ကလၤတံ ၅:၁-၂၆
၅ ဒ်သိးပကအိၣ်ဒီး တၢ်သဘျ့ဒ်န့ၣ်အဂီၢ် ခရံာ်မၤထူၣ်ဖျဲးပှၤလီၤ. အဃိ ဆၢထၢၣ် ဂၢၢ်ဂၢၢ်ကျၢၤကျၢၤ+ ဒီးတဘၣ်ဟ့ၣ်အခွဲးလၢ သုကအိၣ်လၢ ကုၢ်အနီၣ်ယိးဘိအဖီလာ် တဘျီကဒီးတဂ့ၤ.+
၂ ယၤ, စီၤပီလူးတဲဘၣ်သုလၢ သုမ့ၢ်ဒိးတၢ်ကူးတရံးန့ၣ် ခရံာ်တကဲဘျုးလၢ သုဂီၢ်နီတမံၤဘၣ်.+
၃ ယအုၣ်ကဒီးယသးလၢ ပိာ်ခွါလၢ အဒိးတၢ်ကူးတရံး ကိးဂၤဒဲးန့ၣ် အမူဒါအိၣ်ဝဲလၢ အကဘၣ်မၤထွဲ စီၤမိၤၡ့ အတၢ်သိၣ်တၢ်သီ ခဲလၢာ်လီၤ.+
၄ သုဝဲလၢ အဂုာ်ကျဲးစၢး ပာ်တီပာ်လိၤသုသး ခီဖျိလၢ တၢ်သိၣ်တၢ်သီ အဃိန့ၣ် သုမၤလီၤဖးသုသးဒီး ခရံာ်လံ.+ ဒီးသုတဘၣ်ဃးဒီး အတၢ်သးကညီၤ ဒိၣ်ဒိၣ်မုၢ်မုၢ်လၢၤဘၣ်.
၅ မ့မ့ၢ်ပဝဲဒၣ်န့ၣ် ခီဖျိလၢသးစီဆှံအဃိ ပအိၣ်ခိးကွၢ်လၢ်တၢ်လၢ တၢ်သူၣ်ဆူၣ်သးဆူၣ်အပူၤ ဒီးပမုၢ်လၢ်လၢ ပကဒိးန့ၢ်ဘၣ်တၢ်တီတၢ်လိၤ ခီဖျိတၢ်နာ်အဃိလီၤ.
၆ ယ့ၣ်ၡူးခရံာ်အပျဲၢ်အဘီၣ်န့ၣ် အဒိးတၢ်ကူးတရံးမ့ၢ်ဂ့ၤ, တဒိးတၢ်ကူးတရံးဘၣ်မ့ၢ်ဂ့ၤ အရ့တဒိၣ်ဘၣ်.+ မ့မ့ၢ် တၢ်နာ်လၢအမၤတၢ် ခီဖျိတၢ်အဲၣ်တၢ်ကွံန့ၣ် အရ့ဒိၣ်ဝဲလီၤ.
၇ လၢညါန့ၣ် သုလဲၤတၢ်လၢ တၢ်မ့ၢ်တၢ်တီအကျဲပူၤ ဂ့ၤဂ့ၤလီၤ.*+ ဒ်သိးသုတဆဲးဒိကနၣ် တၢ်မ့ၢ်တၢ်တီတဂ့ၤအဂီၢ် မ့ၢ်မတဂၤ မၤတံာ်တာ်သုလဲၣ်.
၈ တၢ်ကွဲန့ၢ်လွဲန့ၢ် တခါအံၤ တဟဲလၢပှၤလၢ အကိးန့ၢ်သုတဂၤန့ၣ် အအိၣ်ဘၣ်.
၉ ကိၣ်မံၣ်တစဲးဖိန့ၣ် မၤပွးထီၣ်ကိၣ် ဒီဖျၢၣ်ညါလီၤ.+
၁၀ သုဝဲလၢ အမ့ၢ် ကစၢ်အပျဲၢ်အဘီၣ်န့ၣ် ယနာ်သပှၢ်တၢၢ်လၢ သုတၢ်ထံၣ် ကလီၤဂာ်ဒီးယၤလီၤ.+ ဘၣ်ဆၣ် ပှၤတဂၤဂ့ၤ တဂၤဂ့ၤ လၢအမၤကီမၤခဲသုန့ၣ်+ ကဘၣ်တၢ်စံၣ်ညီၣ်လၢ အကြၢးဒီးအီၤလီၤ.
၁၁ ဒီပုၢ်ဝဲၢ်သ့ၣ်ဧၢ, မ့မ့ၢ်ယၤန့ၣ် ယမ့ၢ်စံၣ်တဲၤတဲလီၤဒံး တၢ်ဒိးတၢ်ကူးတရံးအဂ့ၢ်န့ၣ် တမ့ၢ်လၢ ပှၤကမၤနးမၤဖှီၣ်ယၤဘၣ်. ဒီးယမ့ၢ်မၤဒ်န့ၣ်န့ၣ် တၢ်လီၤဃံၢ်အလီၢ် လၢအဘၣ်ဃးဒီး တၢ်မၤအၢမၤနး အသ့ၣ်တၢၣ်န့ၣ်*+ လီၤမၢ်ကွံာ်ဝဲလံ.
၁၂ ပှၤလၢ အမၤဒ့ဒီသုသးန့ၣ် ယမုၢ်လၢ်လၢ အဝဲသ့ၣ် ကဒ့လီၤကွံာ် အနီၢ်ကစၢ်အဒံၣ်လီၤ.*
၁၃ ဒီပုၢ်ဝဲၢ်သ့ၣ်ဧၢ, တၢ်ကိးန့ၢ်သု ဒ်သိးသုကဒိးန့ၢ်ဘၣ် တၢ်သဘျ့အဂီၢ်လီၤ. ဘၣ်ဆၣ် တဘၣ်သူတၢ်သဘျ့အံၤ ဒ်တၢ်ခွဲးတၢ်ယာ်လၢ သုကမၤထွဲ ဒ်တၢ်ဖံးတၢ်ညၣ် အတၢ်သူၣ်လီသးကွံတဖၣ် အသိးတဂ့ၤ.+ လၢတၢ်န့ၣ်အလီၢ် မၤစၢၤလိာ်သးတဂၤဒီးတဂၤ ဒ်ကုၢ်အသိးလၢ တၢ်အဲၣ်တၢ်ကွံ အပူၤတက့ၢ်.+
၁၄ စီၤမိၤၡ့ အတၢ်သိၣ်တၢ်သီခဲလၢာ် ဘၣ်တၢ်မၤ လၢထီၣ်ပှဲၤထီၣ်အီၤလၢ တၢ်မၤလိာ်တထံၣ် လၢအမ့ၢ် “နကဘၣ် အဲၣ်ပှၤလၢနဃၢၤ ဒ်နအဲၣ်လီၤနနီၢ်ကစၢ် အသးအသိးလီၤ.”+
၁၅ ဘၣ်ဆၣ် သုမ့ၢ်ဆဲးအ့ၣ်လိာ်ဝာ်လိာ်သုသး တဂၤဒီးတဂၤန့ၣ်+ တၢ်ဘၣ်ယိၣ်အလီၢ်အိၣ်လၢ သုကမၤဟးဂီၤလိာ်သုသး လၢာ်လၢာ်ဆ့ဆ့လီၤ.+
၁၆ ယကတဲသုဒ်အံၤ, လဲၤတၢ်ဒ်သးစီဆှံ အတၢ်ဟံးစုနဲၣ်ကျဲအသိးတက့ၢ်.+ သုမ့ၢ်မၤဒ်န့ၣ်န့ၣ် တမ့ၢ်လၢသုကမၤထွဲ တၢ်ဖံးတၢ်ညၣ် အတၢ်သူၣ်လီသးကွံ နီတမံၤလၢၤဘၣ်.+
၁၇ တၢ်ဖံးတၢ်ညၣ် အတၢ်သူၣ်လီသးကွံန့ၣ် ထီဒါလိာ်အသးဒီး သးစီဆှံလီၤ. ဒီးသးစီဆှံန့ၣ် ထီဒါလိာ်အသးဒီး တၢ်ဖံးတၢ်ညၣ် အတၢ်သူၣ်လီသးကွံလီၤ. တၢ်ဖံးတၢ်ညၣ် အတၢ်သူၣ်လီသးကွံ ဒီးသးစီဆှံန့ၣ် ထီဒါလိာ်အသးအဃိ တၢ်လၢ သုအဲၣ်ဒိးမၤန့ၣ် သုတမၤအီၤဘၣ်.+
၁၈ သုမ့ၢ်မၤထွဲသးစီဆှံ အတၢ်ဟံးစုနဲၣ်ကျဲန့ၣ် သုတအိၣ်လၢ တၢ်သိၣ်တၢ်သီ အဖီလာ်လၢၤဘၣ်.
၁၉ တၢ်ဖံးတၢ်ညၣ် အတၢ်သူၣ်လီသးကွံ အတၢ်မၤတဖၣ်န့ၣ် အိၣ်ဖျါဝဲၡဲၡဲ ဒီးမ့ၢ်ဝဲ တၢ်မၤကမၣ်မုၣ်ကမၣ်ခွါ,*+ တၢ်တကဆှီဘၣ်, တၢ်မၤကမၣ်တၢ်လၢ တအိၣ်ဒီးတၢ်မဲာ်ဆှး,*+
၂၀ တၢ်ဘါတၢ်ဂီၤတၢ်ဖှီၣ်, တၢ်ဝံတၢ်နါ အတၢ်ဖံးတၢ်မၤ,+ တၢ်ထီဒုၣ်ထီဒါလိာ်သး, တၢ်အ့ၣ်လိာ်ဆိးက့, တၢ်ထံၣ်ကမၣ်ပှၤဂၤ, တၢ်သးဒိၣ်ထီၣ်တၢ်, တၢ်သးတလီၤပလိာ်လိာ်သး, တၢ်လီၤမုၢ်လီၤဖး, တၢ်လူၤပိာ်ပှၤကညီအခံ,
၂၁ တၢ်သူၣ်က့ၣ်သးကါ, တၢ်အီမူၤသံး,*+ မူးပွဲလၢ အလီၤရၢၢ်လီၤစၢၢ် ဒီးတၢ်အဂၤလၢ အလီၤဂာ်ဒီး တၢ်သ့ၣ်တဖၣ်န့ၣ်လီၤ.+ ဒ်ယဟ့ၣ်ပလီၢ်ပာ်စၢၤသု ဘၣ်ဃးဒီး တၢ်ဂ့ၢ်သ့ၣ်တဖၣ်န့ၣ်အသိး ယကဟ့ၣ်ပလီၢ်ကဒီးသုလၢ ပှၤလၢအဆဲးမၤ တၢ်သ့ၣ်တဖၣ်န့ၣ် တန့ၢ်သါဘၣ် ယွၤအဘီအမုၢ်ဘၣ်.+
၂၂ မ့မ့ၢ် သးစီဆှံအတၤသၣ်န့ၣ် မ့ၢ်ဝဲ တၢ်အဲၣ်တၢ်ကွံ, တၢ်သူၣ်ခုသးခု, တၢ်သူၣ်မံသးမုာ်,* တၢ်ဝံသးစူၤ, တၢ်သူၣ်ဂ့ၤသးဝါ, တၢ်မၤဂ့ၤတၢ်,+ တၢ်စူၢ်တၢ်နာ်,
၂၃ တၢ်သူၣ်စူၤသးစူၤ ဒီးတၢ်ပၢၤသူၣ်ပၢၤသးလီၤ.+ တၢ်သိၣ်တၢ်သီလၢ အထီဒါ တၢ်သ့ၣ်တဖၣ်န့ၣ် တအိၣ်နီတမံၤဘၣ်.
၂၄ ဒီးပှၤလၢအမ့ၢ် ယ့ၣ်ၡူးခရံာ်အတၢ်န့ၣ် အဝဲသ့ၣ် ပျၤထီၣ်ကွံာ် တၢ်ဖံးတၢ်ညၣ် အတၢ်သူၣ်လီသးကွံ ဒီးအတၢ်မိၣ်န့ၢ်သးလီတဖၣ် လၢသ့ၣ်တၢၣ်အလိၤလီၤ.+
၂၅ ပမ့ၢ်အိၣ်မူဒ် သးစီဆှံအတၢ်ဟံးစုနဲၣ်ကျဲအသိးန့ၣ် မ်ပဆဲးမၤထွဲဒ် သးစီဆှံ အတၢ်ဟံးစုနဲၣ်ကျဲ အသိးတက့ၢ်.+
၂၆ မ်ပသုတကဲထီၣ် ပှၤလၢအပာ်ထီၣ်ထီအသးတဂ့ၤ,+ တဘၣ်ဒုးအိၣ်ထီၣ် တၢ်ပြၢလိာ်သးတဂ့ၤ+ ဒီးတဘၣ် သူၣ်က့ၣ်သးကါလိာ်သးတဂ့ၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “လၢညါန့ၣ် သုဃ့ၢ်ဂ့ၤဂ့ၤ.”
^ ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “ကဲထီၣ်ပှၤဒ့ဒံၣ်ဖိ” အဃိ အဝဲသ့ၣ်အနီၢ်ကစၢ်ဒၣ်ဝဲ တတုၤထီၣ်ထီၣ်ဘးလၢ ကမၤထွဲတၢ်သိၣ်တၢ်သီအံၤ စ့ၢ်ကီးဘၣ်.
^ ကြံးကျိာ် မ့ၢ်ဝဲ ဖီနံယၤ. ကွၢ် တၢ်ကတိၤအခီပညီ.
^ ကြံးကျိာ် မ့ၢ်ဝဲ အဲၤ(လ်)စံယၤ. ကွၢ် တၢ်ကတိၤအခီပညီ.
^ ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “တၢ်ဃူတၢ်ဖိး.”
