ចម្រៀងសរសើរព្រះ ១០៣:១-២២
ទំនុករបស់ដាវីឌ។
១០៣ ខ្ញុំសូមសរសើរព្រះយេហូវ៉ាខ្ញុំសូមលើកតម្កើងនាមដ៏បរិសុទ្ធរបស់លោកយ៉ាងអស់ពីដួងចិត្ត។
២ ខ្ញុំសូមសរសើរព្រះយេហូវ៉ា។
ខ្ញុំមិនចង់ភ្លេចអ្វីៗដែលលោកបានធ្វើសម្រាប់ខ្ញុំឡើយ។+
៣ លោកអភ័យទោសរាល់កំហុសឆ្គងរបស់អ្នក+ហើយលោកធ្វើឲ្យអ្នកជាសះស្បើយពីការឈឺចាប់សព្វបែបយ៉ាង។+
៤ លោកសង្គ្រោះជីវិតអ្នកឲ្យរួចពីស្លាប់*+ហើយលោកបង្ហាញសេចក្ដីមេត្តាករុណា និងសេចក្ដីស្រឡាញ់ដ៏ស្មោះត្រង់ចំពោះអ្នក។+
៥ លោកផ្ដល់អ្វីល្អៗយ៉ាងបរិបូរដល់អ្នក+អស់មួយជីវិតដើម្បីឲ្យអ្នកនៅតែមានកម្លាំងដូចយុវវ័យ ហើយរឹងមាំស្វាហាប់ដូចជាឥន្ទ្រី។+
៦ ព្រះយេហូវ៉ាប្រព្រឹត្តដោយសុចរិត+និងដោយយុត្តិធម៌ចំពោះអស់អ្នកដែលត្រូវគេសង្កត់សង្កិន។+
៧ លោកធ្វើឲ្យម៉ូសេស្គាល់ផ្លូវរបស់លោក+ហើយធ្វើឲ្យកូនចៅអ៊ីស្រាអែលស្គាល់ការប្រព្រឹត្តរបស់លោក។+
៨ ព្រះយេហូវ៉ាជាព្រះនៃសេចក្ដីមេត្តាករុណានិងសេចក្តីអាណិតអាសូរ*+លោកមិនរហ័សខឹង ហើយមានសេចក្ដីស្រឡាញ់ដ៏ស្មោះត្រង់ជាបរិបូរ។+
៩ លោកនឹងមិនចងចាំកំហុសរបស់យើងរហូតទេ+ហើយលោកក៏នឹងមិនខឹងរហូតដែរ។+
១០ លោកមិនបានដាក់ទោសយើងឲ្យសមនឹងអំពើខុសឆ្គងរបស់យើងទេ+ហើយលោកក៏មិនតបស្នងយើងតាមកំហុសរបស់យើងដែរ។+
១១ ព្រោះដូចកម្ពស់ពីផែនដីទៅស្ថានសួគ៌ មិនអាចវាស់ស្ទង់បាននោះសេចក្ដីស្រឡាញ់ដ៏ធំធេង*ដែលលោកមានចំពោះអស់អ្នកដែលកោតខ្លាចលោក ក៏មិនអាចវាស់ស្ទង់បានដែរ។+
១២ ដូចទិសខាងលិចឆ្ងាយពីទិសខាងកើតយ៉ាងណានោះលោកក៏ដកអំពើរំលងរបស់យើងឲ្យចេញឆ្ងាយយ៉ាងនោះដែរ។+
១៣ ដូចឪពុកបង្ហាញចិត្តអាណិតមេត្តាដល់កូននោះព្រះយេហូវ៉ាក៏បានបង្ហាញសេចក្ដីមេត្តាករុណាចំពោះអស់អ្នកដែលកោតខ្លាចលោកដែរ។+
១៤ ពីព្រោះលោកដឹងច្បាស់អំពីរបៀបដែលយើងបានត្រូវបង្កើត+ហើយក៏ចាំថាយើងជាធូលីដី។+
១៥ ជីវិតមនុស្សប្រៀបដូចជាស្មៅ។+មនុស្សប្រៀបដូចជាផ្កាដែលនៅឯវាល។+
១៦ ប៉ុន្តែ ពេលខ្យល់បក់មកក៏ផាត់ទៅបាត់ហាក់ដូចជាមិនធ្លាប់មានពីមុន។
១៧ ផ្ទុយទៅវិញ ព្រះយេហូវ៉ាមានសេចក្ដីស្រឡាញ់ដ៏ស្មោះត្រង់ជានិច្ចចំពោះអស់អ្នកដែលកោតខ្លាចលោក+ហើយលោកបង្ហាញសេចក្ដីសុចរិតដល់កូនចៅរបស់ពួកគេរហូតតទៅ+
១៨ រួមទាំងអស់អ្នកដែលធ្វើតាមកិច្ចព្រមព្រៀងរបស់លោក+និងអស់អ្នកដែលធ្វើតាមបង្គាប់របស់លោកយ៉ាងដិតដល់។
១៩ នៅស្ថានសួគ៌ ព្រះយេហូវ៉ាបានតាំងបល្ល័ង្ករបស់លោកឲ្យនៅខ្ជាប់ខ្ជួន+ហើយលោកគ្រប់គ្រងជាស្ដេចលើអ្វីៗទាំងអស់។+
២០ ចូរសរសើរព្រះយេហូវ៉ា ឱទេវតា+ដ៏ខ្លាំងក្លាទាំងឡាយអើយគឺបណ្ដាទេវតាដែលស្ដាប់បង្គាប់និងធ្វើតាមប្រសាសន៍របស់លោក។+
២១ ចូរលើកតម្កើងព្រះយេហូវ៉ា ឱបណ្ដាកងទ័ពស្ថានសួគ៌ទាំងអស់អើយ+ជាពួកអ្នកបម្រើដែលធ្វើតាមបំណងប្រាថ្នារបស់លោក។+
២២ ឱអ្វីៗទាំងអស់ដែលព្រះយេហូវ៉ាបានបង្កើតអើយ ចូរសរសើរតម្កើងលោកនៅគ្រប់កន្លែងដែលលោកគ្រប់គ្រង។
ខ្ញុំសូមលើកតម្កើងព្រះយេហូវ៉ាអស់ពីដួងចិត្ត។
