ကလၤတံ ၃:၁-၂၉
-
တၢ်မၤထွဲ စီၤမိၤၡ့အတၢ်သိၣ်တၢ်သီအဂ့ၢ် ဒီးတၢ်နာ်အဂ့ၢ် (၁-၁၄)
-
ပှၤတီပှၤလိၤန့ၣ် ကမူဝဲလၢ အတၢ်နာ်အဃိ (၁၁)
-
-
စီၤအၤဘြၤဟၣ် တဒိးန့ၢ်ဘၣ် တၢ်အၢၣ်လီၤ ခီဖျိတၢ်သိၣ်တၢ်သီ အဃိဘၣ် (၁၅-၁၈)
-
ခရံာ်မ့ၢ်ဝဲ စီၤအၤဘြၤဟၣ် အချံအသၣ် (၁၆)
-
-
တၢ်သိၣ်တၢ်သီ အခီၣ်ထံးခီၣ်ဘိ ဒီးအတၢ်တိာ်ပာ် (၁၉-၂၅)
-
ကဲထီၣ်ကစၢ်ယွၤအဖိခွါတဖၣ် ခီဖျိလၢတၢ်နာ် (၂၆-၂၉)
-
ပှၤလၢအမ့ၢ်ခရံာ်အတၢ်န့ၣ် မ့ၢ်ဝဲ စီၤအၤဘြၤဟၣ် အချံအသၣ် (၂၉)
-
၃ ပှၤကလၤတံဖိလၢ အသးတဆးဘၣ်သ့ၣ်ဧၢ, မ့ၢ်မတဂၤလံၣ်န့ၢ်လီန့ၢ်သုလဲၣ်.+ တၢ်ပျၤထီၣ် ယ့ၣ်ၡူးခရံာ် လၢသ့ၣ်တၢၣ်အလိၤအဂ့ၢ်န့ၣ် လၢညါ ပဒုးနၢ်ပၢၢ်သု လီၤတံၢ်လီၤဆဲးလီၤ.+
၂ ယအဲၣ်ဒိးသံကွၢ်သု တၢ်တမံၤ. မ့ၢ်သုဒိးန့ၢ်ဘၣ်သးစီဆှံ ခီဖျိလၢ တၢ်မၤလၢအဘၣ်ထွဲဒီး တၢ်သိၣ်တၢ်သီအဃိဧါ မ့တမ့ၢ် ခီဖျိလၢ သုနာ်တၢ်လၢ သုနၢ်ဟူဘၣ်တဖၣ် အဃိဧါ.+
၃ မ့ၢ်သုသးတဆးဘၣ် ထဲထဲအံၤညါဧါ. လၢအခီၣ်ထံးန့ၣ် သုစးထီၣ်လဲၤတၢ် ဒ်သးစီဆှံ အတၢ်ဟံးစုနဲၣ်ကျဲအသိး မ့မ့ၢ် ခဲအံၤန့ၣ် မ့ၢ်သုကမၤကတၢၢ်က့ၤအီၤ ဒ်ပှၤဟီၣ်ခိၣ်ဖိ အတၢ်ကူၣ်ထီၣ်ဖးလီၤ အသိးဧါ.+
၄ သုလဲၤခီဖျိ တၢ်နးတၢ်ဖှီၣ်ဒီဒူၣ်န့ၣ် မ့ၢ်အဘျုးတအိၣ် နီတမံၤဘၣ်ဧါ. ယနာ်လၢ အတမ့ၢ်ဒ်န့ၣ်ဘၣ်.
၅ ပှၤလၢ အဟ့ၣ်လီၤသုသးစီဆှံ ဒီးမၤတၢ်လီၤလး+ လၢသုကျါတဂၤန့ၣ် မ့ၢ်အမၤဝဲဒ်န့ၣ်ခီဖျိလၢ သုတၢ်မၤလၢအဘၣ်ထွဲဒီး တၢ်သိၣ်တၢ်သီအဃိဧါ မ့တမ့ၢ် ခီဖျိလၢ သုနာ်တၢ်လၢ သုနၢ်ဟူဘၣ်တဖၣ် အဃိဧါ.
၆ မ့ၢ်လၢ စီၤအၤဘြၤဟၣ် “နာ်ယဟိဝၤယွၤ* အဃိ အဘၣ် တၢ်ပာ်ပနီၣ်အီၤဒ် ပှၤတီပှၤလိၤအသိးလီၤ.”+
၇ သုသ့ၣ်ညါသပှၢ်တၢၢ်လၢ ပှၤလၢအအိၣ်ဒီးတၢ်နာ်န့ၣ် မ့ၢ်ဝဲစီၤအၤဘြၤဟၣ် အဖိတဖၣ်လီၤ.+
၈ ဒီးတၢ်ကွဲးအသး ပာ်ဖျါထီၣ်ဆိပာ်စၢၤဝဲလၢ ကစၢ်ယွၤ ကပာ်တီပာ်လိၤ ပှၤကလုာ်တဖၣ် ခီဖျိလၢ တၢ်နာ်အဃိလီၤ. လၢတၢ်န့ၣ်အဃိ တၢ်ကွဲးအသးဘိးဘၣ်သ့ၣ်ညါဆိ တၢ်သးခုကစီၣ်ဆူ စီၤအၤဘြၤဟၣ် ဒီးတဲဝဲလၢ “ပှၤကိးကလုာ်ဒဲး ကဘၣ်တၢ်ဆိၣ်ဂ့ၤ ခီဖျိလၢနၤလီၤ.”+
၉ အဃိ ပှၤလၢအအိၣ်ဒီး တၢ်နာ်န့ၣ် ဘၣ်ဆိၣ်ဂ့ၤ ဃုာ်ဒီးစီၤအၤဘြၤဟၣ် လၢအအိၣ်ဒီး တၢ်နာ်လီၤ.+
၁၀ ပှၤလၢအသန့ၤအသး လၢတၢ်မၤလၢ အဘၣ်ထွဲဒီး တၢ်သိၣ်တၢ်သီ ကိးဂၤဒဲးန့ၣ် အိၣ်လၢတၢ်ဆိၣ်အၢအဖီလာ်, မ့ၢ်လၢ တၢ်ကွဲးအသးအိၣ်ဝဲလၢ “ပှၤလၢ အတအိၣ်မူမၤထွဲ တၢ်ခဲလၢာ် လၢအဘၣ်တၢ်ကွဲးလီၤအီၤလၢ စီၤမိၤၡ့ အတၢ်သိၣ်တၢ်သီအပူၤဘၣ်န့ၣ် ကဘၣ်ဆိၣ်အၢ ကိးဂၤဒဲးလီၤ.”+
၁၁ တကးဒံးဘၣ် တၢ်ကွဲးအသးပာ်ဖျါထီၣ်ဝဲလၢ “ပှၤတီပှၤလိၤန့ၣ် ကမူဝဲလၢ အတၢ်နာ်အဃိလီၤ.”+ အဃိ ပထံၣ်ဘၣ်လၢ ကစၢ်ယွၤ တပာ်တီပာ်လိၤပှၤ ခီဖျိလၢ တၢ်သိၣ်တၢ်သီအဃိ နီတဂၤဘၣ်.+
၁၂ စီၤမိၤၡ့ အတၢ်သိၣ်တၢ်သီန့ၣ် တဘၣ်ဃးဒီး တၢ်နာ်ဘၣ်. လၢတၢ်န့ၣ်အလီၢ် တၢ်ကွဲးအသး အိၣ်ဝဲလၢ “ပှၤတဂၤဂ့ၤ တဂၤဂ့ၤလၢအမၤထွဲ တၢ်သ့ၣ်တဖၣ်အံၤန့ၣ် ကမူဝဲလၢ တၢ်သ့ၣ်တဖၣ်အံၤအဃိလီၤ.”+
၁၃ ခရံာ်ပှ့ၤပှၤ+ ဒီးမၤထူၣ်ဖျဲးထီၣ်က့ၤပှၤလၢ+ တၢ်ဆိၣ်အၢလၢ အဘၣ်ထွဲဒီး စီၤမိၤၡ့ အတၢ်သိၣ်တၢ်သီ ခီဖျိလၢ အဝဲကဲထီၣ် တၢ်ဆိၣ်အၢလၢပလီၢ်လီၤ. ဒ်တၢ်ကွဲးအသး အိၣ်ဝဲအသိး “ပှၤလၢ အဘၣ်တၢ်ပျၤထီအီၤလၢ သ့ၣ်တၢၣ်အလိၤန့ၣ် ဘၣ်တၢ်ဆိၣ်အၢကိးဂၤဒဲးလီၤ.”+
၁၄ တၢ်မၤအသးဒ်န့ၣ်န့ၣ် မ့ၢ်ဒ်သိး တၢ်ဆိၣ်ဂ့ၤလၢ စီၤအၤဘြၤဟၣ် န့ၢ်ဘၣ်ဝဲန့ၣ် ကလီၤဘၣ်လၢ ပှၤကလုာ်တဖၣ်အဖီခိၣ် ခီဖျိလၢ ယ့ၣ်ၡူးခရံာ်အဃိ+ ဒီးဒ်သိး ပကဒိးန့ၢ်ဘၣ် သးစီဆှံလၢကစၢ်ယွၤ အၢၣ်လီၤတ့ၢ်ဝဲလၢ အကဟ့ၣ်ပှၤ+ ခီဖျိလၢ ပတၢ်နာ်အဃိလီၤ.
၁၅ ဒီပုၢ်ဝဲၢ်သ့ၣ်ဧၢ, ယကတဲဘၣ်သု တၢ်အဒိတမံၤလီၤ. ပှၤဟီၣ်ခိၣ်ဖိတဖၣ်ဒၣ်လဲာ် တုၤလၢအဝဲသ့ၣ် မ့ၢ်ပာ်ဂၢၢ်ပာ်ကျၢၤ တၢ်အၢၣ်လီၤအီလီၤ တမံၤမံၤန့ၣ် ပှၤမၤဟးဂီၤကွံာ်အီၤမ့ၢ်ဂ့ၤ, မၤအါထီၣ်ဝဲ တၢ်ဂ့ၢ်တၢ်ကျိၤမ့ၢ်ဂ့ၤ တသ့နီတဂၤဘၣ်.
၁၆ စီၤအၤဘြၤဟၣ် ဒီးအချံအသၣ်န့ၣ် ဒိးန့ၢ်ဘၣ် တၢ်စံးပာ်တဖၣ်လီၤ.+ ဒီးတၢ်ကွဲးအသး တတဲဝဲလၢ “နချံနသၣ်တဖၣ်” လၢအအဲၣ်ဒိးတဲဝဲလၢ အအိၣ်ဝဲအါဂၤန့ၣ်ဘၣ်. လၢတၢ်န့ၣ်အလီၢ် တၢ်ကွဲးအသးတဲဝဲ “နချံနသၣ်” လၢအအဲၣ်ဒိး တဲဝဲလၢ အအိၣ်ဝဲထဲတဂၤ လၢအမ့ၢ်ခရံာ်လီၤ.+
၁၇ တကးဒံးဘၣ် ယကတဲဒ်အံၤ, ကစၢ်ယွၤမၤဆိ တၢ်အၢၣ်လီၤအီလီၤလီၤ. စီၤမိၤၡ့ အတၢ်သိၣ်တၢ်သီ လၢအဟဲအိၣ်ထီၣ်လၢခံ အနံၣ် ၄၃၀ န့ၣ်+ မၤဟးဂီၤကစၢ်ယွၤ အတၢ်အၢၣ်လီၤအီလီၤ ဒီးအတၢ်စံးပာ်တန့ၢ်ဘၣ်.
၁၈ တၢ်န့ၢ်သါ မ့ၢ်ဒိးသန့ၤထီၣ်အသးလၢ တၢ်သိၣ်တၢ်သီန့ၣ် အတဒိးသန့ၤထီၣ်အသးလၢ တၢ်စံးပာ်အဖီခိၣ်လၢၤဘၣ်. ဘၣ်ဆၣ် လၢတၢ်သူၣ်ဂ့ၤသးဝါအပူၤ ကစၢ်ယွၤ ဟ့ၣ်လီၤ စီၤအၤဘြၤဟၣ်လၢ တၢ်န့ၢ်သါအံၤ ခီဖျိ တၢ်စံးပာ်လီၤ.+
၁၉ လၢခံန့ၣ် ဘၣ်မနုၤအဃိ ကစၢ်ယွၤ ဟ့ၣ်လီၤဝဲ စီၤမိၤၡ့ အတၢ်သိၣ်တၢ်သီလဲၣ်. ကစၢ်ယွၤဟ့ၣ်လီၤဝဲ စီၤမိၤၡ့ အတၢ်သိၣ်တၢ်သီ ဒ်သိးကပာ်ဖျါထီၣ် ပှၤအတၢ်ကမၣ်တဖၣ်+ တုၤလီၤလၢ စီၤအၤဘြၤဟၣ် အချံအသၣ် လၢအဒိးန့ၢ်ဘၣ် တၢ်စံးပာ်န့ၣ် ဟဲတုၤဝဲတစုလီၤ.+ စီၤမိၤၡ့ အတၢ်သိၣ်တၢ်သီအံၤ ဘၣ်တၢ်ဟ့ၣ်လီၤအီၤ ခီဖျိလၢ မူခိၣ်ကလူးတဖၣ်+ ဆူပှၤလၢအမၤစၢၤတၢ်လၢ ပှၤခံခီအဘၢၣ်စၢၤန့ၣ် အစုပူၤလီၤ.+
၂၀ ဘၣ်ဆၣ် ဖဲတၢ်အၢၣ်လီၤအီလီၤ ဘၣ်တၢ်ဒုးအိၣ်ထီၣ်အီၤလၢ ပှၤထဲတဂၤအခါ တလိၣ်ဘၣ် ပှၤလၢအမၤစၢၤတၢ်လၢ ပှၤခံခီအဘၢၣ်စၢၤဘၣ်. ဒီးဖဲကစၢ်ယွၤ အၢၣ်လီၤတၢ်အခါ အဝဲအၢၣ်လီၤဝဲ တခီတၢၤလီၤ.
၂၁ မ့မ့ၢ်ဒ်န့ၣ်န့ၣ် စီၤမိၤၡ့ အတၢ်သိၣ်တၢ်သီ ထီဒါလိာ်အသးဒီး ကစၢ်ယွၤ အတၢ်စံးပာ်တဖၣ်ဧါ. လ့ၤတက့ၤ တမ့ၢ်ဒ်န့ၣ်ဘၣ်. ပှၤမ့ၢ်ဒိးန့ၢ်ဘၣ် တၢ်သိၣ်တၢ်သီတခါလၢ အဟ့ၣ်အဝဲသ့ၣ်တၢ်မူသ့န့ၣ် တၢ်ကပာ်တီပာ်လိၤအဝဲသ့ၣ် ခီဖျိလၢ တၢ်သိၣ်တၢ်သီ အနီၢ်ကီၢ်လီၤ.
၂၂ ဘၣ်ဆၣ် တၢ်ကွဲးအသး ပာ်ဖျါထီၣ်ဝဲလၢ ပှၤခဲလၢာ် ဘၣ်တၢ်ဟ့ၣ်လီၤကွံာ်အီၤလၢ တၢ်ဒဲးဘး အတၢ်ပၢအဖီလာ်လီၤ. လၢတၢ်န့ၣ်အဃိ ပှၤလၢအစူၢ်က့ၤနာ်က့ၤ ယ့ၣ်ၡူးခရံာ်န့ၣ် ဒိးန့ၢ်ဘၣ် ကစၢ်ယွၤ အတၢ်စံးပာ် သ့လီၤ.
၂၃ ဘၣ်ဆၣ် တချုးတၢ်နာ်ခရံာ် ဟဲတုၤဒံးဘၣ်န့ၣ် စီၤမိၤၡ့ အတၢ်သိၣ်တၢ်သီ ပၢၤပှၤ ဒီးပအိၣ်လၢအတၢ်ပၢအဖီလာ်လီၤ. ဒီးပခိးကွၢ်လၢ်တၢ်နာ်ခရံာ် လၢအကဘၣ် တၢ်ပာ်ဖျါထီၣ်အီၤလီၤ.+
၂၄ လၢတၢ်န့ၣ်အဃိ စီၤမိၤၡ့ အတၢ်သိၣ်တၢ်သီ ကဲထီၣ် ပှၤပၢၤတၢ်ဖိတဂၤလၢပဂီၢ် လၢအဆှၢပှၤဆူခရံာ်+ ဒ်သိး တၢ်ကပာ်တီပာ်လိၤပှၤ ခီဖျိလၢ တၢ်နာ်လီၤ.+
၂၅ ဘၣ်ဆၣ်ခဲအံၤန့ၣ် မ့ၢ်လၢတၢ်နာ်ခရံာ်ဟဲတုၤလံအဃိ+ ပတအိၣ်လၢ ပှၤပၢၤတၢ်ဖိတဂၤ အဖီလာ်လၢၤဘၣ်.+
၂၆ နီၢ်ကီၢ်န့ၣ် သုဝဲခဲလၢာ် သုမ့ၢ်ကစၢ်ယွၤအဖိတဖၣ်+ ခီဖျိလၢ သုနာ်ယ့ၣ်ၡူးခရံာ် အဃိလီၤ.+
၂၇ ဒီးသုဝဲခဲလၢာ်လၢ အဒိးဘျၢအသးလၢ ခရံာ်အပူၤန့ၣ် သုကွၢ်လိမၤဒိးခရံာ်လီၤ.*+
၂၈ မ့ၢ်လၢ သုဝဲခဲလၢာ် မ့ၢ်တၢ်တမံၤဃီ လၢယ့ၣ်ၡူးခရံာ်ပူၤအဃိ ပှၤယူဒၤဖိမ့ၢ်ဂ့ၤ, ပှၤကြံးဖိမ့ၢ်ဂ့ၤ,+ ကုၢ်မ့ၢ်ဂ့ၤ, ပှၤလၢအအိၣ်ဒီး တၢ်သဘျ့မ့ၢ်ဂ့ၤ,+ ပိာ်မုၣ်မ့ၢ်ဂ့ၤ,+ ပိာ်ခွါမ့ၢ်ဂ့ၤ တမ့ၢ်တၢ်လၢအရ့ဒိၣ်ဘၣ်.+
၂၉ တကးဒံးဘၣ် သုမ့မ့ၢ်ခရံာ်အတၢ်န့ၣ် သုမ့ၢ် စီၤအၤဘြၤဟၣ် အချံအသၣ်နီၢ်ကီၢ်+ ဒီးသုမ့ၢ် ပှၤန့ၢ်သါဘၣ်တၢ်တဖၣ်+ ဒ်တၢ်စံးပာ်အိၣ်ဝဲ အသိးလီၤ.+
