၁-၃။ (က) အဘိဂဲလရဲ့ အိမ်ထောင်​အပေါ် အန္တရာယ်​ကျရောက်​ဖို့​အကြောင်း ဘယ်လို ဖြစ်ပေါ်လာ​သလဲ။ (ခ) ထူးခြားတဲ့ ဒီ​အမျိုးသမီး​အကြောင်း ဘာ​သိရ​မလဲ။

အ​ဘိ​ဂဲ​လ​ဟာ အထိတ်​တ​လန့်​ဖြစ်​နေ​တဲ့ လူငယ်​တစ်ဦးကို တွေ့​လိုက်​တယ်။ တ​ကယ်​လည်း ထိတ်လန့်​စ​ရာ​ပါ​ပဲ။ အန္တရာယ်​ဆိုး​ကြီး ကျ​ရောက်​တော့​မယ်။ အ​ဘိ​ဂဲ​လ​ရဲ့​ခင်​ပွန်း နာဗလ​ရဲ့​အိမ်​မှာ​ရှိ​တဲ့ ယောက်ျား​အားလုံး​ကို​သတ်​ဖို့ လာ​နေတဲ့ စစ်​သူ​ရဲ ၄၀​၀ လောက်​ကို အဲဒီ​လူငယ် အခု​ပဲ လမ်း​မှာ တွေ့​လာ​ခဲ့​တယ်။ သူတို့​ကို ဘာ​ကြောင့် သတ်​ချင်​နေ​ရ​တာ​လဲ။

^၂ နာဗလ​ကြောင့်​ပဲ။ သူဟာ ခါ​တိုင်း​လို​ပဲ ခက်ခက်​ထန်​ထန် မောက်မောက်မာမာ ပြုမူ​ပြောဆို​ခဲ့​တယ်။ ဒီ​တစ်ခါ​တော့ သူ ရိုင်းရိုင်းစိုင်းစိုင်း ဆက်ဆံ​ခဲ့​သူက ရိုးရိုး​လူ မဟုတ်ဘူး။ စစ်ရည်ဝနေတဲ့ သစ္စာရှိ စစ်သည်​တစ်စု​ရဲ့ ရိုသေ​လေးစား​ခံရတဲ့ တပ်မှူး​ဖြစ်နေတယ်။ အခုတော့၊ နာဗလရဲ့ သိုးထိန်း​တစ်ယောက် ဖြစ်နိုင်တဲ့ ဒီ​လူငယ်​က အဘိဂဲလ​များ ကယ်​နိုင်မလား​ဆိုပြီး အားကိုး​တ​ကြီး​နဲ့ ရောက်လာတယ်။ ဒါပေမဲ့ အမျိုးသမီး​တစ်ယောက်က လက်နက်ကိုင် စစ်တပ်​ကို ဘယ်လို တားဆီး​နိုင်မှာလဲ။

^၃ ဦးဆုံး​အနေနဲ့ ဒီ​ထူးခြားတဲ့ အမျိုးသမီး​အကြောင်း နည်းနည်း လေ့လာ​ကြည့်ကြစို့။ အဘိဂဲလ​ဟာ ဘယ်သူ​လဲ။ အဲဒီ ဘေးကျပ်နံကျပ် အခြေအနေ ဘယ်လို ဖြစ်လာ​သလဲ။ သူ့ရဲ့​ယုံကြည်ခြင်း စံနမူနာ​ကနေ ဘာသင်ယူနိုင်သလဲ။

၄။ နာဗလဟာ ဘယ်လို လူစားမျိုး​လဲ။

^၄ အဘိဂဲလ​နဲ့ နာဗလ​တို့ စုံတွဲဟာ လုံးဝ မလိုက်ဖက်​ဘူး။ နာဗလဟာ အဘိဂဲလ​ထက်သာ​တဲ့ ဇနီးကို ရ​နိုင်မှာ​မဟုတ်သလို အဘိဂဲလကလည်း နာဗလ​ထက်​ဆိုးတဲ့ လင်​ယောက်ျား ရှာတွေ့​နိုင်မှာ မဟုတ်ဘူး။ နာဗလဟာ ချမ်းသာတဲ့​အတွက် သူ့ကိုယ်သူ သိပ်​အရေးပါ​သူ​လို့ ရှုမြင်​ပေမဲ့ တခြား​သူတွေက သူ့ကို ဘယ်လို ရှုမြင်​သလဲ။ ကျမ်းစာထဲမှာ သူ့​လောက် အထင်အမြင်​သေး​ခံရတဲ့ စကားလုံးတွေ​နဲ့ အခေါ်​ခံရတဲ့​သူက ခပ်ရှားရှား​ပဲ။ သူ့​နာမည်ကို​က “အသိတရား​မရှိခြင်း၊” “မိုက်မဲခြင်း” လို့​အဓိပ္ပာယ်​ရှိတယ်။ အဲဒီ​နာမည်ကို သူ​မွေး​ကတည်းက မိဘတွေ ပေးတာလား ဒါမှ​ မဟုတ် သူ့​စရိုက်နဲ့ လိုက်ဖက်​လို့ အဲဒီ​နာမည်​ဆိုး ရလာ​တာ​လား မသိ​ရပေမဲ့ သူဟာ နာမည်​နဲ့​လိုက်​အောင် မိုက်တဲ့​သူပဲ။ နာဗလဟာ “ခက်ထန်​တဲ့​အပြင် စရိုက်လည်း ကြမ်းတယ်။” အနိုင်ကျင့် ဗိုလ်ကျ​တတ်တဲ့ အရက်သမား​ဖြစ်လို့ လူအများ​က သူ့ကို ကြောက်​ပြီး ကြည့်​မရကြဘူး။—၁ ရှ. ၂၅:၂၊ ၃၊ ၁၇၊ ၂၁၊ ၂၅။

၅၊ ၆။ (က) အဘိဂဲလရဲ့ အကောင်းဆုံး အရည်အသွေးတွေ​က ဘာ​ဖြစ်မယ်လို့ ထင်သလဲ။ (ခ) အ​ဘိဂဲလ​ဟာ ဘာကြောင့် နာဗလ​နဲ့ လက်ထပ်ခဲ့​တာ ဖြစ်မလဲ။

^၅ အဘိဂဲလ​ကျတော့ နာဗလ​နဲ့ တခြား​စီ​ပဲ။ သူ့​နာမည်က “အဖေဟာ သူ့ကိုယ်သူ ဝမ်းသာ​စေတယ်” လို့​အဓိပ္ပာယ်​ရှိတယ်။ အဖေ​တွေဟာ သမီး​ချော​လေး​ရလို့ ဝမ်းသာ​တတ်ကြတယ်။ ပညာ​ရှိတဲ့ အဖေ​ဆိုရင် စိတ်ထား​လှတဲ့ သမီး​အတွက် ပိုပြီး​တောင် ဂုဏ်ယူ​ဝမ်းမြောက်​မှာ​ပဲ။ အများအားဖြင့်​တော့ ရုပ်ရည်လှတဲ့​သူဟာ မြော်မြင်​ချင့်ချိန်နိုင်စွမ်း၊ ဉာဏ်ပညာ၊ ရဲစွမ်းသတ္တိ၊ ယုံကြည်​ခြင်း စတဲ့​အရည်အသွေးတွေကို မွေးမြူဖို့ လိုတယ်​ဆိုတာ သဘောမပေါက်​တတ်ကြဘူး။ အဘိဂဲလ​ကတော့ အဲဒီလို​မဟုတ်ဘူး။ ဉာဏ်​အမြော်အမြင်​ရှိပြီး ချောမော​လှပတဲ့​အတွက် သူ့ကို ကျမ်းစာမှာ ချီးမွမ်း​ထားတယ်။—၁ ရှမွေလ ၂၅:၃ ကိုဖတ်ပါ။

^၆ ထက်မြက်​တဲ့ ဒီ​အမျိုးသမီးငယ်ဟာ ဒီလို​အသုံးမကျတဲ့​လူကို ဘာကြောင့် လက်ထပ်​တာလဲ​လို့ တချို့ တွေးမိမှာပဲ။ ကျမ်းစာ​ခေတ်​က သားသမီးတွေကို မိဘတွေက အိမ်ထောင်ချ​ပေး​တတ်ကြတယ်။ အဲဒီလို မဟုတ်​ရင်တောင် မိဘတွေရဲ့ သဘော​တူညီချက်​က အဓိကကျ​တယ်။ အဘိဂဲလရဲ့ မိဘတွေဟာ နာဗလရဲ့ စည်းစိမ်ဥစ္စာ​ကို မက်မော​ပြီး ဆင်းရဲ​တွင်း​ကနေ လွတ်မြောက်​ချင်​လို့​များ သမီးကို သူနဲ့ ပေး​စား​လိုက်တာလား။ ဘယ်လိုပဲ​ဖြစ်ဖြစ် နာဗလရဲ့​ငွေဟာ သူ့ကို ခင်ပွန်းကောင်း​တစ်ယောက် မဖြစ်စေခဲ့ပါဘူး။

၇။ (က) အိမ်ထောင်​ပြုခြင်း​နဲ့ ပတ်သက်ပြီး မှန်ကန်တဲ့ အမြင်​ရှိဖို့ မိဘတွေက ကလေးတွေကို ဘာမသင်​ပေးဖို့ သတိထား​ရမလဲ။ (ခ) ဘာလုပ်ဖို့ အဘိဂဲလ စိတ်ပိုင်းဖြတ်​ထားသလဲ။

^၇ ပညာ​ရှိတဲ့​မိဘတွေဟာ အိမ်ထောင်​ပြုခြင်း​နဲ့ ပတ်သက်ပြီး မှန်ကန်တဲ့​အမြင်​ရှိဖို့ သားသမီးတွေကို သွန်သင်ပေး​တတ်ကြတယ်။ သားသမီးတွေကို ငွေ​အတွက် အိမ်ထောင်ပြု​ဖို့ မတိုက်တွန်း​သလို လူကြီး​တာဝန်နဲ့ ဝတ္တရားတွေကို မထမ်းဆောင်​နိုင်​သေး​ခင် ငယ်ရွယ်တဲ့​အချိန်မှာ ရည်းစား​မထားဖို့လည်း သွန်သင်ပေး​မှာ​ပဲ။ (၁ ကော. ၇:၃၆) အဘိဂဲလ​ခမျာ အဲဒါတွေကို စဉ်းစား​နေဖို့ မဖြစ်​နိုင်တော့ဘူး။ ဘာကြောင့်​ပဲ​ဖြစ်ဖြစ် နာဗလ​နဲ့ လက်ထပ်​ပြီး​နေပြီ။ ဒီလို​ခက်ခဲတဲ့ အခြေအနေ​မှာ အတတ်နိုင်ဆုံး ပြေလည်​အောင်​နေသွား​ဖို့​ပဲ သူ ဆုံးဖြတ်​ထားတယ်။

၈။ ဘယ်သူ့ကို နာဗလ စော်ကား ပြောဆို​လိုက်သလဲ။ ဒါက တော်​တော်​မိုက်မဲတယ်လို့ ဘာကြောင့် ပြောနိုင်သလဲ။

^၈ နာဗလဟာ အဘိဂဲလရဲ့ အခြေအနေကို ပို​ခက်ခဲ​ဆိုးရွား​အောင် လုပ်​လိုက်ပြီ။ သူ​စော်ကား ပြောဆို​လိုက်​သူဟာ ဒါဝိဒ်​ဖြစ်နေတယ်။ ဒါဝိဒ်ဟာ ရှောလုရဲ့ ဘုရင်​နေရာကို ဆက်ခံ​ဖို့ ဘုရားသခင် ရွေးချယ်​ထားသူ၊ ပရောဖက်​ရှမွေလ ဘိသိက်ပေး​ခဲ့​တဲ့ ယေဟောဝါ​ဘုရားရဲ့ သစ္စာရှိ​ကျေးကျွန် ဖြစ်တယ်။ (၁ ရှ. ၁၆:၁၊ ၂၊ ၁၁-၁၃) လောလောဆယ်​မှာ​တော့ မနာလိုစိတ်​ရှိပြီး လူသတ်ဖို့ ဝန်မလေးတဲ့ ဘုရင်​ရှောလု​ဆီကနေ ဒါဝိဒ် ထွက်ပြေး တိမ်းရှောင်​နေရ​ပြီး သူ့ရဲ့ သစ္စာရှိ​စစ်သည် ၆၀​၀ နဲ့​အတူ တော​ထဲမှာ ပုန်းအောင်း​နေရ​တယ်။

၉၊ ၁၀။ (က) ဒါဝိဒ်​နဲ့ သူ့​လူတွေ​အတွက် အစား​အစာ​ရဖို့ ဘာ​ကြောင့် ခက်​နိုင်​သလဲ။ (ခ) ဒါဝိဒ်​နဲ့ သူ့လူတွေ လုပ်ပေးတာ​တွေ​အတွက် နာဗလ ဘာကြောင့် ကျေးဇူးတင်​သင့်သလဲ။ (အပိုဒ် ၁၀ ရဲ့ အောက်ခြေ​မှတ်ချက်​ကိုလည်း ကြည့်ပါ။)

 ^၉ နာဗလဟာ မောန​မြို့မှာ နေထိုင်​ပေမဲ့ ကရမေလ​မြို့အနီး​က လယ်​မြေ​တွေကို ပိုင်ဆိုင်​ထား​ပုံ​ရတယ်။ * ဒီ​မြို့​တွေဟာ စိမ်းလန်း​စိုပြည်​တဲ့ ကုန်းမြင့်​ဒေသမှာ ရှိနေလို့ နာဗလရဲ့​သိုး ၃,၀​၀​၀ အတွက် စားကျက်​ကောင်း​ပဲ။ ဒါပေမဲ့ ဒီ​နယ်မြေရဲ့ ပတ်ပတ်လည်ဟာ တောရိုင်း​ဒေသ​ဖြစ်နေတယ်။ တောင်ဘက်မှာ ပါရန်တော​အရပ်၊ အရှေ့ဘက်မှာ ဆား​ငန်​ပင်လယ်​ရှိတယ်။ အဲဒီ​ပင်လယ်နဲ့ မြို့တွေ​ကြားမှာ လျှိုမြောင်​နဲ့ ဥမင်​လိုဏ်ဂူ​တွေ ရှိတယ်။ ဒီ​နေရာမှာ ဒါဝိဒ်​နဲ့ သူ့​လူတွေဟာ အစားအစာ​ရဖို့ ခက်​မှာ​ဖြစ်သလို တခြား​အခက်အခဲ မျိုးစုံနဲ့လည်း ကြုံတွေ့​ရမှာပဲ။ အဲဒီမှာ သူဌေးကြီး နာဗလရဲ့ သိုးထိန်း​တွေ​နဲ့ မကြာခဏ ဆုံတွေ့​နိုင်တယ်။

^၁၀ အလုပ်​ကြိုးစားတဲ့ ဒီ​စစ်သူရဲ​တွေဟာ သိုးထိန်း​တွေ​နဲ့ ဘယ်လို ဆက်ဆံ​ခဲ့သလဲ။ သိုး​တွေကို အလွယ်တကူ ဖမ်းယူ စား​နိုင်ပေမဲ့ သူတို့ မလုပ်ကြဘူး။ အဲဒီအစား နာဗလရဲ့ သိုးအုပ်​နဲ့ သိုးထိန်းတွေကို ကာကွယ် စောင့်ရှောက်​ပေးခဲ့​ကြတယ်။ (၁ ရှမွေလ ၂၅:၁၅၊ ၁၆ ကိုဖတ်ပါ။) သိုးအုပ်​နဲ့ သိုးထိန်းတွေဟာ အန္တရာယ်​မျိုးစုံ ကြုံတွေ့နိုင်တယ်။ အဲဒီ​အချိန်​က သားရဲ​တိရစ္ဆာန်တွေ အရမ်း​ပေါများ​တယ်။ အဲဒီအပြင် အစ္စရေး​နိုင်ငံ တောင်ပိုင်း​နယ်စပ်​နဲ့ နီး​တဲ့​အတွက် တိုင်းတစ်ပါး​က သူခိုး​ဓားပြ​တွေရဲ့ လုယက်​တိုက်ခိုက်မှု​ကို မကြာခဏ ကြုံတွေ့ရ​တတ်ကြတယ်။ *

၁၁၊ ၁၂။ (က) နာဗလ​ဆီ လူ​တွေ​ကို လွှတ်​လိုက်​တဲ့​အခါ ဒါဝိဒ်​ရဲ့ လိမ္မာ​ပါး​နပ်​မှု​နဲ့ ရို​သေ​လေး​စား​မှု​ကို ဘယ်​လို တွေ့​နိုင်​သလဲ။ (ခ) နာဗလရဲ့​တုံ့ပြန်ပုံ​က ဘာကြောင့် မှား​သလဲ။

^၁၁ တောကန္တာရမှာ သူ့​လူတွေ​စားဖို့ အစားအစာ ရှာပေး​ရတာက ဒါဝိဒ်​အတွက် တာဝန်​ကြီး​တစ်ခု​ပဲ။ တစ်နေ့ကျတော့ ဒါဝိဒ်ဟာ သူ့​လူ​ဆယ်ယောက်​ကို နာဗလ​ဆီ​လွှတ်​ပြီး အကူအညီ​တောင်းခိုင်း​တယ်။ အဲဒီ​အချိန်​က သိုးမွေးညှပ်​ပွဲခံချိန်၊ အစားအသောက်​တွေ အလျှံပယ်​ကျွေး​တဲ့ အချိန်​ဖြစ်လို့ အချိန်​အခါ​ကောင်း​ပဲ။ ဒါဝိဒ်ဟာ ယဉ်ကျေးတဲ့ စကားလုံးတွေ​ရွေး​ပြီး ပြော​ခိုင်းတဲ့​အပြင် နာဗလရဲ့ အသက်အရွယ်ကို ထောက်​ပြီး “လူကြီး​မင်းရဲ့​သား ဒါဝိဒ်” လို့ ရိုရိုသေသေ ပြော​ခိုင်းတယ်။ နာဗလ ဘယ်လို တုံ့ပြန်​ခဲ့သလဲ။—၁ ရှ. ၂၅:၅-၈။

^၁၂ နာဗလဟာ ဒေါသ​ပေါက်ကွဲ​သွားတယ်။ ဆောင်းပါး​အစမှာ ဖော်ပြ​ထားတဲ့ လူငယ်​ပြော​သလို “သခင်​က ရိုင်းရိုင်းစိုင်းစိုင်း အော်ထုတ်​တယ်” လို့ အဘိဂဲလ​ကို ပြောပြ​တယ်။ ကပ်စေးနှဲတဲ့ နာဗလ​က သူရဲ့ စားစရာ၊ သောက်စရာတွေကို ဘယ်က​လာ​မှန်း မသိတဲ့၊ သခင်​ဆီကနေ ထွက်ပြေး​လာတဲ့ ကျွန်ကို မပေး​နိုင်ဘူး​လို့ စော်ကား ပြောဆို​လိုက်တယ်။ နာဗလရဲ့ အမြင်ဟာ ဒါဝိဒ်​ကို​မုန်းတဲ့ ရှောလုရဲ့ အမြင်​နဲ့ တူ​နေတယ်။ သူတို့​နှစ်ယောက်စလုံး​မှာ ယေဟောဝါ​ဘုရားရဲ့​အမြင် မရှိဘူး။ ဘုရားသခင်က ဒါဝိဒ်​ကို ချစ်တယ်။ ပုန်ကန်တဲ့​ကျွန်​အဖြစ် မမြင်​ဘဲ အစ္စရေးတွေရဲ့ မင်းလောင်း​အဖြစ် ရှုမြင်တယ်။—၁ ရှ. ၂၅:၁၀၊ ၁၁၊ ၁၄။

၁၃။ (က) နာဗလရဲ့ ရိုင်းစိုင်း​မှု​ကို စ​စ​ချင်း ဒါဝိဒ် ဘယ်လို တုံ့ပြန်​ခဲ့သလဲ။ (ခ) ယာကုပ် ၁:၂၀ မှာ ပါတဲ့ ကျမ်းစာမူ​က ဒါ​ဝိဒ်ရဲ့ တုံ့ပြန်ပုံ​နဲ့ ပတ်သက်ပြီး ဘာသင်ပေးသလဲ။

 ^၁၃ ဒါ​ဝိဒ်ရဲ့​လူတွေက အကြောင်းစုံကို ပြန်​ပြောပြတဲ့​အခါ ဒါဝိဒ် တော်တော်လေး ဒေါသ​ထွက်သွား​တယ်။ “ဓား​ကိုယ်စီ ဆွဲ​ခဲ့​ကြ” လို့​အမိန့်ပေး​ပြီး သူကိုယ်တိုင်​လည်း ဓား​ကို ခါးမှာ ချိတ်ဆွဲ​ပြီး လူ ၄၀​၀ နဲ့​အတူ ထွက်လာ​တယ်။ နာဗလရဲ့ အိမ်ထောင်စု​က ယောက်ျား​အားလုံးကို သတ်ပစ်​မယ်​လို့ သူ​ကျိန်ဆို​တယ်။ (၁ ရှ. ၂၅:၁၂၊ ၁၃၊ ၂၁၊ ၂၂) ဒါဝိဒ် ဒေါသ​ထွက်​မယ်​ဆို​လည်း ထွက်​စ​ရာ​ပဲ။ ဒါပေမဲ့ ဒေါသ​ကို ဖော်ပြ​ပုံ​က မှား​နေတယ်။ “လူတစ်ယောက်ရဲ့ ဒေါသ​က ဘုရားသခင်ရဲ့ ဖြောင့်မတ်ခြင်းကို မဖြစ်​ပေါ်​စေ​ဘူး” လို့​ကျမ်းစာက ဆိုတယ်။ (ယာ. ၁:၂၀) သူ့​အိမ်ထောင်စု​ကို အဘိဂဲလ ဘယ်လို ကယ်မ​လဲ။

၁၄။ (က) နာဗလရဲ့ အမှား​ကို ပြင်ပေး​ဖို့ အဘိဂဲလ အရင်ဆုံး ဘာ​လုပ်သလဲ။ (ခ) နာဗလ​နဲ့ အဘိဂဲလ​တို့ရဲ့ ကွာခြားချက်​ကနေ ဘာသင်ခန်းစာ​ရသလဲ။ (အောက်ခြေမှတ်ချက်ကို​လည်း ကြည့်ပါ။)

^၁၄ အဘိဂဲလ​ဟာ ဒီ​အမှား​ကြီး​ကို တည့်မတ်​ပေးဖို့ စတင် လုပ်ဆောင်​နေပြီ။ သူဟာ ခင်ပွန်း​နာဗလ​နဲ့ မတူဘဲ နားထောင်ဖို့ အသင့်​ရှိတယ်။ “ယုတ်ညံ့တဲ့​သခင်​ကို​တော့ ဘယ်သူမှ မ​ပြောရဲ​ကြဘူး” လို့ လူငယ်​ပြောတဲ့​အတိုင်းပဲ ဒီ​ကိစ္စ​ကို နာဗလ​ဆီ ဘယ်သူမှ သွား​မ​ပြောရဲ​ကြဘူး။ * (၁ ရှ. ၂၅:၁၇) နာဗလဟာ သူ့ကိုယ်သူ အထင်ကြီး​လွန်း​လို့ တခြား​သူတွေရဲ့ စကားကို အရေးတယူ နားမထောင်​ပေး​ဘူး။ ဒီလို မာန်​တက်​နေတာမျိုး​ကို ဒီနေ့​ခေတ်မှာလည်း တွေ့မြင်​နေရ​တယ်။ အဘိဂဲလ​ကတော့ အဲဒီလို​မဟုတ်မှန်း လူငယ်​သိထားတဲ့​အတွက် သူ့​ဆီ​လာပြီး ပြဿနာကို ပြောပြ​တယ်။

၁၅၊ ၁၆။ (က) အဘိဂဲလ​ဟာ ပညာအလိမ္မာကျမ်း​က အရည်အချင်း​ပြည့်တဲ့ ဇနီးနဲ့​တူ​ကြောင်း ဘယ်လို ဖော်ပြသလဲ။ (ခ) အဘိဂဲလ​ဟာ ခင်ပွန်းကို​ကျော်​ပြီး လုပ်​နေတာလား။

^၁၅ အဘိဂဲလ​ဟာ ချက်ချင်း​စဉ်းစား​ပြီး သွက်သွက်​လက်​လက် လုပ်ဆောင်​လိုက်တယ်။ ဒီ​မှတ်တမ်းမှာ သူနဲ့​ပတ်သက်ပြီး “အမြန်” ဆိုတဲ့​စကားလုံးကို လေး​ကြိမ် အသုံးပြု​ထားတာ တွေ့ရတယ်။ ဒါဝိဒ်​နဲ့ သူ့​လူတွေ​အတွက် မုန့်​တွေ၊ စပျစ်ရည်နဲ့ သိုးသား၊ ကောက်နှံလှော်၊ စပျစ်သီး​ပျဉ်၊ သဖန်းသီးပျဉ်​စတဲ့ စားစရာတွေကို ထုပ်ပိုး​လိုက်တယ်။ သူ့​အိမ်မှာ ဘာတွေ​ရှိတယ်ဆိုတာ အဘိဂဲလ ကောင်းကောင်း​သိထား​ပြီး အိမ်မှုကိစ္စ နိုင်တဲ့​သူ​ဖြစ်မှန်း ထင်ရှားတယ်။ ပညာ​အလိမ္မာ​ကျမ်းမှာ ဖော်ပြတဲ့ လုပ်ရည်ကိုင်ရည်ရှိတဲ့ ဇနီးနဲ့​တူတယ်။ (ပညာ. ၃၁:၁၀-၃၁) အဲဒီ​စားစရာတွေကို ကျွန်တွေ​နဲ့ ထည့်ပေး​လိုက်ပြီး နောက်ကနေ တစ်ယောက်တည်း လိုက်သွား​တယ်။ “ခင်ပွန်း​နာဗလ​ကို​တော့ အသိ​မပေးဘူး” လို့ ဆက်​ဖတ်ရ​တယ်။—၁ ရှ. ၂၅:၁၈၊ ၁၉။

^၁၆ အဘိဂဲလ​ဟာ ခင်ပွန်းကို ကျော်​ပြီး လုပ်​နေတာလား။ လုံးဝ​မဟုတ်ပါဘူး။ နာဗလဟာ  ယေဟောဝါ​ဘုရားရဲ့ ဘိသိက်ခံ​ကျေးကျွန်​ကို ရိုင်းရိုင်းစိုင်းစိုင်း ဆက်ဆံ​ခဲ့​တဲ့​အတွက် အပြစ်​မရှိတဲ့ အိမ်သူအိမ်သား​တွေ အသတ်​ခံရ​တော့​မယ်။ အဘိဂဲလ​သာ ဘာမှ​မ​လုပ်​ဘူးဆိုရင် ခင်ပွန်းရဲ့​အပြစ်​မှာ ကြံရာပါ ဖြစ်သွား​နိုင်တယ်။ ဒီ​အခြေအနေ​မှာ သူဟာ ခင်ပွန်း​ထက် ဘုရားသခင်ကို လက်အောက်ခံ​ဖို့ လိုအပ်​နေတယ်။

၁၇၊ ၁၈။ အဘိဂဲလ​ဟာ ဒါဝိဒ်​ဆီ ဘယ်လို ချဉ်းကပ်​ခဲ့သလဲ။ ဘာတွေ ပြောခဲ့​သလဲ။ သူ့ရဲ့ စကားတွေက ဘာကြောင့် ထိရောက်​သလဲ။

^၁၇ မကြာခင်မှာပဲ အဘိဂဲလ​ဟာ ဒါဝိဒ်​တို့​အဖွဲ့နဲ့ လမ်းမှာ ဆုံတယ်။ ဒါနဲ့ မြည်းပေါ်​ကနေ အမြန်​ဆင်း​ပြီး ဒါဝိဒ်​ရှေ့မှာ ဦးညွှတ်​ပျပ်ဝပ်​လိုက်တယ်။ (၁ ရှ. ၂၅:၂၀၊ ၂၃) အဲဒီနောက် သူ့​ခင်ပွန်း​နဲ့ အိမ်သူ​အိမ်သားတွေကို ကရုဏာ​ပြဖို့ အသနားခံ​ခဲ့​တယ်။ သူ့ရဲ့​စကားတွေက ဘာကြောင့် ထိရောက်​တာလဲ။

^၁၈ ပြဿနာကို သူ​ခေါင်း​ခံ​လိုက်ပြီး သူ့ကို ခွင့်လွှတ်ပါလို့ ဒါဝိဒ်​ကို အသနားခံ​တယ်။ သူ့​ခင်ပွန်းဟာ နာမည်​နဲ့​လိုက်​အောင် မိုက်မဲတယ်လို့ အမှန်အတိုင်း ဝန်ခံတယ်။ ဒီလို​လူစားမျိုး​ကို အရေး​လုပ်ပြီး တုံ့ပြန်တာ​က သိက္ခာ​ကျ​ရုံ​ပဲ ရှိတယ်လို့ ဆိုလို​နေ​ပုံ​ရတယ်။ ဒါဝိဒ်​ကို “ယေဟောဝါ​ဘုရားအတွက် တိုက်ပွဲဝင်​နေ​သူ” လို့ ပြောခြင်း​အားဖြင့် ဒါဝိဒ်ဟာ ယေဟောဝါရဲ့ ကိုယ်စား​လှ​ယ်​ဖြစ်တယ်ဆိုတာကို ယုံကြည်​စိတ်ချကြောင်း အဘိဂဲလ ဖော်ပြတယ်။ “ယေဟောဝါဘုရား​က သခင့်​ကို . . . အစ္စရေး​ခေါင်းဆောင်​အဖြစ် ခန့်အပ်” မယ်​လို့ ပြောတဲ့​အတွက် ဒါဝိဒ်​ကို ဘုရင့်​အရိုက်အရာ ပေးမယ်​ဆိုတဲ့ ယေဟောဝါ​ဘုရားရဲ့ ကတိတော်ကို သိကြောင်းလည်း ဖော်ပြ​တယ်။ ဒီ့အပြင် သွေးပြစ်​သင့်​စေနိုင်တဲ့၊ နောက်ပိုင်း “ဝမ်းနည်း​ပြီး နောင်တ​ရတဲ့ အဖြစ်မျိုး” မကျူးလွန်​ဖို့ ဒါဝိဒ်​ကို ဖျောင်းဖျတယ်။ အမှားအမှန် သိစိတ်ကို ဒုက္ခ​ပေးမယ့်​လုပ်ရပ်​ကို ရည်ညွှန်း​နေတာ​ဖြစ်တယ်။ (၁ ရှမွေလ ၂၅:၂၄-၃၁ ကိုဖတ်ပါ။) အကြင်နာတရား ပြည့်ဝ​ပြီး စိတ်​နှလုံး​ကို ထိမိ​စေတဲ့ စကားတွေ​ပါပဲ။

၁၉။ အဘိဂဲလရဲ့​စကားကို ဒါဝိဒ် ဘယ်လို တုံ့ပြန်​သလဲ။ အဘိဂဲလ​ကို ဘာကြောင့် ချီးမွမ်းခဲ့​သလဲ။

^၁၉ ဒါဝိဒ် ဘယ်လို တုံ့ပြန်​သလဲ။ အဘိဂဲလ ယူ​လာတာ​တွေကို သူ လက်ခံ​ပြီးတဲ့နောက် ဒီလို ပြန်​ပြောတယ်– “ဒီနေ့ ငါ​နဲ့​တွေ့​ဖို့ မင်းကို လွှတ်လိုက်တဲ့​အရှင်၊ အစ္စရေး​တို့ရဲ့​ဘုရား ယေဟောဝါ​ကို ချီးမွမ်းပါ​တယ်။ ဆင်ခြင်​ဉာဏ်​ရှိတဲ့ မင်းကို ဘုရားသခင် ကောင်းချီး​ပေးပါစေ။ ဒီနေ့ ငါ​လူ​မ​သတ်​မိအောင်၊ ကိုယ်တိုင် လက်စားမချေ​မိအောင် တားဆီး​ပေးတဲ့ မင်းကို ဘုရားသခင် ကောင်းချီး​ပေးပါစေ။” ဒါဝိဒ်​နဲ့ တွေ့ဆုံ​ဖို့ သတ္တိရှိရှိ၊ မြန်မြန်ဆန်ဆန် ရောက်လာတဲ့ အဘိဂဲလ​ကို ချီးမွမ်း​ပြီး သူ့​ကြောင့် လူ့​အသက်​သတ်​တဲ့ အပြစ်ကို မကျူးလွန်​မိ​တော့​ဘူးလို့ ဝန်ခံတယ်။ ပြီးတော့ “အိမ်ကို စိတ်ချလက်ချ​ပြန်ပါ။ မင်းရဲ့​စကားကို နားထောင်” မှာပါ​လို့ နှိမ့်ချမှု​ရှိ​ရှိ အဘိဂဲလ​ကို ပြောလိုက်​တယ်။—၁ ရှ. ၂၅:၃၂-၃၅။

၂၀၊ ၂၁။ (က) ခင်ပွန်း​ဆီ​ပြန်သွား​တဲ့ အဘိဂဲလ​မှာ ချီးမွမ်းစရာ ဘယ်အချက်တွေ တွေ့ရသလဲ။ (ခ) နာဗလ​ကို စကား​ပြော​မယ့်​အချိန် ရွေး​ချယ်​ရာ​မှာ အ​ဘိ​ဂဲ​လ​ရဲ့ ဉာဏ်​အမြော်​အမြင်​နဲ့ သတ္တိ​ကို ဘယ်လို တွေ့​နိုင်​သလဲ။

^၂၀ သူတို့​လမ်းခွဲ​ပြီးနောက် အဘိဂဲလ​ဟာ ဒါဝိဒ်​နဲ့ တွေ့ဆုံခဲ့​တာ​ကို မစဉ်းစား​ဘဲ မနေနိုင်​ ခဲ့​ဘူး။ သစ္စာ​ရှိပြီး ကြင်နာတဲ့​ဒါဝိဒ်​နဲ့ ရက်စက်​ကြမ်းကြုတ်​တဲ့ သူ့​ခင်ပွန်း​နာဗလ ဘယ်လောက် ကွာခြားတယ်ဆိုတာ​ကိုလည်း သူ သတိထားမိမှာ​ပဲ။ ဒါပေမဲ့ အဲဒီ​အတွေး​ထဲမှာ​ပဲ နစ်မျော​မနေခဲ့ပါဘူး။ “အဘိဂဲလ​က နာဗလ​ဆီ ပြန်လာတယ်” လို့ ဖတ်ရ​တယ်။ နာဗလရဲ့ ဇနီး​အနေနဲ့ သူ့​တာဝန်ကို အတတ်နိုင်ဆုံး ကျေပွန်​အောင် လုပ်ဆောင်မယ်လို့ စိတ်ပိုင်းဖြတ်​ထားတယ်။ ဒါဝိဒ်​နဲ့ သူ့​လူတွေကို စားစရာ၊ သောက်စရာတွေ ပေးလိုက်တဲ့​အကြောင်း ခင်ပွန်းကို​ပြောပြဖို့ သူ့မှာ တာဝန်​ရှိတယ်။ ဒါကို သူ့​ခင်ပွန်း သိ​ပိုင်ခွင့်​ရှိတယ်။ သီသီလေး လွတ်သွားတဲ့ အန္တရာယ်​အကြောင်းကိုလည်း ပြောပြ​ရမယ်။ ဒီ​သတင်းကို တခြားသူ​ဆီက ကြား​ရင် နာဗလ ပို​အရှက်ကွဲ​မယ်။​ ဒါပေမဲ့ နာဗလဟာ ဘုရင်​တစ်ပါး​လို ပွဲခံ​ပြီး သောက်​စား​မူးယစ်​နေလို့ အခုတော့ ပြောလို့ မဖြစ်သေး​ဘူး။—၁ ရှ. ၂၅:၃၆။

^၂၁ ဒီ​တစ်ကြိမ်​မှာလည်း အဘိဂဲလ​ဟာ ဉာဏ်​အမြော်အမြင်​နဲ့ သတ္တိ​ကို​ပြပြီး နာဗလ အမူးပြေတဲ့ နောက်​နေ့​မနက်​အထိ စောင့်နေခဲ့​တယ်။ သူ​ပြောတာကို နားထောင်​မှာ​ဖြစ်ပေမဲ့ ထုံးစံ​အတိုင်း ဒေါသ​ပေါက်ကွဲ​နိုင်တယ်ဆိုတာ အဘိဂဲလ သိထားတယ်။ ဘာပဲ​ဖြစ်ဖြစ် နာဗလ​ဆီ​သွားပြီး အကြောင်းစုံကို ပြောပြ​လိုက်တယ်။ နာဗလ ဒေါသ​ပေါက်ကွဲ​ပြီး ဝုန်း​ဒိုင်း​ကြဲ​မှာ​ပဲ​လို့ သူ​ထင်နေတာ။ ဒါပေမဲ့ ထိုင်​နေတဲ့ နာဗလဟာ လုံးဝ မလှုပ်ရှားနိုင်​တော့​ဘူး။—၁ ရှ. ၂၅:၃၇။

၂၂။ နာဗလ ဘာ​ဖြစ်သွား​သလဲ။ အိမ်တွင်း အကြမ်းဖက်မှုနဲ့ ပတ်သက်​ပြီး ဘာကို ယုံကြည်​စိတ်ချ​နိုင်သလဲ။

^၂၂ နာဗလ ဘာ​ဖြစ်သွား​လို့​လဲ။ “နာဗလရဲ့​နှလုံး ရပ်​သွားပြီး တစ်ကိုယ်လုံး မလှုပ်ရှားနိုင်​တော့ဘဲ ကျောက်တုံး​လို ဖြစ်သွားတယ်။” လေဖြတ်​သွားတဲ့​ပုံပဲ။ ဆယ်ရက်​လောက်​ကြာ​တော့ သူ​သေဆုံးသွားတယ်။ ဒီလို​ဖြစ်တာ​က ရောဂါ​ကြောင့်​ပဲ မဟုတ်ဘူး။ “ယေဟောဝါ ဒဏ်ခတ်​တဲ့​အတွက် နာဗလ သေဆုံးသွားတယ်” လို့​ဖတ်ရ​တယ်။ (၁ ရှ. ၂၅:၃၈) တရား​မျှတတဲ့ ဒဏ်ခတ်မှု​ကြောင့် အဘိဂဲလရဲ့ မသာယာ​တဲ့ အိမ်ထောင်ရေး ဇာတ်သိမ်း​သွားတယ်။ ယေဟောဝါ​ဘုရားဟာ အခု​အချိန်မှာ အဲဒီလို အံ့သြစရာ​နည်းတွေနဲ့ ကြားဝင် ဆောင်ရွက်​ပေးမှာ မဟုတ်ပေမဲ့ အိမ်တွင်း အကြမ်းဖက်မှုတွေကို မြင်တယ်​ဆိုတာ ဒီ​မှတ်တမ်းက သတိရ​စေပါ​တယ်။ အချိန်တန်​တဲ့အခါ ယေဟောဝါဟာ တရား​မျှတတဲ့​နည်းနဲ့ စီရင်​ပေးစမြဲ​ပါ။—လုကာ ၈:၁၇ ကိုဖတ်ပါ။

၂၃။ အဘိဂဲလ​ဟာ နောက်ထပ် ဘာ​ကောင်းချီး ရသလဲ။ အဲဒီ​ကောင်းချီး​ကြောင့် သူ ဘဝင်မမြင့်​ဘူးဆို​တာ ဘယ်လို​ပြခဲ့သလဲ။

^၂၃ အဘိဂဲလ​ဟာ မသာယာ​တဲ့ အိမ်ထောင်သည်​ဘဝကနေ လွတ်မြောက်သွား​တဲ့အပြင် နောက်ထပ် ကောင်းချီး​ရဦး​မှာ ဖြစ်တယ်။ နာဗလ​ သေဆုံးသွားပြီ​လို့ ဒါဝိဒ်​ကြားတဲ့​အခါ သူ့​လူတွေကို စေလွှတ်​ပြီး အ​ဘိဂဲ​လ​ကို လက်ထပ်ခွင့်​တောင်းတယ်။ အဲဒီအခါ အ​ဘိဂဲလ​က “ကျွန်မဟာ သခင့်​လူတွေရဲ့ ခြေကို ဆေး​ပေးတဲ့ အစေခံ မိန်းမ​ဖြစ်ဖို့ အသင့်​ပါပဲ” ဆိုပြီး အဖြေပေး​လိုက်တယ်။ ဒါ​ဝိဒ်ရဲ့ ဇနီးလောင်း​အနေနဲ့ သူ ဘဝင်မမြင့်​ခဲ့​တာ သေချာတယ်။ ဒါဝိဒ်​ကျွန်​တွေရဲ့​ခြေကို ဆေးပေး​မယ်​လို့​တောင် သူ​ပြောခဲ့တယ်။ အဲဒီနောက် အဘိဂဲလ​ဟာ ခပ်သုတ်သုတ်​ထပြီး ဒါဝိဒ်​ဆီ​ကို သွားတယ်။—၁ ရှ. ၂၅:၃၉-၄၂။

၂၄။ အဘိဂဲလရဲ့ ဘဝ​သစ်​မှာ ဘယ်​အခက်အခဲ​တွေ ကြုံခဲ့​ရသလဲ။ သူ့​ခင်ပွန်း​နဲ့ သူ့​ဘုရားက သူ့ကို ဘယ်လို ရှုမြင်ခဲ့​သလဲ။

 ^၂၄ ဒါဟာ ပျော်ရွှင်​စ​ရာ ဇာတ်သိမ်း​ခန်း​တော့ မဟုတ်ပါဘူး။ ဒါဝိဒ်​နဲ့​လက်ထပ်ခဲ့တဲ့ အဘိဂဲလ​ရဲ့ ဘဝဟာ အမြဲတမ်း ပန်း​ခင်း​လမ်း မဖြစ်ခဲ့ဘူး။ ဒါဝိဒ်ဟာ အဟိနောင်​နဲ့ လက်ထပ်​နှင့်​ပြီးသား​ဖြစ်တယ်။ မယား​အများယူ​တဲ့ ဓလေ့​ကြောင့် အဲဒီခေတ်​က သစ္စာရှိ အမျိုးသမီးတွေဟာ အခက်အခဲ​အမျိုးမျိုး ကြုံတွေ့ခဲ့​ရမှာ သေချာတယ်။ ဒါ့အပြင် ဒါဝိဒ်ဟာ ဘုရင် မဖြစ်သေး​တဲ့​အတွက် ဘုရင်အဖြစ် ယေဟောဝါ​ဘုရားရဲ့ အမှုတော်​မ​ဆောင်​ခင်မှာ အဟန့်အတား​နဲ့ အခက်အခဲ​တွေ အများကြီး ရှိ​ဦး​မှာ​ပဲ။ ဒါပေမဲ့ အဘိဂဲလ​ဟာ ဒါ​ဝိဒ်ရဲ့ ဘဝခရီး​တစ်လျှောက် ကူညီ​ထောက်မပေး​ပြီး ဒါဝိဒ်​နဲ့ သားတစ်ယောက်​ရခဲ့တယ်။ သူ့ကို​တန်ဖိုး​ထားပြီး ကာကွယ်​စောင့်ရှောက်​ပေးတဲ့ လင်​ယောက်ျား ရထားတယ်​ဆိုတာ သူ​သိခဲ့ရတယ်။ တစ်ကြိမ်​မှာ ဒါဝိဒ်ဟာ အဘိဂဲလ​ကို ပြန်ပေးဆွဲ​သူတွေ လက်ထဲ​ကနေ ကယ်တင်​ပေးခဲ့တယ်။ (၁ ရှ. ၃၀:၁-၁၉) ဉာဏ်အမြော်အမြင်၊ ရဲစွမ်းသတ္တိနဲ့ သစ္စာ​ရှိတဲ့ အမျိုးသမီးတွေကို တန်ဖိုးထား ချစ်​မြတ်နိုးတဲ့ ယေဟောဝါ​ဘုရားကို ဒီ​နည်းနဲ့ ဒါဝိဒ် အတုယူ​ခဲ့​ပါတယ်။