Bahebrayo 10:1-39
-
Zipaizyo zyabanyama tiizyakali kugwasya kapati (1-4)
-
Mulawo, ncimvwule (1)
-
-
Cipaizyo ca Kristo cakapegwa ciindi comwe buyo mane kukabe kutamani (5-18)
-
Nzila mpya alimwi iipona yakunjilila (19-25)
-
Tutaleki kuswaangana antoomwe (24, 25)
-
-
Kucenjezyegwa kujatikizya kucita cibi acaali (26-31)
-
Lusyomo lulayandika kutegwa muliyumye (32-39)
10 Lino mbwaanga Mulawo ncimvwule+ buyo cazintu zibotu ziboola,+ pele ikutali zintu eezyo zini-zini, taukonzyi* kubapa kulondoka aabo baboola kuli Leza kwiinda mukuzumanana kutuula zipaizyo nzimunya mwaka amwaka.+
2 Ikuti nocali boobo, sena zipaizyo nozyatakaleka kutuulwa? Nkaambo aabo ibabeleka mulimo uusetekene nobakasalazyigwa ciindi comwe buyo, nobatali kuzumanana kupenga mumizeezo akaambo kazibi.
3 Muciindi caboobo, zipaizyo eezyi nciibalusyo cazibi mwaka amwaka,+
4 nkaambo bulowa bwabapoho abwampongo tabukonzyi kugusya zibi pe.
5 Aboobo naakaboola munyika wakaambila Leza kuti: “‘Zipaizyo alimwi azituuzyo tiiwakaziyanda pe, pele wakandibambila mubili.
6 Tiiwakazikkomanina pe zituuzyo zyuumpwa buumbulu azituuzyo zyacibi.’+
7 Mpoonya ndakati: ‘Bona! Ndaboola, (mubbuku lyakuvwunga kulilembedwe kujatikizya ndime) kuti ndicite kuyanda kwako, O Leza.’”+
8 Kusaanguna naakamana kwaamba kuti: “Tiiwakaziyanda pe nokuba kuzikkomanina zipaizyo azituuzyo alimwi zituuzyo zyuumpwa buumbulu azituuzyo zyacibi—izipaizyo zituulwa kweelana a Mulawo—
9 mpoonya waamba kuti: “Bona! Ndaboola kuti ndicite kuyanda kwako.”+ Wagusya bubambe bwakusaanguna kutegwa atalisye bubambe bwabili.
10 Kwiinda mu “kuyanda”+ ooko, twakasalazyigwa kwiinda mucituuzyo camubili wa Jesu Kristo ciindi comwe buyo kukabe kutamani.+
11 Alimwi, mupaizi woonse ulaima abusena bwakwe buzuba abuzuba kuti abeleke mulimo uusalala*+ alimwi akutuula zipaizyo nzizyonya lyoonse,+ eezyo zitakonzyi kugusya zibi cakumaninina.+
12 Pele muntu ooyu wakatuula cipaizyo cazibi ciindi comwe buyo kukabe kutamani akuyookkala kujanza lyalulyo lya Leza,+
13 kuzwa ciindi eeco wali kulindila kusikila basinkondonyina bakabikkwe kuba cilyatilo camaulu aakwe.+
14 Nkaambo kwiinda mucituuzyo cacipaizyo comwe aabo basalazyigwa wabapa kulondoka+ kukabe kutamani.
15 Kunze lyaboobo, muuya uusalala awalo ulapa bumboni kulindiswe, nkaambo nowamana kwaamba kuti:
16 “‘Eeci ncecizuminano ncendiyoopangana ambabo aakwiinda mazuba aayo,’ mbwaamba Jehova.* ‘Ndiyoobikka milawo yangu mumyoyo yabo, alimwi ndiyakwiilemba mumizeezo yabo.’”+
17 Mpoonya waamba kuti: “Alimwi kunyina pe nondiyooziyeeya limbi zibi zyabo alimwi amicito yabo iitaluleme.”+
18 Lino ikuti eezyi zyalekelelwa, kunyina cituuzyo cacibi ciciyandika.
19 Aboobo bakwesu, mbwaanga tulijisi busicamba bwakweenda munzila iikonzya kutunjizya mubusena busalala+ akaambo kabulowa bwa Jesu,
20 eeyo njaakatujalwida kaili nzila mpya alimwi iipona iyiinda mumulembo wakusitilizya,+ nkokuti mubili wakwe,
21 alimwi mbwaanga tulijisi mupaizi mupati uulanganya ŋanda ya Leza,+
22 atumusikile Leza amyoyo iituba alimwi alusyomo luyumu nta, mbwaanga myoyo yesu yakasansailwa akusalazyigwa kumanjezyeezya mabyaabi+ alimwi mibili yesu yakasanzyigwa amaanzi aasalala.+
23 Atucijatisye coolwe ncotujisi cakwaambilizya bulangizi bwesu antangalala kakunyina kuzungaana,+ nkaambo ooyo wakasyomezya ulasyomeka.
24 Alimwi katubikkilana maano* ikutegwa tukulwaizyanye* kutondezya luyando akucita milimo mibotu,+
25 tutanooleki kuswaangana antoomwe,+ mbuli bamwi ibajisi ciyanza eeci, pele katukulwaizyanya umwi amweenzinyina,+ alimwi atuzumanane kucita boobo ikapati mbomubwene kuti buzuba bwaswena afwaafwi.+
26 Nkaambo ikuti katucita cibi acaali notwamana kutambula luzyibo lwini-lwini lwakasimpe,+ kunyina cipaizyo cimbi cazibi cili coonse cicisyeede pe,+
27 pele kuli buyo bulangizi bwalubeta buyoosya alimwi abukali buyaka mulilo ibuyoonyonyoona baabo ibakazya.+
28 Kufwumbwa muntu uunduluzya Mulawo wa Musa ulajaigwa kakunyina kufwidwa lubomba, ikuti kakuli bumboni bwabantu bobilo naa botatwe.+
29 Aboobo ino muyeeya kuti cinooli cipati buti cisubulo ncayoopegwa muntu ooyo iwalyataula Mwana wa Leza alimwi iwabona bulowa bwacizuminano+ oobo mbwaakasalazyigwa ambubo kuti bunyina mpindu, alimwi iwanyemya akutukila muuya waluzyalo lwa Leza?+
30 Nkaambo tulimuzyi ooyo wakaamba kuti: “Ndime ndisubula; ndime nendiyoopilusya cibi.” Alimwi akuti: “Jehova* uyoobabeteka bantu bakwe.”+
31 Cilayoosya kuwida mumaanza aa Leza uupona.
32 Nokuba boobo, amuzumanane kuyeeya mazuba aakaindi, kuti eelyo nomwakamana kumunikilwa,+ mwakaliyumya munkondo mpati alimwi amumapenzi.
33 Zimwi ziindi mwakali kusampaulwa akupenzyegwa antangalala,* alimwi aziindi zimwi mwakali kupengela antoomwe abaabo ibakali kucitikilwa zintu zili boobo.
34 Nkaambo mwakabeetelela aabo ibakali muntolongo alimwi cakukondwa mwakazumina kunyangwa lubono lwanu+ akaambo kakuzyiba kuti nywebo mujisi lubono lwiinda kubota alimwi lutamani.+
35 Aboobo mutabusowi pe busicamba bwanu,* oobo ibuyoomuletela bulumbu bupati.+
36 Nkaambo muyandika kuliyumya,+ ikutegwa mwamanizya kucita kuyanda kwa Leza, mukatambule zintu eezyo izyakasyomezyegwa.
37 Nkaambo kusyeede buyo “kaindi kaniini,”+ eelyo “ooyo uuboola ulasika alimwi takoomuka pe.”+
38 “Pele mululami wangu uyoopona akaambo kalusyomo,”+ alimwi, “ikuti naa wapiluka cifwuteesule, mebo tandibotelwi anguwe pe.”+
39 Lino swebo tatuli baabo ibapiluka cifwuteesule kulunyonyooko,+ pele tuli baabo ibajisi lusyomo oolo lutola kulufwutuko lwabuumi bwesu.
Bupanduluzi buyungizyidwe
^ Naa ambweni, “bantu tabakonzyi.”
^ Naa “abeleke mulimo wabuleya.”
^ Amubone Makani Aayungizyidwe A5.
^ Naa “katuyeeyana.”
^ Naa “tuyumizyanye.”
^ Amubone Makani Aayungizyidwe A5.
^ Mu Chigiriki, “mbuli mubbuwa lyazisobano.”
^ Mu Chigiriki, “lwaanguluko lwakwaambaula cakutayoowa.”
