“Nen kakkayari min nan-break na datin girlfriend ko,” kuan nen Steven, “singa agko nakaya. Aman lay sankasakitan ya agawad bilay ko.”

 Ontan met so agawad sika? No on, natulongan ka na sayan artikulo.

•  No antoy naliknam

•  No antoy nagawaan mo

 No say saninaro et nan-break, pareho ran nasakitan.

•  No sikay angi-break, seguro maka-relate ka ed si Jasmine ya angibagan, “Lapud amtak ya asakitan koy laki ya nagmaliw ya importante ed siak, nakokonsiensia ak tan naisip ko ya agko la ’ya labay ya naulit.”

•  No aliwan sikay angi-break, seguradon natalosan mo no akin ya ibabaga na arum ya singa ra inateyan nen im-break ira na inaro da. “Abayag so impanermen ko tan nandurumay aliknak,” so kuan na kabataan ya si Janet, “agak makapanisiad agawa, mansyodot ak ya maong, mikakasi ak ya ikdan to ak lamet na chance, a-depress ak, tan ngalngali sakey taon antis kon atanggap.”

 No antoy realidad: Say pan-break na saninaro et manresultad ermen tan depresyon. Oniay imbaga na sakey ya nansulat ed Biblia: “Say nagogonigon ya espiritu et mangupot na biskeg.”​—Proverbio 17:22.

•  Mitongtong kad mature ya pantitiwalaan mo. Ibabaga na Biblia: “Say tuan kaaro et mangaaro ed amin a panaon, tan sakey ya agi a nailaloan diad panaon na gonigon.” (Proverbio 17:17) No ibagam so naliliknam ed ateng mo odino mature ya kaarom, natulongan da kan natalosan so agawa.

   “Pigaran bulan ya iniwasan koy miulop ed arum tan anggapon balot so angibagaan koy naliliknak. Pero makatulong manaya iray kakaaro pian makapanmove-on. Nen imbagak ed sikaray naliliknak, diman labat linmemew so liknaan ko.”​—Janet.

•  Makaaral ed agawa. Oniay ibabaga na sakey ya proverbio ed Biblia: “Onggamor kay karunongan, onggamor kay pakatalos.” (Proverbio 4:5) No wala ray aliwliwan agawad bilay mo, mas nakabat moy sarilim tan naaral mo no panon mon nasarag so pakakadismaya.

   “Kayari min nan-break, walay kaarok ya tinepetan to ak, ‘Antoy naaralan mod relasyon yo ey, tan panon mon usaren itan no bilang ta miinaroan ka lamet?’”​—Steven.

•  Manpikasi. Ibabaga na Biblia: “Ipasakbat mod si Jehova so ambelat ya awit mo, tan tulongan to ka.” (Salmo 55:22) Makatulong so pampikasi pian nasarag moy ermen tan makaaral kad impan-break yo.

   “Manpikasi kan lanang. Natatalosan nen Jehova so sakit ya naliliknam tan mas amta toy talagan agawa.”​—Marcia.

•  Ontulong ed arum. Ibabaga na Biblia ya: ‘Anapen so pankaabigan na arum, aliwan say pankaabigan yo labat.’ (Filipos 2:4) No busy kan ontutulong ed arum, mas maples mon natalosan ya wala ni ray mas importantin imanoen mo nen say impan-break yo.

   “No nan-break kayo na inarom, singa la katapusan na mundo, tan mas grabe ni sakit to nen say sakit ed laman. Pero kalkalna manayan nabalang so sakit. Kaukolan labat ya palabasen so panaon tan gawaey anggaay nayarian ya makamove-on.”​—Evelyn.