Ed Saray Taga Roma 14:1-23
14 Awat yo so toon maletey so pananisia to,+ balet agyo uukomen no midumaan iray opinyon to.*
2 Walay sakey a too a walaan na pananisian sarag ton kanen so amin a naakan, balet samay toon maletey et pisipising labat so kakanen to.
3 Samay mamangan et agto komon balawen imay agmamangan, tan samay agmamangan et agto komon ukomen imay mamangan,+ ta sikatoy inawat la na Dios.
4 Siopa ka a mangukom ed lingkor na arum?+ Balanglan sikatoy onalagey odino natumba, say katawan to lay makauley.+ On, sikatoy makaalagey, ta nayarian nen Jehova* ya ipaalagey.
5 Walay sakey a too ya ipapasen ton mas importante so sakey ya agew nen say arum;+ wala met so too ya ipapasen ton say sakey ya agew et pareho ed arum;+ komon ta balang sakey et kombinsido a dugay papanisiaan to.
6 Samay manngingilin ed satan ya agew et ngingilinan to itan parad si Jehova.* Ontan met, samay mamangan et mamangan parad si Jehova,* ta sikatoy misasalamat ed Dios;+ tan samay agmamangan et agmamangan parad si Jehova,* ingen ta misasalamat ed Dios.+
7 Diad tua, anggapo ed sikatayo so manbibilay parad sarili to labat,+ tan anggapo so ompatey parad sarili to labat.
8 Ta no manbibilay itayo, manbibilay itayo parad si Jehova,*+ tan no ompatey itayo, ompatey itayo parad si Jehova.* Kanian no manbibilay itayo tan no ompatey itayo, kien itayo nen Jehova.*+
9 Ta si Kristo et inatey tan inmolid bilay, pian sikatoy magmaliw a Katawan na saray inaatey tan saray mabilay.+
10 Balet akin et uukomen moy agim?+ Odino akin et babalawen mo met so agim? Ta amin tayo et onarap ed panangukoman na Dios.+
11 Ta nisulat: “‘Unong a mabilay ak,’+ kuan nen Jehova,* ‘amin a pueg et ontalimukor ed siak, tan amin a dila et ipaamta ran bibidbiren day Dios.’”+
12 Kanian sirin, kada sakey ed sikatayo et walaan na eebatan ed Dios.+
13 Kanian agtayo la komon uukomen so sakey tan sakey,+ noagta magmaliw tayon determinado ya agmangiyan na pakagapolan odino bengatlan makaamper ed sakey ya agi.+
14 Amtak tan manisia ak ed Katawan a Jesus ya anggapoy bengatlan sipor a marutak;+ likud labat no ipapasen na sakey a too a marutak so sakey a bengatla, marutak itan parad sikato.
15 Ta no nasakitan moy agim lapud kakanen, aliwa lan unong ed aro so gagawaen mo.+ Agmo dederalen so agim lapu labat ed kakanen mo ta inatey si Kristo parad sikato.+
16 Kanian, agyo aabuloyan a say maong a gagawaen yo et ibaga ran mauges.
17 Ta say Panarian na Dios et aliwan nipaakar ed panangan tan panag-inum,+ noag ingen nipaakar ed inkatunong tan kareenan tan liket diad panamegley na masanton espiritu.
18 Ta siopaman a manpapaaripen ed Kristo diad onian paraan et makapaliket ed Dios tan aabobonan na totoo.
19 Kanian sirin, seetan tayon gawaen iray bengatlan mamapawala na kareenan+ tan saray bengatlan makapabiskeg ed sakey tan sakey.+
20 Tundaan mo lay panederal ed kimey na Dios nisengeg labat ed kakanen.+ Tua, amin a bengatla et malinis, balet pakaderalan na* sakey a too so pangan to no pakagapolan itan na arum.+
21 Say sankaabigan et agka mamangan na karne odino oniinum na alak odino manggagaway antokaman a pakagapolan na agim.+
22 Say pananisian walad sika et ikanam labat ed sarilim diad arapan na Dios. Maliket so too ya agto kokondenaen so sarili to lapud samay denesidi ton gawaen.
23 Balet no sikatoy mangan anta manduaruwa, sikatoy akondena la, lapud sikatoy mamangan ya aliwan unong ed pananisia. On, amin a bengatla ya aliwan unong ed pananisia et kasalanan.
Paimanod leksab
^ Odino posiblin, “no manduaruwa ed puso to.”
^ Nengnengen so Apendise A5.
^ Nengnengen so Apendise A5.
^ Nengnengen so Apendise A5.
^ Nengnengen so Apendise A5.
^ Nengnengen so Apendise A5.
^ Nengnengen so Apendise A5.
^ Nengnengen so Apendise A5.
^ Nengnengen so Apendise A5.
^ Odino “aliwan maabig ed.”
