Injili mar Johana 1:1-51
1 Kar chakruok Wach ne nitie,+ kendo Wach ne nigi Nyasaye,+ bende Wach ne en nyasaye.*+
2 Jali ne nigi Nyasaye kar chakruok.
3 Gik moko duto nobedoe kokalo kuome,+ kendo ka ok en, onge kata mana gimoro achiel ma dobetie.
4 Ngima nobedoe kokalo kuome, kendo ngimano ne en ler mar ji.+
5 Kendo ler rieny e mudho,+ to mudho ok oseloye.
6 Ng’at moro nobiro ma Nyasaye nooro; nyinge ne en Johana.+
7 Ng’atni nobiro kaka janeno, mondo ochiw neno e wi ler+ eka mondo ji mopogore opogore duto obed gi yie.
8 Ne ok en lerno,+ to nonego ochiw neno e wi lerno.
9 Ler madier ma chiwo ler ne ji mopogore opogore duto ne chiegni biro e piny.+
10 Ne en e piny,+ kendo piny nobedoe kokalo kuome,+ to piny ne ok ong’eye.
11 Nobiro ir joge owuon, to joge ne ok orwake.
12 Kata kamano, nomiyo ji duto ma ne orwake thuolo mar bedo nyithind Nyasaye,+ nimar ne giketo yie e nyinge.+
13 Ne onyuolgi, ok kuom remo kata kuom dwaro mar ringruok kata kuom dwaro mar dhano, to kokalo kuom Nyasaye.+
14 Omiyo, Wach nobedo ringruok+ mi nodak e kindwa, kendo ne waneno duong’ne, ma en duong’ kaka ma wuoyi ma miderma+ yudo kuom wuon mare; kendo nopong’ gi ng’wono mogundho mar Nyasaye kod adiera.
15 (Johana nochiwo neno kuome, ee, nokok kama: “Mani e jal ma nawacho kuome ni, ‘Ng’atno ma biro bang’a osetelo e nyima, nimar ne entie ka pok nabetie.’”)+
16 Nimar ne opong’ gi ng’wono mogundho, waduto wayudo ng’wono mogundho ma ok rum.
17 Nikech ne ochiw Chik kokalo kuom Musa,+ ng’wono mogundho+ kod adiera nobiro kokalo kuom Yesu Kristo.+
18 Onge dhano moseneno Nyasaye e kinde moro amora;+ to mana nyasaye ma en wuoyi ma miderma+ kendo manie bath* Wuon mare+ e ma oselere.+
19 Ma e neno ma Johana nochiwo ka Jo-Yahudi nooro jodolo gi Jo-Lawi moa Jerusalem ire mondo gipenje niya: “In e ng’a?”+
20 To ne odwokogi ratiro kama: “An ok an Kristo.”
21 Eka ne gipenje niya: “To kare in ng’a? In Elija, koso?”+ Nodwoko kama: “Ok an Elija.” “Be in e Janabi?”+ Nodwoko niya: “Ooyo!”
22 Omiyo, ne gipenje kama: “To kare in ng’a? Nyiswa mondo wadwok wach ne jo ma oorowa. In iwuon iwacho ni in ng’a?”
23 Nodwokogi niya: “An ng’at ma dwonde kok e thim kama, ‘Losuru yo moriere tir ne Jehova,’*+ mana kaka janabi Isaya nokoro.”+
24 Jo-Farisai e ma ne ooro jogo.
25 Omiyo, ne gipenje niya: “To kare ang’o momiyo ibatiso ji ka ok in e Kristo, kata Elija, kata Janabi?”
26 Johana nodwokogi niya: “Abatiso ji gi pi. Nitie ng’at mochung’ e kindu ma ok ung’eyo.
27 En ng’at ma biro bang’a, to ok awinjora gonyo tond wuochene.”+
28 Gigo notimore e Bethania loka Jordan, kama Johana ne batisoe ji.+
29 Kinyne Johana noneno Yesu ka biro ire mi nowacho kama: “Neuru, Nyarombo+ mar Nyasaye ma golo richo+ mar piny!+
30 Ma e ng’at ma nawacho kuome niya: ‘Nitie ng’at ma biro bang’a to osetelo e nyima nimar ne entie ka pok nabetie.’+
31 To bende ne ok ang’eye, to gimomiyo ne abiro ka abatiso ji gi pi ne en ni mondo ng’atno ong’ere maler ne Israel.”+
32 Bende, Johana nochiwo neno kowacho niya: “Ne aneno roho ka lor piny koa e polo kaka akuru, mopiyo kuome.+
33 Bende, ne ok ang’eye, to Jal ma noora mondo abatis ji gi pi e ma nowachona ni, ‘Ng’at ma inine ka roho olor kendo obet kuome,+ ma e ng’atno ma batiso ji gi roho maler.’+
34 Kendo aseneno mano, mi asechiwo neno ni jali e Wuod Nyasaye.”+
35 Kinyne Johana noyudo ochung’ gi jopuonjrene moko ariyo,
36 to ka noneno Yesu ka kalo, nowacho niya: “Neuru, Nyarombo+ mar Nyasaye!”
37 Ka jopuonjre ariyogo nowinje kowacho kamano, ne giluwo Yesu.
38 Ka Yesu nolokore monenogi ka giluwe, nopenjogi niya: “En ang’o ma umanyo?” Ne gidwoke kama: “Rabi (ma kolok to tiende en, “Japuonj”), idak kanye?”
39 Nowachonegi niya: “Biuru mondo une.” Omiyo, ne gidhi mi gineno kama nodakie, kendo ne gibet kode chieng’no; to sechego ne en kar sa apar odhiambo.
40 Andrea+ owadgi Simon Petro ne en achiel kuom ji ariyo ma nowinjo gima Johana nowacho mi noluwo Yesu.
41 Mokwongo noyudo Simon owadgi, mi nowachone kama: “Waseyudo Mesia”+ (ma kolok to tiende en, “Kristo”),
42 kendo notere ir Yesu. Ka Yesu nong’iye nokone niya: “In Simon+ wuod Johana; ibiro luongi ni Kefa” (ma kolok to en “Petro”).+
43 Kinyne Yesu ne dwaro dhi Galili. Nonwang’o Filipo+ mowachone kama: “Bed jalupna.”
44 Koro Filipo ne en Ja-Bethsaida, taon ma Andrea gi Petro ne wuokie.
45 Filipo nonwang’o Nathaniel+ mowachone niya: “Waseyudo jal ma Musa nondiko kuome e Chik kendo mondik wachne e weche Jonabi: en Yesu ma wuod Josef,+ ma wuok Nazareth.”
46 To Nathaniel nopenje kama: “Be nitie gima ber ma nyalo wuok Nazareth?” Filipo nodwoke niya: “Bi mondo ine.”
47 Ka Yesu noneno Nathaniel ka biro ire, nowacho kama: “Neuru, Ja-Israel ma kuom adier, onge wuondruok kuome.”+
48 Nathaniel nopenje niya: “Ing’eya nade?” Yesu nowachone kama: “Ne aneni ka ibet e tiend ng’owo sa ma Filipo ne pok oluongi.”
49 Nathaniel nodwoke niya: “Rabi, in e Wuod Nyasaye, in Ruodh Israel.”+
50 Yesu nowachone kama: “Iyie mana nikech awachoni ni ne aneni e tiend ng’owo? Ibiro neno gik madongo moloyo magi.”
51 Kae to nowachone kama: “Adier akonu ni, ubiro neno polo koyawore, kendo ka malaike mag Nyasaye idho kendo lor ir Wuod dhano.”+
Weche Moler Piny
^ Kata, “ne chal gi Nyasaye.”
^ Mae nyiso ng’at ma nigi migawo makende ahinya.
^ Som Apendiks A5.
