၂ ကရံၣ်သူး ၉:၁-၁၅
၉ နီၢ်ကီၢ်န့ၣ် တလိၣ်လၢယကွဲးန့ၢ်သု ဘၣ်ဃးဒီး တၢ်မၤစၢၤ* လၢပှၤစီဆှံတဖၣ် အဂီၢ်ဘၣ်.+
၂ ယသ့ၣ်ညါလၢ သုသးအိၣ်မၤစၢၤတၢ် ဒီးယပတြၢၤသုလၢ ပှၤမၤက့းဒနံဖိတဖၣ် အမဲာ်ညါ ဒီးယတဲဘၣ် အဝဲသ့ၣ်လၢ သုဝဲလၢအမ့ၢ် ပှၤလၢအအိၣ်လၢ အဃါယၤကီၢ်ရ့ၣ်န့ၣ် သုအိၣ်ကတဲာ်ကတီၤ ပာ်စၢၤသုသး အိၣ်တနံၣ်လံ. ဒီးသုတၢ်သူၣ်ဆူၣ်သးဆူၣ်အံၤ ထိၣ်ဟူးထိၣ်ဂဲၤထီၣ် အဝဲသ့ၣ်အါဂၤလံ.
၃ ဒ်သိး ပတၢ်ပာ်ကဖၢလၢပသး လၢသုဃိ ဘၣ်ဃးဒီး တၢ်ဂ့ၢ်အဝဲအံၤ သုတကဲထီၣ် တၢ်ကလီကလီ တဂ့ၤအဂီၢ် ဒီးဒ်သိး သုကအိၣ်ကတဲာ်ကတီၤသုသး နီၢ်ကီၢ် ဒ်ယတဲတ့ၢ်အသိး အဂီၢ် ယကဆှၢလီၤ ဒီပုၢ်ဝဲၢ်ခွါတဖၣ်လၢသုအိၣ်လီၤ.
၄ ယမ့ၢ်တမၤဒ်န့ၣ်ဘၣ် ဒီးပှၤမၤက့းဒနံဖိတဖၣ် မ့ၢ်လဲၤပိာ်ယခံဒီး မ့ၢ်ထံၣ်ဝဲလၢ သုတအိၣ်ကတဲာ်ကတီၤ သုသးဒံးဘၣ်န့ၣ် သုကမဲာ်ဆှးလီၤ. ဒီးပဝဲစ့ၢ်ကီး ပကမဲာ်ဆှး မ့ၢ်လၢ ပနာ်န့ၢ်ပာ်စၢၤသု အဃိလီၤ.
၅ အဃိ ယဆိကမိၣ်အလီၢ်အိၣ်လၢ ယကဟ့ၣ်သဆၣ်ထီၣ် ဒီပုၢ်ဝဲၢ်ခွါတဖၣ်အံၤလၢ အကလဲၤဆိလၢသုအိၣ် ဒ်သိး ကကတဲာ်ကတီၤဆိပာ်စၢၤ သုတၢ်ဟ့ၣ်လၢ သုအၢၣ်လီၤတ့ၢ်လၢ သုကဟ့ၣ်လီၤန့ၣ်လီၤ. ဒီးဖဲပလဲၤတုၤအခါ သုတၢ်ဟ့ၣ်လၢ အဒိၣ်အမုၢ်တခါအံၤ ကအိၣ်ကတဲာ်ကတီၤ ပာ်စၢၤအသးအဃိ ကပာ်ဖျါထီၣ်ဝဲလၢ သုဟ့ၣ်တၢ်ဟ့ၣ်အံၤန့ၣ် တမ့ၢ်လၢ တၢ်မၢဆူၣ်အဃိဘၣ်, မ့ၢ်လၢသုမ့ၢ် ပှၤလၢအဟ့ၣ်တၢ်ညီ အဃိလီၤ.
၆ ယအဲၣ်ဒိးတဲလၢ ပှၤလၢအဖှံတၢ်စှၤန့ၣ် ကကူးဘၣ်တၢ်စှၤလီၤ. မ့မ့ၢ်ပှၤလၢ အဖှံတၢ် အါအါဂီၢ်ဂီၢ်န့ၣ် ကကူးဘၣ်တၢ် အါအါဂီၢ်ဂီၢ်လီၤ.+
၇ ကစၢ်ယွၤ အဲၣ်ပှၤလၢ အဟ့ၣ်တၢ်လၢ တၢ်သူၣ်ဖှံသးညီအပူၤအဃိ+ မ်ပှၤကိးဂၤဒဲးဟ့ၣ်တၢ် ဒ်အဆၢတဲာ်ပာ်စၢၤလီၤအသး အသိးတက့ၢ်. ဒီးတဘၣ်မ့ၢ်လၢ တၢ်သးတအိၣ်ဘၣ်အပူၤ မ့တမ့ၢ် လၢတၢ်မၢဆူၣ် အဃိဘၣ်.+
၈ ဒ်သိး သုကအိၣ်ဒီး တၢ်ခဲလၢာ်လၢ သုလိၣ်ဘၣ်လၢ သုနီၢ်ကစၢ်အဂီၢ် ဒီးဒ်သိး သုတၢ်ကအိၣ် အါအါဂီၢ်ဂီၢ် လၢသုကမၤတၢ်မၤလၢအဂ့ၤ ကိးမံၤဒဲးအဂီၢ် ကစၢ်ယွၤ ပာ်ဖျါထီၣ် အတၢ်သးကညီၤ ဒိၣ်ဒိၣ်မုၢ်မုၢ် လၢသုဖီခိၣ် သ့ဝဲသပှၢ်တၢၢ်လီၤ.+
၉ (ဒ်တၢ်ကွဲးအသး အိၣ်ဝဲအသိး “အဝဲဟ့ၣ်နီၤလီၤတၢ် အါအါဂီၢ်ဂီၢ် ဒီးအဝဲဟ့ၣ်လီၤတၢ်လၢ ပှၤဖှီၣ်ဖိယာ်ဖိ အအိၣ်လီၤ. ဒီးအတၢ်တီတၢ်လိၤန့ၣ် ဆဲးအိၣ်ဝဲ လီၤထူလီၤယိာ်လီၤ.”+
၁၀ ကစၢ်ယွၤလၢ အဟ့ၣ်လီၤတၢ်ချံ အါအါဂီၢ်ဂီၢ်ဆူ ပှၤဖှံလီၤတၢ်ဖိအအိၣ် ဒီးဟ့ၣ်လီၤကိၣ်လၢ ပှၤကအီၣ်အီၤန့ၣ် အဝဲ ကဟ့ၣ်လီၤသုတၢ်ချံ ဒီးဟ့ၣ်လီၤသု အါအါဂီၢ်ဂီၢ်လီၤ. ဒီးသုကဖှံလီၤတၢ် ဒီးသုကကူးဘၣ်တၢ် အါအါဂီၢ်ဂီၢ် ခီဖျိလၢ သုမၤတၢ် တီတီလိၤလိၤအဃိလီၤ.)
၁၁ လၢတၢ်ခဲလၢာ်အပူၤ ကစၢ်ယွၤ ဒုးထူးဒုးတီၤထီၣ်သု ဒ်သိး သုကဟ့ၣ်တၢ်ညီ လၢကျဲအကလုာ်ကလုာ်လီၤ. ဒီးခီဖျိလၢ ပှၤအဃိ သုဟ့ၣ်တၢ်ညီအံၤ ကကဲထီၣ် တၢ်စံးဘျုးစံးဖှိၣ် ကစၢ်ယွၤလီၤ.
၁၂ တၢ်မၤတခါအံၤလၢ အကကဲထီၣ် တၢ်မၤစၢၤလၢ ပှၤဂၤအဂီၢ်န့ၣ် ကမၤလၢပှဲၤ ပှၤစီဆှံတဖၣ် အတၢ်လိၣ်ဘၣ် ဂ့ၤဂ့ၤဘၣ်ဘၣ်+ တကးဒံးဘၣ် ကကဲထီၣ် တၢ်စံးဘျုးစံးဖှိၣ် ကစၢ်ယွၤအါမးလီၤ.
၁၃ တၢ်မၤစၢၤအံၤ ကပာ်ဖျါထီၣ်ဝဲ တၢ်အုၣ်အသးလၢ သုမၤဒ် သုစံၣ်တဲၤတဲလီၤ တၢ်သးခုကစီၣ်လၢ အဘၣ်ဃးဒီး ခရံာ်အသိး ဒီးသုသးအိၣ်ဟ့ၣ်မၤစၢၤ အဝဲသ့ၣ် ဒီးပှၤအဂၤခဲလၢာ်လီၤ. အဃိ အဝဲသ့ၣ် ကမၤလၤကပီၤ ကစၢ်ယွၤလီၤ.+
၁၄ အဝဲသ့ၣ်ဃ့ကညး ကစၢ်ယွၤလၢသုဂီၢ် ဒီးအဝဲသ့ၣ်အဲၣ်သု မ့ၢ်လၢ ကစၢ်ယွၤ ပာ်ဖျါထီၣ် အတၢ်သးကညီၤ ဒိၣ်ဒိၣ်မုၢ်မုၢ် လၢသုဖီခိၣ်အဃိလီၤ.
၁၅ ပစံးဘျုးဘၣ် ကစၢ်ယွၤဒိၣ်မး ခီဖျိလၢ အတၢ်ဟ့ၣ်ကလီ လၢပတဲဖျါထီၣ် တလၢာ်ဘၣ်အဃိလီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “တၢ်အခ့အပှၤအတၢ်မၤ.”