No uunoren mo la ray estandarte na Biblia tan manggagawa kay paraan pian nakaarom so Dios, natural labat ya isipen mo lay manpabautismo. Balet, panon mon amta no kasin akaparaan ka la parad satan? a

Diad sayan artikulo

•  Panon karakel so kaukolan ya amtak?

•  Anto kasi dapat ya gagawaen ko?

•  No antoy ibabaga na arum ya kabataan

 Say pamparaan parad bautismo et aliwan singa diad eskuelaan ya kaukolan moy man-memorize na dakel ya bengatla pian makapasa ed exam. Balet, kaukolan mon usaren so ‘pakayarim a mankatunongan’ pian mas lalo kan nakombinse ya tua so ibabangat na Biblia. (Roma 12:1) Singa bilang:

•   Kasin kombinsido ka ya walay Dios tan nepeg labat ya dayewen mo?

   Oniay ibabaga na Biblia: “Siopaman ya onaasingger ed Dios et nepeg a manisia a sikatoy wala tan tumangan to iramay masimoon a manaanap ed sikato.”—Hebreo 11:6.

   Tepetay sarilim: ‘Akin et manisia ak ed Dios?’ (Hebreo 3:4) ‘Akin et dapat labat ya iter kod sikatoy panagdayew ko?’—Apocalipsis 4:11.

   Kasin kaukolan moy tulong? Nengnengen so “Walay Nanggawa o Ebolusyon Labat?—Part 1: Akin et Dapat Mon Panisiaan so Dios?”

•   Kasin kombinsido ka ya nanlapud Dios so mensahe na Biblia?

   Oniay ibabaga na Biblia: “Say interon Kasulatan et impuyan na Dios tan makagunggona parad panagbangat, pananimbawa, panangipetek, panagdisiplina unong ed inkatunong.”—2 Timoteo 3:16.

   Tepetay sarilim: ‘Akin et manisia ak ya say Biblia et aliwan libro ya nanlapud too?’—Isaias 46:10; 1 Tesalonica 2:13.

   Kasin kaukolan moy tulong? Nengnengen so “Panon Ak ya Natulongan na Biblia?—Part 1: Diskobrem so Bibliam”

•   Kasin kombinsido ka ya uusaren nen Jehova so Kristianon kongregasyon pian sumpalen so gagala to?

   Oniay ibabaga na Biblia: “Nigloria komon [so Dios] diad panamegley na kongregasyon tan diad panamegley nen Kristo Jesus, diad amin a henerasyon ya anggad angga.”—Efeso 3:21.

   Tepetay sarilim: ‘Kasin say pangipapasen kod saray nanaaralan kod Biblia diad Kristianon pantitipon et manlalapud saray totoo odino manlalapud si Jehova?’ (Mateo 24:45) ‘Kasin mimiaral ak anggano agmakapiaral iray atateng ko (no payagan da kan onla)?’—Hebreo 10:24, 25.

   Kasin kaukolan moy tulong? Nengnengen so “Akin ya Maong no Onla Kad Kingdom Hall?”

 Agmo kaukolan so magmaliw ya perpekto pian nabautismoan ka. Balet, kaukolan mon ipanengneng ya talagan labay mon ‘ipulisay so kaugsan tan gawaen so kamaongan.’ (Salmo 34:14) Singa bilang:

•   Kasin uunoren mo ray estandarte nen Jehova?

   Oniay ibabaga na Biblia: “Pansiansia yon malinis so konsiensia yo.”—1 Pedro 3:16.

   Tepetay sarilim: ‘Kasin nanengneng ed siak ya say “pakayarik a manebek” et ‘nipasal a mangibiig ed duga tan aliwa’?’ (Hebreo 5:14) ‘Kasin wala ray panaon ya agak nampa-pressure ya manggaway aliwa? Kasin saray pipilien kon kakaarok et papasesegen da ak ya manggaway duga?’—Proverbio 13:20.

   Kasin kaukolan moy tulong? Nengnengen so “Panon Kon Ipasal so Konsiensiak?”

•   Kasin natatalosan mo ya walay eebatan mod si Jehova diad saray gagawaen mo?

   Oniay ibabaga na Biblia: “Kada sakey ed sikatayo et walaan na eebatan ed Dios.”—Roma 14:12.

   Tepetay sarilim: ‘Kasin matua ak ed sarilik tan ed arum?’ (Hebreo 13:18) ‘Kasin aaminen ko no wala ray nagagawaan kon kasalanan, odino iyaamot ko iratan odino itetetel kod arum?’—Proverbio 28:13.

   Kasin kaukolan moy tulong? Nengnengen so “Paano Ko Haharapin ang Aking mga Pagkakamali?”

•   Kasin papaeleten moy pikakaarom ed si Jehova?

   Oniay ibabaga na Biblia: “Onapit kayo ed Dios, tan sikatoy onapit ed sikayo.”—Santiago 4:8.

   Tepetay sarilim: ‘Anto ray gagawaen ko pian onapit ak ed si Jehova?’ Singa bilang, ‘Panon kabetbet so pambabasak na Biblia?’ (Salmo 1:1, 2) ‘Kasin manpipikasi ak ya naynay?’ (1 Tesalonica 5:17) ‘Kasin espisipiko iray pikakasik? Kasin saray kaarok et kaaro met nen Jehova?’—Salmo 15:1, 4.

   Kasin kaukolan moy tulong? Nengnengen so “Panon Ak ya Natulongan na Biblia?—Part 2: Gawam ya Makapa-enjoy so Pambasam na Biblia” tan “Akin et Dapat ya Manpikasi Ak?”

 TIP: Pian natulongan kan manparaan parad bautismo, basam so kapitulo 37 na libron Ang mga Tanong ng mga Kabataan—Mga Sagot na Lumulutas, Tomo 2. Nengnengen so worksheet ed pahina 308 tan 309.