1-3. Petro ne oneno ang’o e odiechieng’ moro makende, to otienono ang’o ma ne otimore?

 PETRO ne kwang’o yie e Nam Galili. Gokene ne ojony ahinya nikech ne osekwang’o yie kuom seche mang’eny. Yamo mager ma ne kutho ne omiyo Nam Galili ochacho. Apaka ne goyo kor yie ka kiro kuome pi mang’ich. Kane oting’o wang’e, ne oneno gimoro ma miri miri gi kuma bor. To nikech noparo ni piny ema ne ru, ne odhi mana nyime kwang’o yie.

² Noyudo Petro gi jowetene oweyore gi Yesu e dho wath. E odiechieng’no, ne gia neno ka Yesu pidho ji gana gi gana kuom makate kod rech manok. Jogo ne mor ahinya kendo ne gidwaro keto Yesu obed ruodhgi, to Yesu ne ok dwar donjore gi weche siasa. Bende, ne odwaro konyo jolupne kik odonj e siasa. Kopondo ne jogo, nochiko jopuonjrene mondo odhi e wath ma loka ka en to odhi e got kende mondo olem.—Mari. 6:35-45; som Johana 6:14-17.

³ Dwe ne ni malo sama ne jopuonjrego ochako wuoth, to koro gie sechegi dwe ne podho. Kata kamano, nikech apaka ne ger, ne pok gidhi mabor. Petro gi jopuonjre wetene ne ok nyal kata mana goyo mbaka nikech yamo mager ma ne futo gi apaka madongo. Nyaka bed ni pach Petro to ne ni mabor.

4. Petro nonyagore gi nyawo mage mamiyo obedonwa ranyisi maber?

⁴ Ne nitie gik mang’eny ma ne Petro nyalo paro kuomgi. Nyaka ne orom gi Yesu Ja-Nazareth, higni ariyo nosekalo. Ne gin higni ariyo modich ahinya kendo Petro ne opuonjore weche mogundho kuom hignigo. Kata kamano, ne pod nitie weche mang’eny  ma ne onego opuonjre. Nikech Petro ne oikore nyagore gi nyawo kaka bedo gi kiawa koda luoro, oketonwa ranyisi maber ahinya mwanyalo luwo. We wane ane gimomiyo ranyisi mare ne ber.

5, 6. Ngima Petro ne chalo nade?

⁵ Petro ne wiye ok nyal wil gi chieng’ ma ne oromoe gi Yesu. Owadgi miluongo ni Andrea, ema nokwongo kelone wach maberni: “Wasenwang’o Mesia.” Kanyo ema ngima Petro nochako lokoree. Ngimane ne dhi lokore chuth.—Joh. 1:41.

⁶ Petro nodak Kapernaum, dala ma ne ni machiegni gi Nam Galili. Petro kod Andrea owadgi ne oriwore gi Jakobo gi Johana ma ne gin yawuot Zebedi e ohand lupo. Petro ne ok odak mana gi chiege kende, to ne odak gi min chiege kaachiel gi owadgi ma Andrea. Pidho jogo duto mana kuom lupo ne dwaro ni ng’ato oti matek. Tem ane paro kaka ne gijotiyo matek otieno mangima ka giwito gogo e nam kendo ywayo gognigo koting’o rech. Odiechieng’ be ne gitiyo matek. Ne giyiero rech kendo usogi, kendo ne gitwang’o gogni ma noyiech.

7. Ang’o ma ne Petro owinjo e wi Yesu, to ang’o momiyo mano ne en wach maber ahinya?

⁷ Muma nyisowa ni Andrea ne en japuonjre Johana Jabatiso. Nyaka bed ni Petro ne winjo gi siso weche ma owadgi ne nyise e wi Johana. Chieng’ moro, Andrea noneno ka Johana siemo ne ji Yesu Ja-Nazareth ka owacho ni: “Neuru, Nyarombo mar Nyasaye.” Kanyo gi kanyo, Andrea nobedo jalup Yesu kendo nonyiso Petro wach maberni: Mesia osechopo! (Joh. 1:35-40) Bang’ ng’anjo ma ne otimore e puoth Eden higni 4,000 motelo, Jehova Nyasaye nosingo ni ne nitie ng’at ma ne dhi kelo ne dhano geno madier. (Chak. 3:15) Andrea noneno gi wang’e Jalno ma ne dhi reso oganda dhano, Mesia owuon. Petro bende noringo mondo odhi one Yesu.

8. Tiend nying ma ne Yesu omiyo Petro ne en ang’o, to ang’o momiyo jomoko ok par ni nyingno ne owinjore gi Petro?

⁸ Petro ne iluongo ni Simon. Kata kamano, kane Yesu oromo kode, nomiye nying machielo kowachone niya: “‘In Simon, wuod Johana: in noluongi ni Kefa’ (tiende ni, Petro).” (Joh. 1:42) “Kefa” tiende en “kidi” kata “lwanda.” Nenore ni Yesu ne koro wach e wi Petro. Ne okoro ni e kinde mabiro Petro ne dhi bedo kaka lwanda e kind jolup Kristo, nodhi bedo Jakristo motegno, mogurore matek, kendo minyalo gen. Be Petro ne neno ni en ng’at ma kamano? Nyaka bed ni ne ok opar kamano. Kata josom Injili me kindegi ok ne Petro kaka ng’at motegno kendo minyalo  gen. Jomoko wacho ni kaluwore gi weche mwasomo e Muma, Petro ne ok chung’ motegno kendo ne en ng’at mitago ataga koni gi koni.

9. Ang’o ma Jehova gi Wuode manyo kuom dhano, kendo iparo ni ang’o momiyo onego wagen paro ma gin-go kuomwa?

⁹ En adier ni Petro ne nigi nyawo kendo Yesu nong’eyo nyawogo. Kata kamano, mana kaka Jehova Wuon mare, Yesu ne siko manyo kido mabeyo kuom ji nigo. Yesu nong’eyo ni Petro ne nigi kido mang’eny mabeyo, kendo nodwaro konye mondo omed nyiso kidogo e yo maber moloyo. E kindegi bende, Jehova kaachiel gi Wuode manyo kido mabeyo ma wan-go. Samoro nyalo bedonwa matek yie ni wan kod kido mabeyo ma ginyalo neno kuomwa. Kata kamano, onego wagen-gi kendo wanyis ni waikore mondo gitiegwa mana kaka ne gitimo ne Petro.—Som 1 Johana 3:19, 20.

10. Gin weche mage ma Petro noneno, to pod nodok e tich mane?

¹⁰ Nyalo bedo ni Petro ne odhi gi Yesu kuonde ma ne olendoe bang’ romogino. Nyaka bed ni ne oneno hono ma ne Yesu okwongo timo mar loko pi obed divai e nyasi mar kisera ma ne ni Kana. To moloyo mano, nowinjo wach maber mar Pinyruodh Nyasaye ma ne Yesu lando. Kata obedo ni nowinjo weche mabeyogo, Petro ne ok odhi nyime wuotho gi Yesu kendo ne odok e ohande mar loko rech. Kata kamano, dweche moko bang’e, Petro noromo gi Yesu kendo—to gie kindeno, Yesu nonyise ni obed jalupne kinde duto.

11, 12. (a) Ang’o ma ne otimore ne Petro ka olupo otieno mangima? (b) Nyalo bedo ni Petro nopenjore penjo mage sama ne owinjo Yesu ka puonjo?

¹¹ Petro nosebedo ka lupo otieno mangima maok oyudo gimoro. Jolupogo noyudo osebolo gogo e nam ding’eny to ne ok giyud rech. Onge kiawa ni Petro notiyo gi rieko duto ma ne osebedogo kaka jalupo kotemo dhi kuonde mopogore opogore e namno mondo oyud kama rech ne nitie. Nyaka bed ni mana kaka jolupo mang’eny, samoro nogombo ni mad nobedie gi nyalo mar fwenyo kama rech ochokoree! Mano kaka chunye ne onyosore. Nodok e dho wath gi lwete nono to tijno ema ne pidho joode. Kata obedo ni ne ok giyudo rech kamano, pod ne nyaka gilwok gogo kendo gitwang’ kuonde moyiech. Omiyo, kane Yesu ochopo irgi, ne oyudo ka gidich.

¹² Ji mang’eny ne obiro ir Yesu mondo giwinje. To nikech ne ji thung’e, Yesu nodonjo e yie mar Petro monyise ni ochor yieno matin e i nam. Ka koro dwonde winjore maler e wi pi, Yesu  nopuonjo oganda maduong’no. Petro bende nochiko ite adimba mana kaka jomamoko. Ne ohero winjo ka Yesu lero weche e wi Pinyruodh Nyasaye ma ne e wach maduong’ ma Yesu ne lando. Mano kaka konyo Kristo lando wachni e piny duto ne dhi bedo migawo makende! To be Petro ne nyalo konyo e tij lendono? To kapo ni nodhi timo kamano, ere kaka ne odhi rito joode? Samoro Petro ne wuoro kabe onyalo tiyo tij lupo to koni bende olendo.—Luka 5:1-3.

13, 14. En hono mane ma Yesu notimo ne Petro, to mano nomiyo Petro otimo ang’o?

¹³ Kane Yesu otieko puonjo, ne onyiso Petro niya: “Sia yie odhi e kut, ubol goku umak rech.” Petro ne nigi kiawa. Nowacho niya: “Ruoth, nende wachandore gotieno duto, mi ne ok wamako gimoro, to kuom wachni nabol gogini.” Nyaka bed ni chuny Petro ne tek timo kamano nikech noyudo oa luoko gogni kendo mago ne gin seche ma rech ok yudre. Kata kamano, notimo kaka nonyise kendo nyalo bedo ni nonyiso jowetene bende mondo oluwgi gi yie machielo.—Luka 5:4, 5.

¹⁴ Kane Petro temo ywayo gogo, noyudo ka opek motamo wang’e. Noywayo matek. Mano kaka ne ohum neno ka rech modhuro nie gogo! Nonyiso joma ne nie yie mar ariyocha mondo obi okonygi mapiyo. To kane gikonye, ne giyudo ni rechgo ohewo yie achiel. Omiyo, ne gipogogi e yiedhi ariyogo kendo yiedhigo ne ochako nimo nimar rech ne ng’eny mokalo. Petro ne dhoge omoko. Noyudo oseneno honni ma Kristo otimo, to ma koro ne en hono ma konye kaachiel gi joode. Nowuoro ni ma ne en ng’at manade ma ne nyalo kata miyo rech odonj e gogo! Luoro nomako Petro. Nogo chonge piny mowacho: “A kuoma, Ruoth, nikech an ng’at ma jaricho.” Ne oneno ni ok oromo wuotho gi Jal ma Nyasaye ne omiyo teko mar timo honni ma kamago.—Som Luka 5:6-9.

15. Ere kaka Yesu nopuonjo Petro ni ok onego obed gi kiawa kata bedo maluor?

¹⁵ Yesu nowacho e yo mang’won niya: “Kik iluor; nyaka a tinende iniywa ji.” (Luka 5:10, 11) Ne ok onego Petro obed gi kiawa kata bedo maluor. Nonego oket pache duto e tich maduong’ mar lendo kar keto kiawa kabe nonyalo rito joode kata kabe en owuon owinjore gi tij lendo. Yesu ne nigi tich maduong’ ma ne onego otim, kendo tijno ne dhi konyo ji kinde mabiro. Ne otiyo  ne Nyasaye ma ne dhi weyo ne ji ‘richogi duto.’ (Isa. 55:7) Jehova ne dhi konyo Petro rito joode kendo konye e tij lendo.—Math. 6:33.

16. Ere kaka Petro, Jakobo, gi Johana notimo kane Yesu onyisogi ni giluwe, kendo ang’o momiyo mano ema ne en yiero maberie moloyo ma ng’ato nyalo timo?

¹⁶ Petro noluwo Yesu mapiyo mana kaka Jakobo gi Johana notimo. Muma wacho ni: ‘Ne gigolo yiedhigi oko e dho wath, ne giweyo duto, ne giluwe.’ (Luka 5:11) Petro noketo yie kuom Yesu koda kuom Jal ma ne ooro Yesu. Mano e yiero maberie moloyo ma ng’ato nyalo timo. E kindewagi bende, Jokristo maloyo luoro koda kiawa ma gin-go mondo giti ne Nyasaye, nyiso yie ma kamano. Kinde duto, Jehova rito jogo mogene kamano.—Zab. 22:4, 5.

17. Petro ne nyalo paro kuom weche mage ma ne oseneno e higni ariyo ma ne osebedoe gi Yesu?

¹⁷ Higni ariyo bang’ romo gi Yesu, Petro ne kwang’o yie e Nam Galili ma koro ne ochacho mana kaka onyis e chak sulani. Ok dwang’e gadier gik ma ne oparo gie sechego nimar noseneno gik mang’eny chop kindeno. Noyudo Yesu osechango min chiege kendo nosegolo Twak mar Got. Yesu nosenyiso nyading’eny kokalo kuom puonjge koda honni ma ne otimo ni en e Mesia, Jal ma Jehova oyiero. Nyaka bed ni kaka dweche ne kalo, nyawo ma ne Petro nigo kaka bedo maluor kinde moko kata bedo gi kiawa nosedok chien e okang’ moro. Yesu nose kata yiere mondo obed achiel kuom joote 12! Kata kamano, Petro ne pok oloyo chuth luoro gi kiawa mana kaka ne odhi fwenyo machiegni.

18, 19. (a) Ler ane gima Petro noneno kane en e Nam Galili. (b) Ang’o ma Yesu notimo ka Petro ne okwaye ni odhi ire?

¹⁸ Apoya nono, Petro noweyo kwang’o yie. Ne en arita mar ang’wen e otienono, ma ne chakore kar sa ochiko motieno nyaka wuok chieng’. Ne oneno ka gimoro wuotho e wi pi. Be dibed ni ler mar dwe ema ne menyo pi ma ne kirore? Ooyo, gino ne ochung’ tir kendo ne owuotho. Ne en dhano! Ee, ne en dhano mawuotho e wi pi! Kaka ng’atno ne medo sudo machiegni, ne chalo ka gima ng’ano dwa kalogi. Ne gibuok ahinya ka giparo ni en jachien. Kata kamano, ng’atno nowuoyo kodgi kowacho niya: “Horeuru, en mana an; kik uluor.” Kare ng’atni ne en Yesu!—Math. 14:25-28.

¹⁹ Petro nodwoko niya: “Ruoth, ka en in, chika abi iri e wi pi.” Okang’ ma ne Petro okawo mokwongono nonyiso chir. Petro ne mor ahinya gi hono makendeni kendo nodwaro ni omed tego yiene. Nodwaro ni en be owuoth e wi pi. Yesu noluonge. Petro nowuok e yie kendo ne odonjo e pi. Parie kaka Petro ne owinjo kane en e wi pi to chalo mana ka gima ochung’ e wi gimoro. Nyaka bed ni ne ohum ahinya sama ne owuotho e wi pi kodhi ir Yesu. Kata kamano, luoro nochako bedo maluor.—Som Mathayo 14:29.

20. (a) Ere kaka Petro nobedo gi kiawa, to ang’o ma ne otimorene nikech mano? (b) Yesu nomiyo Petro puonj mane maduong’?

²⁰ Ang’o momiyo ne dwarore ni Petro oteg wang’e kuom Yesu? En nikech Yesu ema ne tiyo gi teko mowuok kuom Jehova mondo omi Petro owuoth e wi apaka madongo. To Yesu notimo mano kaluwore gi kwayo mar Petro. Kata kamano, Petro ne oweyo tego wang’e kuom Yesu. Wasomo kama: “Ka noneno  yamo, noluor.” Kibaji nochako goyo Petro nikech noketo pache kuom apaka madongo dongo ma ne dhuolore ka goyo yie kendo keyo pi. Nyaka bed ni noparo ni odhi nimo. Kaka ne omedo luor, e kaka yiene be ne medo dok chien. Petro, jal ma ne iluongo ni Lwanda kata Kidi nikech ne en ng’ama nenore ni nyalo chung’ motegno, nochako nimo mana kaka kidi masie. Petro nong’eyo go abal, kata kamano, ne oneno ni goyo abal ne ok nyal konye gie sechego. Noywak niya: “Ruoth, resa!” Yesu nomako lwete ka ywaye malo. Ka pod Petro ni e wi pi, Yesu nojiwo ne Petro wach maduong’ e wi yie niya: “Yaye in man gi yie matin, iriwo gi kiawa nang’o?”—Math. 14:30, 31.

21. Ang’o momiyo bedo gi kiawa en gima rach, to ere kaka wanyalo kedo kode?

²¹ “Iriwo gi kiawa nang’o?”—donge mano ne en penjo mowinjore ahinya? Nyawo mar bedo gi kiawa nyalo ketho kama duong’ ahinya. Ka waweyo kidono mondo onya kuomwa, mano nyalo ketho yiewa kendo omi waketh winjruokwa gi Nyasaye. Nyaka waked gi kinda mondo walo nyawoni! E yo mane? Kuom keto pachwa e gik mowinjore. Kapo ni waketo pachwa kuom gik ma nyoso chunywa, kata ma galowa kik waket pachwa kuom Jehova gi Wuode, mano biro miyo wamed bedo gi kiawa. To ka waketo pachwa kuom gik ma Jehova gi Wuode osetimo, kata ma gitimo sani, kata ma gibiro timo ne jogo moherogi, mano biro konyowa kik wabed gi kiawa.

22. Ang’o momiyo luwo yie mar Petro en gima owinjore?

²² Sama ne Petro luwo Yesu ka gidhi e yie, ne oneno ka apaka lal. Nam Galili nokue thi. Petro kaachiel gi jopuonjre mamoko nowacho ne Yesu niya, “Adier in Wuod Nyasaye.” (Math. 14:33) Onge kiawa ni ka piny ne ru, Petro ne owinjo ka omor ahinya. Ne opuonjore ni ok onego owe luoro omi oket kiawa kuom Jehova kod Yesu. En adier ni pod ne onego otim dongruok e yore mang’eny mondo eka obed Jakristo motegno ka kidi mana kaka Yesu nowacho. Kata kamano, nong’ado mar ngino kendo timo dongruok. Be in gi kinda ma kamano? Ka en kamano, luwo yie mar Petro biro konyi ahinya.