Bagalatiya 5:1-26
5 Kristo wakatwaangununa kutegwa tube alwaanguluko oolu. Aboobo, amwiime nji,+ mutazumini kupopwa mujoko lyabuzike alimwi pe.+
2 Amubone! Mebo, nde Paulo ndimwaambila kuti, ikuti naa mwapalulwa, Kristo tacinooli ampindu kulindinywe pe.+
3 Alimwi ndaambila muntu woonse uupalulwa kuti weelede kuutobela Mulawo woonse.+
4 Mulaandaanizyidwe a Kristo, nywebo nomusola kwaambwa kuti muli balulami kwiinda mukutobela mulawo;+ mwakawa kuluzyalo lwakwe.
5 Lino swebo kwiinda mumuuya tulabulindila cakuyandisisya bululami oobo mbotulangila akaambo kalusyomo.
6 Nkaambo mukukamantana a Kristo Jesu, ibupalule naa kutapalulwa zinyina mulimo uuli woonse,+ pele lusyomo ilubeleka antoomwe aluyando ndolujisi mulimo.
7 Mwakali kubalika kabotu.+ Ino nguni wakamulesya kuzumanana kuswiilila kasimpe?
8 Kukombelezya kwamusyobo ooyu takuzwi kuli yooyo uumwiita.
9 Bumena busyoonto bupa kuti mulwi woonse wafulaulu uukandidwe ufwufwumuke.+
10 Ndisyoma kuti nywebo nomukamantene a Mwami+ tamukayeeyi ziimpene anzyondiyeeya; pele ooyo uumupenzya+ kufwumbwa naa nguni, uyoosikilwa lubeta lumweelede.
11 Lino mebo bakwesu, ikuti naa ndicikambauka bupalule, ino nkaambo nzi ncondicipenzyegwa? Nkokuti cagusyigwa cilebyo cijatikizya kukambauka cisamu cakupenzyezya.*+
12 Inga ndalombozya kuti baalumi aabo ibasola kumunyonganya balizibe beni.*
13 Mwakaitwa kulwaanguluko bakwesu; pele mutabelesyi lwaanguluko oolu kuba coolwe cakuzuzikizya zisusi zyanyama,+ pele kwiinda muluyando amubelekelane mbuli bazike.+
14 Nkaambo Mulawo woonse ulazuzikizyigwa* mumulawo omwe wakuti: “Weelede kuyanda simukobonyoko mbubonya mbuli mboliyanda omwini.”+
15 Pele ikuti naa kamuzumanana kulumana akulyana,+ amucenjele kuti mutanyonyoonani pe.+
16 Pele ndaamba kuti, Amuzumanane kweenda amuuya+ eelyo kunyina nomuyoocita zisusi zyanyama naaceya.+
17 Lino zisusi zyanyama zilakazyanya anzyouyanda muuya, alimwi awalo muuya ulakazyanya azisusi zyanyama; eezyi tazyeendelani pe, cakuti tamuziciti zintu eezyo nzyomuyanda kuti mucite.+
18 Kunze lyaboobo, ikuti naa musololelwa amuuya, nkokuti tamweendelezyegwi amulawo pe.
19 Lino milimo yanyama ilalibonya antangalala, njeeyi: bwaamu,*+ busofwaazi, bukkale busesemya,*+
20 kukomba mituni, kusyoma mizimo,*+ businkondo, kuzwangana, munyono, kunyema, kukazyanya, kwaandaana, tukamu twabukombi tuzandukide,
21 kunyonokela, bucakolwa,+ mapobwe aateendelezyeki, alimwi azintu zimbi zili boobu.+ Ndimucenjezyela limwi kujatikizya zintu eezyi, mbubonya mbondakamucenjezya kale, kuti bantu bacita zintu zili boobu tabakanjili mu* Bwami bwa Leza pe.+
22 Pele mucelo wamuuya ngooyu: luyando, lukkomano, luumuno, kukkazika moyo, luzyalo, bubotu,+ lusyomo,
23 kubomba moyo, kulilesya.+ Kunyina mulawo uukasya zintu eezyi pe.
24 Kunze lyaboobo, aabo bazulilwa kuli Kristo Jesu mubili bakaugagaila aacisamu antoomwe akunyomenena kwanguwo alimwi azisusi zyanguwo.+
25 Ikuti katupona kweelana amuuya, atuzumanane alimwi kweenda kabotu amuuya ooyo.+
26 Tutalisumpuli pe,+ tutabusyi mizundano akati kesu,+ alimwi tutafwidilani munyono.
Bupanduluzi buyungizyidwe
^ Amubone Bupanduluzi Bwamabala.
^ Naa “babe bazibe,” kutegwa bateeleli kucita zyaambwa mumulawo ngoonya ngobasumpula.
^ Naa ambweni, “ulaambwa mubufwaafwi.”
^ Naa “koonana ikutali kwamumulawo.” Mu Chigiriki, por·neiʹa. Amubone Bupanduluzi Bwamabala.
^ Naa “bukkale bwakutalisenda.” Mu Chigiriki, a·selʹgei·a. Amubone Bupanduluzi Bwamabala.
^ Naa “bulozi; kubelesya misamu.”
^ Naa “tabakabukoni.”
