1. Nkaambo nzi mupati wamunkuta yaku Etiopiya umwi ncaakalomba kubbapatizyigwa?

“NGAAYA maanzi, ncinzi ino icindikasya kubapatizigwa?” Imubuzyo ooyu wakabuzyigwa amupati wamunkuta yaku Etiopiya umwi mumwaanda wamyaka wakusaanguna. Munakristo wazina lya Filipo wakali mupandulwide cakusalazya  kuti Jesu ngowakali Mesiya wakasyomezyegwa. Kakulwaizyidwe kapati azintu nzyaakaiya mu Magwalo, imwaalumi ooyo muna Etiopiya wakabweza ntaamu. Wakalitondezya kuti wakali kuyanda kubbapatizyigwa!—Incito 8:26-36.

2. Nkaambo nzi ncomweelede kukubikkila maanu kapati kubbapatizyigwa?

² Ikuti zibalo zyamusyule mubbuku lino mwakaziiya cakusitikila aumwi wa Bakamboni ba Jehova, inga mwalimvwa kuti mulilibambilide kubuzya kuti, ‘Ncinzi cindikasya kubbapatizyigwa?’ Kusikila lino mwaiya zyacisyomezyo cili mu Bbaibbele cabuumi butamani mu Paradaiso. (Luka 23:43; Ciyubunuzyo 21:3, 4) Alimwi mwaiya ciimo cini-cini cabantu bafwide alimwi abulangizi bwabubuke. (Mukambausi 9:5; Johane 5:28, 29) Ambweni mwali kuswaangana a Bakamboni ba Jehova kumiswaangano yabo yambungano alimwi mwalibonena mbobazuzikizya ziyandika zyacikombelo cakasimpe. (Johane 13:35) Iciyandika kwiinda waawo, ambweni mwatalika kuba acilongwe a Jehova Leza.

3. (a) Mmalailile nzi Jesu ngaakapa batobeli bakwe? (b) Ino lubbapatizyo lwamumaanzi lucitwa buti?

³ Ino inga mwalitondezya buti kuti muyanda kubelekela Leza? Jesu wakaambila basikumutobela kuti: “Kamuya mukabaiisye bantu bamisyobo yoonse, akubabapatizya.” (Matayo 28:19) Jesu lwakwe wakasiya cikozyanyo cibotu kwiinda mukubbapatizyigwa mumaanzi. Tanaakasansailwa nanka kutilwa-tilwa buyo maanzi amutwe pe. (Matayo 3:16) Ibbala lyakuti “bbapatizya” lizwa kubbala lya Cigiliki lyaamba “kunyika.” Aboobo lubbapatizyo lwa Bunakristo lwaamba kunyikwa naa kubbizyigwa cakumaninina mumaanzi.

4. Ino kubbapatizyigwa mumaanzi kutondezya nzi?

⁴ Ikubbapatizyigwa mumaanzi ncintu ciyandika kuli boonse bayanda kuba acilongwe a Jehova Leza. Lubbapatizyo ncitondezyo caantangalala cakuti muyandisisya kubelekela Leza. Lutondezya kuti mulakukkomanina kucita kuyanda kwa Jehova. (Intembauzyo 40:7, 8) Pele ikutegwa mweelele kubbapatizyigwa, mweelede kuzuzikizya ntaamu zigaminide.

5. (a) Nintaamu nzi yakusaanguna iiyandika kutegwa muntu ayelele kubbapatizyigwa? (b) Nkaambo nzi miswaangano yambungano ncoiyandika?

⁵ Mwatalika kale kuzuzikizya ntaamu yakusaanguna. Munzila nzi? Ikwiinda mukujana luzibo lwa Jehova Leza alimwi a Jesu Kristo, ambweni kwiinda muciiyo ca Bbaibbele cicitwa lyoonse. (Amubale Johane 17:3) Pele nzinji zimbi nzyomuceelede kwiiya. Banakristo bayanda ‘kuzuzyigwa aluzibo lwini-lwini lwakuzyiba makanze aa Leza.’ (Ba-Kolose 1:9) Ikujanika kumiswaangano yambungano ya Bakamboni ba Jehova kulamugwasya kapati mumakani aaya. Cilayandika kujanika kumiswaangano eeyo. (Ba-Hebrayo 10:24, 25) Ikujanika lyoonse kumiswaangano kuyoomugwasya kuyungizya luzibo lwanu lwa Leza.

6. Ino mweelede kuba alwiiyo lwa Bbaibbele lunji buti kutegwa mweelele kubbapatizyigwa?

⁶ Pele tamuyandiki kuti mane buya muzizyibe zyoonse zili mu Bbaibbele kutegwa mweelele kubbapatizyigwa. Imupati wamunkuta yaku Etiopiya wakajisi luzibo lumwi, pele wakali kuyandika lugwasyo kutegwa ateelele zibeela zimwi zya Magwalo. (Incito 8:30, 31) Mbubwenya buyo, muciyandika kwiiya zimbi zinji. Mubwini, kunyina nomuya kuleka kwiiya zijatikizya Leza. (Mukambausi 3:11) Pele kamutana bbapatizyigwa, mweelede kuzyiba alimwi akutobela njiisyo zyamu Bbaibbele zyantalisyo. (Ba-Hebrayo 5:12) Injiisyo eezyi zibikkilizya kasimpe kujatikizya ciimo cabantu bafwide alimwi akuzyiba ncoliyandika izina lya Leza a Bwami bwakwe.

7. Ino kwiiya Bbaibbele kweelede kumupa kulimvwa buti?

⁷ Pele ikuba aluzibo kulikke takuzulide pe nkaambo “kuti kakwiina lusyomo tacikonzeki kukonda Leza.” (Ba-Hebrayo 11:6) Ibbaibbele litwaambila kuti bantu bamwi mumunzi wa Korinto yansiku nobakamvwa mulumbe wakali kukambaukwa a Banakristo, “bakasyoma, babapatizigwa.” (Incito 18:8) Mbubwenya buyo, ikwiiya Bbaibbele kweelede kumupa kuba  alusyomo lwakuti ndi Jwi lya Leza ndyaakasololela amuuya. Ciiyo ca Bbaibbele ceelede kumugwasya kuba alusyomo muzisyomezyo zya Leza alimwi akuti cituuzyo ca Jesu cilakonzya kumufwutula.—Joshua 23:14; Incito 4:12; 2 Timoteo 3:16, 17.

8. Ncinzi ciyoomukulwaizya kwaambila bamwi zintu nzyomwakaiya?

⁸ Mbomuya buyungizya lusyomo lwanu mumoyo, ciyoomuyumina ikuumuna buyo kakunyina kwaambila bamwi zintu nzyomwakaiya. (Jeremiya 20:9) Muyookulwaizyigwa kapati kwaambila bambi kujatikizya Leza alimwi amakanze aakwe.—Amubale 2 Ba-Korinto 4:13.

9, 10. (a) Mbaani mbomunga mwatalika kwaambila kasimpe kamu Bbaibbele? (b) Ncinzi ncomweelede kucita ikuti kamuyanda kutola lubazu mumulimo wakukambauka antoomwe a Bakamboni ba Jehova?

⁹ Mulakonzya kutalika kwiinda mukwaamba kasimpe kamu Bbaibbele cabupampu kubasazinyoko, balongwe, basimukobonyoko alimwi ambomubeleka limwi. Mukuya kwaciindi, inga mwayanda kutola lubazu mumulimo wakukambauka antoomwe a Bakamboni ba Jehova. Iciindi eeco, amukaanguluke kwaabandika makani aaya a Kamboni uumuyiisya Bbaibbele. Ikuti naa kakuboneka kuti inga mweelela kutola lubazu mumulimo wakubuleya, kuyoocitwa bubambe bwakuti nywebo alimwi amwiiyi wanu mukaswaangane abaalu bamumbungano bobile.

¹⁰ Eeci ciyoomupa kubazyiba kabotu baalu Banakristo bamwi ibeembela butanga bwa Leza. (Incito 20:28; 1 Petro 5:2, 3) Ikuti baalu aaba bajana kuti mulaziteelela alimwi akuzisyoma njiisyo zya Bbaibbele zyantalisyo, kuti mupona bukkale bweendelana anjiisyo zya Leza alimwi akuti ncobeni muyandisya kuba umwi wa Bakamboni ba Jehova, bayoomuzyibya kuti muleelela kutola lubazu mumulimo wakubuleya kamuli basikumwaya bamakani mabotu batanabbapatizyigwa.

11. Nkucinca nzi nkobeelede kucita bamwi kabatana kweelela kutola lubazu mumulimo wakubuleya?

 ¹¹ Kulubazu lumwi, baalu balakonzya kujana kuti muciyandika kucinca mumbazu zimwi zyabukkale bwanu amicito ikutegwa mweelele kutola lubazu mumulimo wakubuleya. Eeci inga cajatikizya kucileka micito imwi njomwali kucita cakusisikizya. Aboobo, kamutanalomba kuti mube basikumwaya batanabbapatizyigwa, mweelede kuti kamutaciti zibi zipati mbuli bwaamu, budakwi alimwi akubelesya misamu iikola.—Amubale 1 Ba-Korinto 6:9, 10; Ba-Galatiya 5:19-21.

12. Nkaambo nzi kweempwa ncokuyandika?

¹² Kuli ntaamu azimwi zyeelede kuzuzikizyigwa kamutana kweelela kubbapatizyigwa. Imwaapostolo Petro wakati: “Amweempe, musanduke, kuti zibi zyanu zijatilwe.” (Incito 3:19) Ikweempwa nkuusa kwini-kwini kujatikizya cimwi ncomwacita. Ikweempwa kulayandika ikuti muntu wakali kupona buumi bubyaabi, pele alimwi kulayandika nokuba kuti muntu wali kupona buumi bunga bwaambwa kuti bulasalala. Nkaambo nzi? Nkaambo kakuti bantunsi boonse mbaasizibi alimwi bayandika kulekelelwa a Leza. (Ba-Roma 3:23; 5:12) Kamutanatalika kwiiya Bbaibbele, kunyina nomwakaluzyi luyando lwa Leza. Aboobo kunyina nomwakali kunga mwapona cakweendelana kabotu akuyanda kwa Leza. Akaambo kaceeci, ikweempwa kulayandika.

13. Ino kusanduka caamba nzi?

¹³ Ikweempwa kweelede kutobelwa ‘akusanduka.’ Tamweelede kuusa buyo pe. Mweelede kuzileka nzyomwakali kucita musyule akukanza kuti muyoocita buyo zintu ziluleme kuzwa lino. Ikweempwa akusanduka nintaamu nzyomweelede kuzuzikizya kamutanabbapatizyigwa.

14. Nintaamu nzi iiyandika njomweelede kuzuzikizya kamutanabbapatizyigwa?

¹⁴ Kuli ntaamu aimbi yeelede kuzuzikizyigwa kamutanabbapatizyigwa. Mweelede kulyaaba kuli Jehova Leza.

15, 16. Ino caamba nzi kulyaaba nobeni kuli Leza, alimwi ino ncinzi cikulwaizya muntu kulyaaba?

 ¹⁵ Nomulyaaba kuli Jehova Leza mumupailo uusinizyide, musyomezya kukomba buyo nguwe alikke kukabe kutamani. (Deuteronomo 6:15) Pele ino nkaambo nzi muntu ncanga wayanda kucita boobo? Atubelesye cikozyanyo camwaalumi uutalika kweeba mwanakazi kwiingula mubuzyo ooyu. Mbwayaabuya ambele kuzyiba mbwabede mwanakazi ooyu akubona kuti ujisi bube bubotu, akwalo kumumenena mate kuyooyindila. Mukuya kwaciindi, mwaalumi ooyu inga wamukwata. Mmasimpe, kukwata inga kwaamba kuti abe amikuli iimbi. Pele luyando luyoomukulwaizya kuzuzikizya ntaamu eeyo iiyandika.

¹⁶ Nomumuzyiba akumuyanda Jehova, mukulwaizyigwa kumubelekela cakulitakata acamoyo woonse kakunyina cisyaala naa kakunyina kulibikkila aakugolela mukumukomba. Muntu woonse uuyanda kutobela Mwana a Leza Jesu Kristo, weelede ‘kuliimya.’ (Maako 8:34) Tulaliimya kwiinda mukubona kuti nzyotulombozya ambaakani zyesu tazitusinkilili kumvwida Leza cakumaninina. Aboobo kamutanabbapatizyigwa, ikucita kuyanda kwa Jehova Leza ngaayelede kuba makanze aanu mapati mubuumi.—Amubale 1 Petro 4:2.

17. Nkaambo nzi bamwi ncobawayawaya kulyaaba kuli Leza?

¹⁷ Bamwi balawayawaya kulyaaba kuli Jehova akaambo kakuyoowa kubweza ntaamu eeyi iitalikomeneni. Balakonzya kuyoowa kuba amulandu kuli Leza kabali Banakristo balyaabide. Akaambo kakuti bayoowa kuti balakonzya kwaalilwa akupa Jehova kuusa, bayeeya kuti cilainda kubota ikutalyaaba buyo kulinguwe.

18. Ncinzi cinga camukulwaizya kulyaaba kuli Jehova?

¹⁸ Mbomwiiya kuyanda Jehova, muyookulwaizyigwa kulyaaba kulinguwe alimwi akucita kusikila mpomugolela kupona buumi bweendelana akulyaaba kwanu. (Mukambausi 5:4) Mwamana kulyaaba, mmasimpe muyooyanda ‘kweenda  munzila yeelede cakubotezya Jehova muziyanza zyoonse.’ (Ba-Kolose 1:10) Akaambo kaluyando ndomujisi kuli Leza, tamukayeeyi kuti nciyumu kapati kucita kuyanda kwakwe. Cakutadooneka, mulazuminizyanya amwaapostolo Johane wakalemba kuti: “Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.”—1 Johane 5:3.

19. Nkaambo nzi ncomuteelede kuyoowa kulyaaba kuli Leza?

¹⁹ Tamweelede kuba bantu balondokede kutegwa mulyaabe kuli Leza. Jehova ulikuzyi kulezya kwanu alimwi kunyina nalangila kuti mucite zintu nzyomutakonzyi. (Intembauzyo 103:14) Uyanda kuti muzwidilile alimwi uyoomupa nguzu akumugwasya. (Amubale Isaya 41:10) Kamusyomede kuti, ikuti naa  mwasyoma Jehova amoyo wanu woonse, ‘uyooyenzya myeendelo yanu.’—Tusimpi 3:5, 6.

20. Nkaambo nzi kulyaaba kuli Jehova ncokuteelede kuzumanana kakutazyibidwe abamwi?

²⁰ Ikuyeeya zintu eezyi nzyotwabandika kulakonzya kumugwasya kulyaaba nobeni kuli Jehova mumupailo. Muntu woonse uumuyanda ncobeni Leza uleelede ‘akwaamba  zyalusyomo ndwajisi mulufwutuko.’ (Ba-Roma 10:10) Ino mbuti mbomunga mwaamba zyalusyomo lwanu?

21, 22. Mbuti mbomunga ‘mwaamba’ zyalusyomo lwanu?

²¹ Amwaambile mulangizi weendelezya mumbungano momubede kuti muyanda kubbapatizyigwa. Uyoocita bubambe bwakuti baalu bamwi bakainduluke mibuzyo andinywe iijatikizya njiisyo zya Bbaibbele zyantalisyo. Ikuti baalu aaba basinizya kuti muleelela, bayoomwaambila kuti mulakonzya kubbapatizyigwa amuswaangano uutobela. * Imakani aapandulula ncolwaamba lubbapatizyo alabandikwa amiswaangano eeyi. Mpoonya mwaambi waambila basikubbapatizyigwa boonse kwiingula mibuzyo yobile iitakatazyi ‘ikwaamba zyalusyomo’ lwabo cakupozya.

²² Ndubbapatizyo lwini ilumuzyibya kubuleya kuti mwakalyaaba kuli Leza akuti lino muli umwi wa Bakamboni ba Jehova. Basikubbapatizyigwa balabbizyigwa cakumaninina mumaanzi ikutondezya caantangalala kubuleya kuti bakalyaaba kuli Jehova.

23. Ino caamba nzi kubbapatizyigwa “muzina lya-Taata alya-Mwana alya-Muuya Uusalala”?

²³ Jesu wakaamba kuti basikwiiya bakwe bakali kuyoobbapatizyigwa “muzina lya-Taata alya-Mwana alya-Muuya Uusalala.” (Matayo 28:19) Eeci caamba kuti sikubbapatizyigwa ulibuzyi bweendelezi mbwajisi Jehova Leza alimwi a Jesu Kristo. (Intembauzyo 83:18; Matayo 28:18) Alimwi uluuzyi mulimo amilimo njuubeleka muuya wa Leza uusalala naa nguzu zibeleka.—Ba-Galatiya 5:22, 23; 2 Petro 1:21.

24, 25. (a) Ino kubbapatizyigwa kwiiminina nzi? (b) Mmubuzyo nzi weelede kwiingulwa?

²⁴ Nokuba boobo, lubbapatizyo takuli kwiile kulinyika buyo mumaanzi pe. Ncitondezyo cacintu cimwi ciyandika kapati.  Ikuba kunsi lyamaanzi kwaamba kuti mwafwa kubukkale bwanu mbomwajisi musyule. Ikununwa kuzwa mumaanzi kwaamba kuti lino mwaba baumi bayooponena kucita kuyanda kwa Leza. Alimwi kamuyeeyede kuti mwakalyaaba kuli Jehova Leza mwini, ikutali kumulimo, icintu, bantu bambi naa mbunga. Ikulyaaba kwanu alimwi alubbapatizyo mmatalikilo aacilongwe cini-cini a Leza—ilumvwano anguwe.—Intembauzyo 25:14.

²⁵ Ikubbapatizyigwa takusinizyi lufwutuko pe. Imwaapostolo Paulo wakalemba kuti: “Musungwaale kukulibelekela lufutuko lwanu cakuyoowa acakuzyangama.” (Ba-Filipi 2:12) Kubbapatizyigwa mmatalikilo buyo. Imubuzyo uukonzya kubuzyigwa ngwakuti, Mbuti mbomunga mwazumanana kukkala muluyando lwa Leza? Cibalo cesu camamanino cilapa bwiinguzi.