Johane 13:1-38
13 Lino akaambo kakuti wakalizyi kalitanacitika Pobwe Lyakwiindilila kuti ciindi cakwe cakalisikide cakuti azwe+ munyika ino akuunka kuli Bausyi,+ Jesu wakali kubayanda bakwe ibakali munyika, wakabayanda kusikila kumamanino.+
2 Kwakali kuligwa cilalilo, eelyo Diabolosi wakalicibikkide kale mumoyo wa Judasi Isikariote+ mwana wa Simoni kuti amwaabe.+
3 Aboobo mbwaanga Jesu wakalizyi kuti Bausyi bakabikkide zintu zyoonse mumaanza aakwe akuti wakazwide kuli Leza alimwi wakali kuunka kuli Leza,+
4 wakanyamuka kutebulu akusamununa zisani zyakwe zyaatala. Mpoonya wakabweza cakulipukutizya akulyaanga mucibuno.+
5 Amane kucita boobo wakabikka maanzi mumutiba wakusambila, akutalika kusanzya maulu aabasikwiiya bakwe akwaapukuta acakulipukutizya ncaakalyaangide mucibuno.
6 Mpoonya wakasika ali Simoni Petro. Walo wakati kulinguwe: “Mwami, sena uyanda kusanzya maulu aangu?”
7 Jesu wakamwiingula kuti: “Ncendicita tocimvwisyi lino pe, pele ulacimvwisya aakale.”
8 Petro wakati kulinguwe: “Kunyina notiisanzye maulu aangu pe.” Jesu wakamwiingula kuti: “Kuti nditakusanzyi,+ nkokuti tojisi lubazu andime.”
9 Simoni Petro wakamwaambila kuti: “O Mwami, utandisanzyi buyo kumaulu, pele kondisanzya akumaanza alimwi akumutwe.”
10 Jesu wakamwaambila kuti: “Kufwumbwa ooyo wasamba kale amubili uyandika kusanzyigwa buyo kumaulu, nkaambo ulisalede mubili woonse. Alimwi nywebo nobaalumi mulisalede, pele kutali nyoonse.”
11 Nkaambo wakalimuzyi muntu wakali kuyanda kumwaaba.+ Ncencico ncaakaambila kuti: “Tamuli nyoonse nomusalala.”
12 Lino naakamana kubasanzya kumaulu akusama zisani zyakwe zyaatala, wakakkala alimwi kutebulu akubabuzya kuti: “Sena mwacizyiba ncondamucitila?
13 Mundiita kuti ‘Mwiiyi’ akuti ‘Mwami,’ alimwi muliluzi nkaambo mbondibede oobo.+
14 Aboobo, ikuti mebo nde Mwami alimwi nde Mwiiyi ndasanzya maulu aanu,+ nkokuti anywebo mweelede kusanzyanya kumaulu.+
15 Nkaambo ndamupa citondezyo, kuti mbubonya mbondamucitila, kamucita mbubonya andinywe.+
16 Ncobeni ndimwaambila masimpe kuti, muzike tali mupati kwiinda simalelaakwe, awalo sikutumwa tali mupati kwiinda yooyo wakamutuma.
17 Ikuti kamuzizyi zintu eezyi, munookkomene ikuti naa kamuzicita.+
18 Tandaambi nyoonse pe; ndilibazyi mbondakasala. Pele nkutegwa luzuzikizyigwe lugwalo ilwaamba kuti:+ ‘Ooyo iwakali kulya cinkwa cangu wandibukila.’+
19 Kuzwa lino ndilamwaambila kacitanacitika, ikutegwa cacitika musyome kuti ndendime nguwe.+
20 Ncobeni ndimwaambila masimpe kuti, kufwumbwa muntu uutambula yooyo ngondatuma wanditambula andime,+ alimwi kufwumbwa muntu uunditambula mebo wamutambula ayooyo wakandituma.”+
21 Naakamana kwaamba zintu eezyi, Jesu wakapenga kapati mumoyo, eelyo wakati: “Ncobeni ndimwaambila masimpe kuti, umwi akati kanu ulandaaba.”+
22 Basikwiiya bakwe bakatalika kulangana kabatazyi ngwaakali kwaamba.+
23 Munsi-munsi a* Jesu kwakakkede umwi wabasikwiiya bakwe, ooyo ngwaakali kuyandisya Jesu.+
24 Aboobo Simoni Petro wakamoobola ooyu akumwaambila kuti: “Kotwaambila muntu ngwaamba.”
25 Aboobo sikwiiya ooyo wakayaama acamba ca Jesu akumubuzya kuti: “O Mwami, ino nguni?”+
26 Jesu wakaingula kuti: “Ngooyo ngonditiipe kankwa nkondisunsa.”+ Eelyo naakasunsa kankwa aako, wakakabweza akukapa Judasi, imwana wa Simoni Isikariote.
27 Eelyo Judasi naakakatambula kankwa aako, Saatani wakamunjila.+ Aboobo Jesu wakamwaambila kuti: “Eeco ncocita kofwambaana kucicita.”
28 Nokuba boobo, kunyina naba omwe akati kabaabo mbaakakkede limwi kutebulu iwakazyi kaambo ncaakamwaambila majwi aaya.
29 Mubwini, ibamwi bakali kuyeeya kuti mbwaanga Judasi nguwakajisi ciyobwedo camali,+ Jesu wakali kumwaambila kuti, “Kaule zintu nzyotuyandika kupobwe,” naa kuti wakeelede kubapa cimwi bacete.
30 Aboobo naakamana kukatambula kankwa, wakazwa mpoonya aawo. Lino akali masiku.+
31 Lino naakazwa, Jesu wakati: “Lino Mwanaamuntu walemekwa,+ alimwi Leza walemekwa kwiinda mulinguwe.
32 Leza mwini ulapa kuti alemekwe,+ alimwi ulapa kuti alemekwe ndilyonya lino.
33 Nobana baniini, ndinooli andinywe kwaciindi cisyoonto. Muyoondiyandaula; alimwi mbubonya mbondakaambila ba Juda kuti, ‘Nkondiya tamukonzyi kusika,’+ anywebo lino mbondimwaambila mbubonya oobo.
34 Ndimupa mulawo mupya, wakuti muyandane; mbubonya mbondali kumuyanda,+ amuyandane mbubonya anywebo.+
35 Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”+
36 Simoni Petro wakamubuzya kuti: “O Mwami, ino uunka kuli?” Jesu wakamwiingula kuti: “Nkonduunka tokonzyi kunditobela lino, pele uyoonditobela aakale.”+
37 Petro wakamwaambila kuti: “O Mwami, ino nkaambo nzi nconditakonzyi kukutobela lino? Ndilatuula buumi bwangu akaambo kanduwe.”+
38 Jesu wakaingula kuti: “Sena ulatuula buumi bwako akaambo kandime? Ncobeni ndikwaambila masimpe kuti, mukombwe katanalila, ulandikaka ziindi zyotatwe.”+
Bupanduluzi buyungizyidwe
^ Mu Chigiriki, “Kucamba ca.”
