbele aamazuba.”—Tusimpi 19:20.

4.  4. Amube aalusyomo luyumu lwakuti Leza ulamuyanda. Akaambo kakuti Jehova ulatuyanda, ulazibona zintu zyoonse nzyotucita. Aboobo, ikuti kamupona buumi bwakuupa-upa ameso, ulazyiba alimwi cimupa kuusa. Nokuba boobo, akaambo kakuti “ulamubikkila maano,” ulilibambilide kumugwasya kutegwa mucince nzila zyanu.—1 Petro 5:7.

    Njiisyo yamu Bbaibbele: “Nkaambo meso aa Jehova alalanga-langa munyika yoonse kutegwa atondezye nguzu zyakwe ikugwasya baabo bamusyoma camoyo woonse.”—2 Makani 16:9.