TEPET NA SARAY KABATAAN
Panon Kon Ipasal so Konsiensiak?
Dinan ed saraya so nayarin pangikomparaan mo ed konsiensiam?
kompas
espiho
kaaro
judge
Duga iratan ya apat. Ipaliwawa ed sayan artikulo no akin.
Anto so konsiensia?
Say konsiensia so mangidikta ed sika no antoy duga tan aliwa. Singa itan ‘ganggan a nisulat ed kapusoan na totoo,’ so imbaga na Biblia. (Roma 2:15, Say Biblia) Say konsiensia ya impasal ed panggaway maong so ontulong ed sika pian makapanggawa kay dugan desisyon odino nausisam no kasin duga so ginawam ya desisyon.
Say konsiensia et singa kompas. Satan so mangigiya ed sika ed dugan direksion pian napaliisan mo iray peligro.
Say konsiensia et singa espiho. Ipapanengneng na satan no antoy papanisiaan mo ya duga tan aliwa, tan ipapaamta met na satan no anton talagay inkatoom.
Say konsiensia et singa sakey ya maong a kaaro. Nayarin mangiter itan na maong iran bilin tan tulongan to kan magmaliw ya maliket—no dengelen mo.
Say konsiensia et singa sakey a judge. Ipaamta to ed sika no walay aliwan ginawam.
No impasal moy konsiensiam ed panggaway maong, natulongan ka ya makapandesisyon na duga.
Tandaan: Say konsiensiam et makatulong ed sika pian (1) makapanggawa kay dugan desisyon tan (2) bidbiren so lingom tan ipetek itan.
Akin ya kaukolan mon ipasal so konsiensiam?
Ibabaga na Biblia ya kaukolan tayon ‘pansiansiaen a malinis so konsiensia tayo.’ (1 Pedro 3:16) Mairap itan ya gawaen no agmo ni impasal so konsiensiam.
“Titilaan koy atateng ko no iner ak oonla tan isesekretok itan. Nen unaan et nakokonsiensia ak, balet nen ombabayag la, pakaliknak et singa anggapo met so makapuy ed saray gagawaen ko.”—Jennifer.
Ag-abayag, pinakiwas si Jennifer na konsiensia to pian ibaga toy tua ed atateng to tan tundaan to lay pantitila to ed sikara.
Isipen pa: Kapigan komon pinakiwas si Jennifer na konsiensia to ya gawaen so duga?
“Mairap tan makapa-stress so doblin panagbilay. No inabuloyan ka na konsiensiam ya manggawa na anggan sakey labat ya makapuy a desisyon, mas mainomay moy manggawa lamet na sakey nin makapuy ya desisyon.”—Matthew.
Wala ray totoo ya mangibabaliwala ed ibabaga na konsiensia ra. “Agla ran balot makakaliknay kababaingan,” so kuan na Biblia. (Efeso 4:19) Oniay impangipatalos ed satan na bersion na Biblia ya Maung a Balita: “Anggapo lan balut so kababaingan da.”
Isipen pa: Kasin talagan maliket iramay totoon agnakokonsiensia no walay ginawa ran aliwa? Anto ray probleman agda napaliisan?
Tandaan: Pian napansiansiam so maong ya konsiensia, kaukolan ya niwalad sika so ‘pakayari ya manebek ya impasal a mangibiig ed duga tan aliwa.’—Hebreo 5:14.
Panon mon ipasal so konsiensiam?
Pian nipasal moy konsiensiam, kaukolan ya walay tutumboken mon estandarte ya pangikomparaan mo na saray kiwas mo. Saray arum a totoo et ontutumbok ed saray estandarte na:
pamilya tan kultura ya binalegan da
kakaaro da
saray sikat ya artista
Balet, say estandarte na Biblia et mas superyor nen say dinanman ya estandarte. Agla itan pankelawan ta say Biblia et “impuyan na Dios,” samay Sakey ya amalsa ed sikatayo tan amta to no antoy sankaabigan parad sikatayo.—2 Timoteo 3:16.
Nia ray pigaran alimbawa.
ESTANDARTE NA DIOS: “Labay mi manbilay a matua ed amin a bengatla.”—Hebreo 13:18.
Antoy epekto na satan ed konsiensiam no natutukso kan mansaol diad exam, mantila ed atateng mo, odino mantakew?
No ididikta na konsiensiam ya magmaliw ka ya matua ed amin a bengatla, antoy nayarin nitulong na satan ed sika, natan tan diad arapen?
ESTANDARTE NA DIOS: “Ibatikan yoy seksual ya imoralidad.”—1 Corinto 6:18.
Antoy epekto na satan ed konsiensiam no natutukso kan manbantay na pornograpiya odino misekso ya agni kasal?
No ididikta na konsiensiam ya arawian moy seksual ya imoralidad, antoy nitulong na satan ed sika, natan tan diad arapen?
ESTANDARTE NA DIOS: “Ipanengneng yoy kaabigan ed sakey tan sakey, magmaliw kayon maabagey, a mabulos kayon manpeperdonaan.”—Efeso 4:32.
Panon kan natulongan na sayan estandarte no walay agpantatalosan yo nen agim odino kaarom?
No papakiwasen ka na konsiensiam ya perdonaen tan kasian so arum, antoy nitulong na satan ed sika, natan tan diad arapen?
ESTANDARTE NA DIOS: “Kabusol [nen Jehova] so siopaman a mangaarod inkaruksa.”—Salmo 11:5.
Panon kan natulongan na satan ya estandarte no manpipili ka na saray pelikula, palabas ed TV, tan saray video game?
No papakiwasen ka na konsiensiam ya iwasan iray bayolentin panagligliwaan, antoy nitulong na satan ed sika, natan tan diad arapen?
EKSPERIENSYA: “Wala ray kakaarok ya manggagalaw na bayolentin video games, tan ontan ak met. Balet binawalan ak nen papak ya galawen iratan. Kanian manggagalaw ak labat no ombibisita ak ed saray kakaarok. Kasempet kod abung mi, anggapoy ibabagak ed atateng ko nipaakar ed satan. No kukumustaen ak nen papak, ibabagak ya ayos ak labat. Aminsan, binasak so Salmo 11:5 tan biglan akonsiensia ak ed saray ginawak. Naisip ko ya kaukolan kon itunda so panggalaw ed saraman ya video game. Kanian intundak la. Nen anengneng na saray kakaarok ya agak la manggagalaw na saray bayolentin video game, apakiwas iran itunda met la itan.”—Jeremy.
Isipen pa: Kapigan ginmapon alikna nen Jeremy so pakakakonsiensia to tan kapigan to dinengel so ididikta na konsiensia to? Antoy naaralan mo ed eksperiensya nen Jeremy?
Tandaan: Ipapanengneng na konsiensiam no siopa ka tan no anto ray papanisiaan mo. Antoy ipapaamta na konsiensiam nipaakar ed sika?
Ompan Nagustoan Mo Met
NO ANTOY IBABAGA NA ARUM YA KABATAAN
Basiyan na Papanisiaan Tayo—Estandarte na Dios Odino Too?
Istoryaen na saray kabataan ya adulto no panon dan naiwasan iray aliwliwan nansumpalan na dakel ed saray kaklase da.
NO ANTOY IBABAGA NA ARUM YA KABATAAN
Say Ibabaga na Arum ya Kabataan ed Pambasa na Biblia
No maminsan et ompan agmo labay so manbasa, pero sulit so pambasa na Biblia. Imbaga na apatiran kabataan no anto ray maong ya resulta na pambabasa day Biblia.
TEPET NA SARAY KABATAAN
Panon Ak ya Natulongan na Biblia?—Part 1: Diskobrem so Bibliam
No walay nalmom ya baleg tan daan ya pananginan ya antam ya napnapnoy kayamanan, di ba na-curious ka no anto ray wadtan? Say Biblia et napnapno met na kayamanan. Dakel so mabmablin karunongan ya wadtan.
