1-3. Petrus wa muna tjike meyuva ndo nu ongurova ndjo ya ri vi?

PETRUS aa kondjo ouzeu okuvatere okuhinga okayaha komomeva ouṱuku. Nu aa ku munika aayo maku yende ama ku yere. Mena rozoiri ozonde nḓu va hinga okayaha nga etambo noviṱuve vye aavi hihamwa. Ombepo ndjaai vingi ozondjise ze ya ririra ko onḓeu nu aai zunganisa okuvare kwaGalilea. Ozongazona zokuvare aaze rivete mokayaha, ngandu omeva omatarazu ngo tji ye mu ningenisa. Posi yokutja eye wa kayenda komurungu okuhinga okayaha nga.

² Petrus novakwao va isa Jesus pomukuro erike. Meyuva ndo owo va muna Jesus ama risa ovandu omayovi nozomboroto nouhundju ouṱiṱi uriri. Ovandu aave vanga okutwirisa Jesus otjombara mena rotjiṋa hi, posi yokutja Jesus kaa vanga okukara norupa mohoromende yoruveze ndwo. Eye wina aa vanga okuhonga ovahongewa ve kutja ave ha kara norupa mozopolitika. Jesus wa kondjisa okuhena kovimbumba vyovandu, na rakiza ovahongewa ve kutja ve ronde mokayaha nu ve yende munda mbwi nomuronga eye ngunda ai kondundu okukakumba.​—Mar. 6:35-45; lesa Johanes 6:14-17.

³ Indu ovahongewa tji va ya kokuvare okukahinga okayaha tjandje ku nomueze, nu nai wa ri pokukahita, ihi otjiraisiro tjokutja owo va ri mokuvare ongurova aihe. Posi yokutja, owo va yenena okuhinga ozokilometa ozonḓiṱi uriri. Petrus novakwao ngahino kaave yenene okuhungira kumwe mena rorurokoho rwombepo nongondjero yokuhinga okayaha nga. Mena ranao, Petrus ngahino wa ri noruveze okuripurira kovitjitwa vyeyuva ndo.

4. Omena ratjike Petrus tje ri otjihorera tjapeke ku eṱe okukongorera?

⁴ Tjiri pa ri noviṋa ovingi okuripurira ko! Tjimwe tjavyo tja ri  omahakaeneno we kuna Jesus waNasaret ozombura mbari nḓa kapita. Eye we rihonga ovingi okuza ku ye, posi yokutja pa ri ovingi mbyaa sokurihonga wina. Petrus wa ri e rimanene okurihonga kutja a ha tira poo okukara nomakeyakeyero mu Jehova na Jesus, kunao Petrus otje ri otjihorera tjapeke ku eṱe ndino. Indjeye tu tare kutja omomiano viṋe?

5, 6. Petrus wa ri nehupo nda ri vi?

⁵ Petrus kamaa zembi eyuva nda hakaena kuna Jesus otjikando otjitenga. Omuangu we Andreas ongwa etera Petrus ombuze ombwa ndji: “Eṱe twa munu ingwi Messias.” Omambo ngo ya rundurura ehupo raPetrus. Nu kamaari kakara otja tji ra ri rukuru.​—Joh. 1:41.

⁶ Petrus wa turire moKapernaum, otjihuro tji tja ri komanene womukuro wOkuvare kwaGalilea. Eye nomuangu we Andreas novanatje va Sebedeus, Jakobus na Johanes aave ungura pamwe, okukambura omahundju. Petrus aa kara puna omukazendu we na ina yomukazendu we nomuangu we Andreas. Okuhupisa eṱunḓu re noviungura vyokukambura omahundju, aa ku hepa oviungura ovingi tjinene, nomasa nozondunge. Matu yenene okuripura nomauṱuku omengi ovarumendu mba ngaave ungura, okuyumba ozombate zawo momeva pokati kouyaha uvari nokunanena omahundju ngu va kambura, mouyaha. Wina matu yenene okuripura noviungura ovingi ovarumendu mba mbi va ri navyo, okukondjisa okuhaṋa omahundju nga kutja ve randise, nokukohorora ozombate zawo.

7. Petrus wa zuva tjike ohunga na Jesus nu ongwaye indji tji ya ri ombuze ombwa?

⁷ Ombeibela i tu raera kutja Andreas wa ri omuhongewa waJohanes Omupapitise. Okutja Petrus aa puratene nombango aihe omuangu we tjee mu raere ohunga nomahongero waJohanes. Eyuva rimwe, Andreas wa muna Johanes ama urike Jesus waNasaret na tja: “Ondjona yaNdjambi oyo ndjo!” Andreas wa rira omuhongewa waJesus tjimanga nu a karaera erumbi re ombuze ombwa yokutja: Messias weya! (Joh. 1:35-40) Kombunda yomapirukiro nga ri motjikunino tjaEden ozombura ape 4 000 komurungu wanao, Jehova wa kwizika kutja ma hindi omundu wapeke ngu me yekuyandja omaundjiro watjiri kovandu. (Gen. 3:15) Andreas wa hakaena kuna Messias omuini, ngu ri Omuyame! Petrus wa hakahana okukahakaena kuna Jesus wina.

8. Ena Jesus nda yandja ku Petrus aari hee tjike, nu ongwaye ovandu tjiva tji ve muna kutja ena ndo ka ri ye mu pwira?

⁸ Orure aruhe Petrus aa tjiukwa otja Simon. Nungwari Jesus wa tara mu ye na tja: “Ena roye oove Simon, omuzandu waJohanes, nungwari mo isanewa Kefas, okutja Petrus, oruuwa.” (Joh. 1:42) Oukahu kutja omambo waJesus nga ya ri omaprofetero. Jesus aa munu kutja Petrus ma kakara tjimuna oruuwa, omundu ovakongorere vaJesus ku  mave yenene okuṱaṱera. Petrus ee rimunu otjoruuwa wina poo indee? Petrus ngahino kaa munu kutja ongamburiro ye i nomasa tjinene nao tjimuna oruuwa. Nandarire ovandu ovengi mbe lesa Ombeibela ndino ve himwa kutja ovikeṋa mbyaavi tjiti kutja Petrus ma sasanekwe noruuwa. Ovengi ve tja omuano mbwe hungirwa mOmbeibela u raisa kutja eye kari nongurameno.

9. Jehova nOmuna we ve paha tjike mu eṱe nu ongwaye tji matu sokukambura momamwino wawo?

⁹ Petrus wa ri nozondataiziro nu Jesus ee ze tjiwa nawa. Posi yokutja otja Ihe Jehova, Jesus aruhe aa kondjo okumuna ovikaṋena oviwa movandu. Jesus aa tjiwa kutja Petrus u novikaṋena ovingi oviwa, nu aa vanga okumuvatera kutja ma raise ovikaṋena mbi momuano omuwa. Jehova nOmuna we ve paha ovikaṋena oviwa mu eṱe ndino wina. Mape ya atu munu kutja kamaave munu ovikaṋena oviwa mu eṱe. Posi yokutja tu sokukambura momamwino wawo nu atu riyandjere kutja ve tu honge nokutuṱuna, tjimuna Petrus tja vaterwa.​—Lesa 1 Johanes 3:19, 20.

10. Petrus mape ya wa muna tjike indu tja ri puna Jesus, posi yokutja wa tjita vi?

¹⁰ Petrus ngahino wa ya puna Jesus mouyenda we wokuzuvarisa otjikando otjitjakwao. Okutja mape ya wa muna Jesus tja tjita otjihimise tje otjitenga, indu tja tanaurira omeva momavinu pomukandi mbwa ri moKana. Kombanda yanao, eye wa zuva ehungi raJesus ohunga nOuhona waMukuru. Posi yokutja, nandarire ngunda a za nokumuna oviṋa avihe oviwa mbi, Petrus ka kayendere komurungu okukongorera Jesus. Omieze kombunda yanao, Petrus wa hakaena kuna Jesus rukwao, nu otjikando hi Jesus we mu ningira kutja ma zuvarise puna ye oruveze aruhe.

11, 12. (a) Oviungura vyaPetrus ongurova ndjo vya kayenda vi? (b) Ngunda ama puratene ku Jesus, Petrus ngahino ee ripura na tjike?

¹¹ Petrus wa ri nongurova ombi motjiungura tje tjokukambura omahundju. Povikando ovingi, ovakambure vomahundju va yumba ozombate zawo mokuvare, posi yokutja kaave yenene okukambura otjiṋa oparukaze. Petrus ngahino wa ungurisa ondjiviro ye aihe okukondja okukambura omahundju, ngahino ama kondjisa potuveze pekepeke mokuvare okutara kutja omahundju ye ri pi. Otjovakambure varwe vomahundju, Petrus aa zeri kutja andakuzu ma yenene okuhita mokuvare omuini okukapaha omahundju nokutjita kutja ye hite mombate. Otjiperi kutja omeripura otja ingo mape ya ye mu kurungisira ko. Petrus kaa ungura oviungura mbi mena rokuvanga okukutura ouruvi uriri, orondu pa ri ovandu mbaave undju ku ye. Korusenina, Petrus weya komukuro nokuhinotjiṋa tja munu. Ozombate aaze sokukohwa, nu Jesus tje ya mbo wa vaza Petrus ama koho ozombate ze zomahundju.

 ¹² Otjimbumba tjovandu tja koverere Jesus nu aatji puratene nombango aihe koviṋa mbyaa hungire. Mena rokutja pa ri ovandu ovengi, Jesus wa ronda mokayaha kaPetrus ne mu ningire kutja ma hinge okayaha ke humburuke komukuro kaṱiṱi. Nu okuzambo neraka ndaa ri zuvaka nawa, Jesus wa uta okuhonga ovandu. Petrus wa puratena nombango aihe, tjimuna ovandu avehe mba ri pehi pomukuro. Nu kena pa urwa okuzuva ehungi raJesus ohunga nOuhona waMukuru. Petrus tjaa zuu Jesus tji ma hongo ngahino ee ripura kutja tjiri ma rire ondjozikiro onene okuvatera Kristus okuzuvarisa mehi arihe! Posi yokutja hapo indjo atja rira ondunge ombwa nao? Eye atja yenene vi okuṱakamisa eṱunḓu re? Petrus ngahino ee ripura noviungura ovizeu vyokukambura omahundju noruveze ndwaa vi kambura. Nu ngahino aa munu kutja ma rire ouzeu okuzuvarisa puna Jesus nokuungura oviungura ovizeu vyokukambura omahundju.​—Luk. 5:1-3.

13, 14. Jesus wa tjitira Petrus otjihimise tjiṋe, nu Petrus wa tjita vi?

¹³ Jesus tja mana okuhungira wa raera Petrus kutja: “Hingira okayaha kokure momeva nu mu yumbe ozombate zeṋu okupata ozohi.” Petrus aa keyakeya okutjita nao na tja: “Eṱe twa kondjo ouṱuku auhe omungandjo uriri, Muhona. Nungwari mena rembo roye ami me yumbu inḓa ozombate.” Petrus wa za nokukoha ozombate nḓo. Okutja tjiri okuzeyarura momeva rukwao katja ri otjiṋa tjaa vanga okutjita oiri ndjo, nu tjinenenene nai tji mu ha ri omahundju mokuvare! Nungwari eye wa tjita otja Jesus pe mu raera, na raere ovakwao mokayaha ingo karwe okutjita nao wina.​—Luk. 5:4, 5.

¹⁴ Petrus wa muna kutja ozombate za rire ozonḓeu okuyerurura. Tja za nokukondja nomasa okuzenana, eye wa muna omahundju omengi nga ri mombate ye! Tjimanga, eye wa raera ovarumendu mba ri mokayaha ingo karwe kutja ve yekumuvatera. Okayaha kemwe uriri kaake yenene okutjinda omahundju aehe ngo. Okutja owo ve urisa ouyaha auyevari, posi yokutja ngunda pa ri omahundju omengi ngandu ouyaha tji wa hara okuṱomwina. Otjiṋa hi tja himisire Petrus tjinene. Eye wa rora okumuna omasa waKristus rukuru moviṋa vyarwe, posi yokutja omasa waKristus motjikando hi ya hungama Petrus omuini neṱunḓu re. Eye we rimunina omuini Jesus tja yenena okutjita kutja omahundju ye hite mozombate oyeni. Petrus wa uruma tjinene. Eye wa wa pehi kozongoro na tja: “Za po pu ami, Muhona, orondu owami omundu omunauvi!” Eye atja kara vi pu nomundu ngwa ri nouvara wokuungurisa omasa waMukuru momiano mbyo?​—Lesa Lukas 5:6-9.

15. Jesus wa honga vi Petrus kutja ka sokukeyakeya nokukara nondira?

¹⁵ Jesus wa hungira kuna Petrus neraka etarazu na tja: “O tira,  okuzamba mo rire omupate wovandu.” (Luk. 5:10, 11) Indwi ka ri oruveze rwomakeyakeyero poo ondira. Omakeyakeyero we kaya ri nomize, nu aa hepa okuyandja ombango kounanḓengu wokuzuvarisa moruveze rwokuripura kehupo reṱunḓu re nokutja hapo wa pwira otjiungura tjokuzuvarisa nao. Jesus wa ri noviungura ovingi mbyaa sokumana, oviungura vyomazuvarisiro ngu maye rundurura oruyaveze rwovandu. Eye aa karere Mukuru ngwa “tumba ondjesiro.” (Jes. 55:7) Jehova ma parura Petrus neṱunḓu re momiano avihe.​—Mat. 6:33.

16. Petrus, Johanes na Jakobus va tjita vi indu Jesus tje ve ningira okumukongorera, nu ongwaye imbo tji wa ri omukambo omusemba?

¹⁶ Tjimanga, Petrus wa raisa onḓuviro tjimuna Jakobus na Johanes. “Owo va nanena inḓa ozombate komukuro, ave isa oviṋa avihe nave kongorere Jesus.” (Luk. 5:11) Momuano mbwi Petrus wa raisa kutja u nongamburiro mu Jesus na Ingwi ngwe mu hinda. Eye wa toora  omukambo omusemba tjiri. Ovakriste ndino mbe rwisa omakeyakeyero nondira ndji ve na yo mokukarera Mukuru, ve raisa ongamburiro wina. Jehova aruhe u ṱakamisa imba mbe nongamburiro otja indjo mu ye.​—Eps. 22:4, 5.

17. Petrus wa ri nomeripura yeṋe ohunga nozombura mbari nḓa kara puna Jesus?

¹⁷ Ozombura ape mbari kombunda yokuhakaena na Jesus, Petrus wa hinga okayaha nga mongurova yotjivepo otjinamasa mOkuvare kwaGalilea, otja tji pa tamunwa pomautiro wekondwa ndi. Katu nokutjiwa kutja Petrus ee ripura ohunga natjike oruveze ndwo. Pa ri noviṋa ovingi okuripurira ko! Jesus wa verura ina yomukazendu waPetrus. Wa za nokuyandja ehungi ewa mOmazuvarisiro wOkondundu. Povikando ovingi, okupitira momahongero na moviungura vye oviwa, eye wa raisa kutja ongwa ri Messias Omutoororwa. Otja omieze tjaavi kayenda, Petrus ka ri nongeyangeyero nondira tjinene tjimuna tja ri rukuru. Jesus wa toorora Petrus kutja ma rire umwe wovahongewa ve 12. Posi yokutja Petrus ma kamuna kutja eye ngunda wa ri nongeyangeyero nondira.

18, 19. (a) Serekarera kutja Petrus wa muna tjike indu tja ri mOkuvare kwaGalilea. (b) Indu Petrus tja ningira Jesus kutja me ye ku ye, Jesus we mu zira vi?

¹⁸ Menyunguhuka Petrus wa isa okuhinga okayaha na haama osemba. Eye otja muna otjiṋa tji tja nyinganyinga. Nu hapo ya ri ozongazona? Kako, ihi tja ri otjiṋa tjaatji munika tjimuna omundu. Ya ri omurumendu ngu ma kayenda kombanda yomeva! Otja omundu ngwi tjaa vaza popezu, aape munika tjimuna ma kapita pu wo. Mena remuma, ovahongewa aave nangarasi ngahino otjiruru. Okuzambo omundu ngwi wa hungira a tja: “Yanḓipareye! OwAmi! Amu tira!” Omundu ngwi wa ri Jesus!​—Mat. 14:25-28.

¹⁹ Petrus wa zira na tja: “Muhona, tjinangara tjiri oOve, ndji raera mbi ye kOve ame wondjo kombanda yomeva.” Petrus wa raisa ouvanḓe mokuningira otjiṋa hi. Nonyuṋe tjinene mena rotjihimise tja muna hi, Petrus aa vanga okumuna omasa waJesus kutja me kurise ongamburiro ye omuini. Jesus wa rakiza Petrus me ye ku ye. Petrus wa heruka mo kayaha, na utu okukayenda kombanda yomeva. Ripura uriri kutja Petrus wa ri nondjoroka ndji ṱa pi tjee rimunu kutja ma kayenda kombanda yomeva nokuhinokuṱomwina. Eye ngahino wa himisirwe i otjiṋa hi tjinene otja tjaai ku Jesus. Nungwari tjimanga Petrus wa uta okuivaiva.​—Lesa Mateus 14:29.

20. (a) Petrus wa pandjara vi ombango ye nu pa tjitwa tjike? (b) Otjikeṋa otjiṋandengu Jesus tja honga Petrus?

²⁰ Petrus aa sokuyandja ombango ku Jesus, orondu aa ungurisa omasa waJehova ngaaye mu tjevere kutja a ha ṱomwine. Nu Jesus wa  tjita nao mena rongamburiro Petrus ndja ri na yo mu ye. Posi yokutja Petrus wa isa ko ombango ye ku Jesus. Ombeibela mai tja: “Nungwari tja muna otjivepo otjinamasa, arire tja tira.” Petrus wa uta okutara kozongazona nḓaaze zungana otja tji maze ritono kokayaha, notjivepo otjinamasa na uruma tjinene. Eye ngahino ee ripura kutja ma ṱomwine na ṋiṋiwa i omeva. Otja paa harere ko emuma, ongamburiro ye opaai ngundiparere ko. Omurumendu ngu kwa za oruuwa mena rokutja wa ri ombanḓe, wa uta okuṱomwina tjimuna ewe nda yumbwa momeva uriri. Petrus aa tjiwa okutjaara posi yokutja oiri ndjo kena pe ripura okutjita nao. Eye wa ravaera na tja: “Muhona ndji vatera!” Jesus we mu kambura keke ne mu nana. Okuzambo ngunda ave ri mbo Jesus wa ṋunisa epu enanḓengu ku Petrus indu tja tja: “Ove, munangamburiro okaṱiṱi, wa ivaivire tjike?”​—Mat. 14:30, 31.

21. Omaivaiviro ye tu twa vi moumba?

²¹ Omambo waJesus ku Petrus nga, ‘wa ivaiva,’ tjiri ya ri omambo omanamasa tjinene! Povikando tjiva okuivaiva mape ya aku tu taara. Tji twa yandjere otjiṋa hi, matu pandjara ongamburiro yetu noupanga wetu kuna Jehova. Matu hepa okurwa nomasa kutja atu ha taarwa i omaivaiviro! Otjiṋa hi matu tji yenenisa vi? Omokuyandja ombango koviṋa ovisemba. Tji twa yandja ombango koviṋa mbi tu tirisa, poo mbi tu ngundiparisa, poo mbi tu isa ko ombango ku Jehova nOmuna we, omaivaiviro otji maye tu taara. Nu tji twa yandja ombango ku Jehova nOmuna we, noviṋa mbi va tjita, na mbi mave katjita moruyaveze, na mbi ve tu tjitira nai, matu yenene okutaara omaivaiviro ngamwa ngu mape ya atu kara na wo.

22. Ongwaye otjihorera tjaPetrus tji tji ri otjiwa okukongorera?

²² Indu Petrus tja kongorera Jesus okukaronda mokayaha, eye wa muna kutja otjivepo tja wa pehi. Omuronga wa porimana. Petrus novakwao va tja: “Tjiri, oOve Omuna waNdjambi!” (Mat. 14:33) Otja tjaape yende amape tji, Petrus ngahino wa ri nondangi tjinene. Eye we rihonga kutja a ha yandjere ondira nomaivaiviro ye mu tjaere okukambura mu Jehova na Jesus. Nungwari, eye wa ri noviṋa ovingi mbyaa sokuungurira ko ngunda e hiya rira Omukriste ngu ma sasanekwa noruuwa, tjimuna Jesus pa kwizika. Petrus we rimanene kutja ma kondjo okuungurira koviṋa mbi. Ove wina we rimanene okuungurira koungundipare woye? Tji pe ri nao, okutja otjihorera tjaPetrus otjiwa okukongorera.