ʻUluaki Tīmote 2:1-15
2 Ko e ʻuluaki meʻá leva, ʻoku ou enginaki atu ko e ngaahi hū tōtōaki, ngaahi lotu, ngaahi hūfekina, mo e ngaahi fakafetaʻí ke fai ia fekauʻaki mo e faʻahinga kotoa pē ʻo e tangatá,
2 fekauʻaki mo e ngaahi tuʻí pea mo e faʻahinga kotoa ʻoku nau ʻi he ngaahi tuʻunga māʻolungá,*+ koeʻuhi ke tau hoko atu ai ʻi ha moʻui nonga mo fiemālie fakataha mo e anga-līʻoa fakaʻotua kakato mo e fakamātoato.+
3 ʻOku lelei mo fakahōifua eni ʻi he vakai ʻa hotau Fakamoʻuí, ʻa e ʻOtuá,+
4 ʻa ia ko hono finangaló ia ke fakahaofi ʻa e faʻahinga kakai kotoa pē+ pea ke nau aʻusia ha ʻilo totonu ki he moʻoní.
5 He ʻoku taha ʻa e ʻOtuá,+ pea taha ʻa e fakalaloa+ ʻi he vahaʻa ʻo e ʻOtuá mo e tangatá,+ ko ha tangata, ko Kalaisi Sīsū,+
6 ʻa ia naʻá ne foaki ʻa ia tonu ko ha huhuʻi fehoanakimālie maʻá e faʻahinga* kotoa pē+—ko e meʻa ʻeni ʻe fai ʻa e fakamoʻoni ki ai ʻi hono taimi totonu.
7 He ko e taumuʻa ʻo e faifakamoʻoni+ ko ení naʻe fakanofo ai au ko ha tokotaha malanga mo ha ʻapositolo+—ʻoku ou tala atu ʻa e moʻoní, ʻoku ʻikai te u loi—ko ha faiako ʻo e ngaahi puleʻangá+ ʻi he meʻa fekauʻaki mo e tuí pea mo e moʻoní.
8 Ko ia ʻoku ou loto ke hokohoko atu ʻa e kau tangatá ʻi he feituʻu kotoa pē ʻi he lotú, ʻo hiki hake ʻa e nima mateaki,+ ʻo ʻikai ʻi he ʻita+ mo e fakakikihi.+
9 Pehē foki, ʻoku totonu ki he kakai fefiné ke nau teuʻaki ʻa e kofu ʻoku feʻunga ke ʻai,* fakataha mo e anga-fakanānā mo e fakakaukau lelei,* ʻo ʻikai ʻaki ʻa e ngaahi sitaila ʻo e fī ʻo e ʻulú mo e koula pe ngaahi mataʻitofe pe vala totongi mamafa ʻaupito,+
10 ka ke nau teuʻi kinautolu ʻi ha founga ʻoku taau mo e kakai fefine ʻoku nau taku ʻoku nau anga-līʻoa ki he ʻOtuá.+ Kuo pau ke nau fai ʻa e ngaahi ngāue lelei, pea ʻe lava ke hoko eni ko honau teungá ia.
11 Tuku ki ha fefine ke ne fakalongo* pē mo moʻulaloa kakato ʻi hono akoʻi iá.+
12 ʻOku ʻikai te u fakaʻatā ha fefine ke faiako pe ke ne pule ki ha tangata, ka ke ne nofo fakalongo* pē.+
13 He ko ʻĀtama naʻe ʻuluaki ngaohí, pea toki hoko ʻa ʻIvi.+
14 Pehē foki, naʻe ʻikai ke kākaaʻi ʻa ʻĀtama, ka naʻe kākaaʻi fakaʻaufuli+ ʻa e fefiné peá ne hoko ai ko ha tokotaha faihala.
15 Kae kehe, ʻe malu ai pē ʻa e fefiné ʻi heʻene hoko ko ha faʻeé,+ kapau te ne* hokohoko atu ʻi he tuí mo e ʻofá mo e māʻoniʻoní fakataha mo e fakakaukau lelei.*+
Fakamatala ‘i Lalo
^ Pe “ʻi he ngaahi tuʻunga mafaí.”
^ Pe “faʻahinga kakai.”
^ Pe “taau.”
^ Pe “fakafuofua lelei; fakapotopoto.”
^ Pe “sīlongo; anga-malū.”
^ Pe “anga-malū; sīlongo.”
^ Fakafoʻilea, “te nau.”
^ Pe “fakafuofua lelei; fakapotopoto.”
