1. Kahurura kutja ongwaye Marta tja ri noruhoze orunene tjinene?

MARTA kaa yenene okuzemba eyendo romuṱena, nda ri ondimba ndja paterwe newe. Eye wa ri noruhoze orunene tjinene, orondu kaa kambura kutja omuṱena Lasarus tjiri wa ṱu. Omayuva yane okuza konḓiro ye ya ri omazeu, orondu ya ri omayuva woruhoze, nu pa ri ovandu ovengi mbe ya okuvehuhumiṋa.

2, 3. (a) Okumuna Jesus kwa ṱuna vi ku Marta? (b) Omambo omanḓengu Marta nga hungira ye raisa tjike ohunga na ye?

² Mokamanga, momurungu waMarta pa kuramene omurumendu ngwa ri epanga raLasarus roposengo. Marta ngahino wa hihamenwa ko tjinene tja muna Jesus, orondu eye ongwa tja yenena okuyama omuṱena konḓiro. Posi yokutja, Marta wa yandjera kutja Jesus me mu huhumiṋe indu tji va ri pendje yokahuro kaBetanie. Mokaruveze okasupi ku va ri pamwe nga, Marta wa yanḓiparisiwa i orusuvero notjari tjaJesus. Jesus we mu pura omapuriro nge mu vatera kutja ma yandje ombango kongamburiro ye na kombendukiro. Ehungi ndi ra tjita kutja Marta ma hungire omambo omananḓengu tjinene momuinyo we, indu tja tja: “Ii, Muhona, ami mba kambura kutja oOve Kristus, Omuna waNdjambi, ngu kwa za moo ya mouye.”​—Joh. 11:27.

³ Otja tji matu munu momambo we ngo, Marta wa ri omukazendu wongamburiro onene. Oviṋa oviṱiṱi Ombeibela mbi i tu raera ohunga na ye vi tu vatera kutja tu kurise ongamburiro yetu. Okutara kutja ehungi ndi ma ri tu vatere vi, rutenga ngatu tare kehungi etenga ohunga na Marta mOmbeibela.

4. Oowaṋi mba ri meṱunḓu raMarta, nu owo avehe va ri noupanga mbu ri vi kuna Jesus?

⁴ Omieze omingi komurungu wanao indu Lasarus tja ri omuveruke nawa, owo aave sokuyekuryangerwa i omundu omunanḓengu tjinene, Jesus Kristus. Lasarus, Marta na Maria va ri ovandu  ovanene, posi yokutja aave kara ponganda imwe. Katu nakutjiwa kutja pe na umwe pokati kawo ngwa kupire poo ngwa kupirwe. Kutja pa ri nao poo indee, ovandu aveyetatu mba va ri omapanga waJesus. Indu tja ri motjiungura tjokuzuvarisa moJudea, eye paa pirukirwa tjinene, Jesus aa kara puna Lasarus novaṱena. Eye ngahino wa ri nonyuṋe nomaunguriro wa kumwe omawa nga ri pokati kaLasarus novaṱena.

5, 6. (a) Ongwaye Marta tja ri noviungura ovingi indu Jesus tje yekuveryangera? (b) Maria wa tjita vi indu Jesus tje ya poyawo?

⁵ Marta wa suverere okuyakura ovayenda moyawo. Eye wa ri omukazendu woviungura ovingi momake, nu mena rokutja Jesus mee ku ve ryangera Marta wa ri noviungura ovingi. Eye wa ṱunina omuyenda we ngwi novakwao varwe eriro rapeke nda ri novikurya vyomihoro pekepeke. Momayuva omakuru, okusekirisa ovayenda tja ri otjiṋa otjinanḓengu tjinene. Indu omuyenda tje ya, eye aa yakurwa noruhupito, a hukurwa ozongaku kutja ma kohwe ozombaze okuzambo a huwa omaze womiṋinga motjiuru. (Lesa Lukas 7:44-47.) Wina aa ku undjirwa komusekirise okuyandja oruveze oruwa komuyenda okurara po nokumupa ovikurya oviwa.

⁶ Marta na Maria aave ungura oukukutu okurirongerera omeero waJesus koyawo. Nandarire kutja ovengi ve muna kutja Maria tjinene wa ri nombango mokurihonga uriri, eye wina aa vatere noviungura ponganda. Posi yokutja Jesus tje ya, oviṋa vya runduruka. Jesus wa ungurisa oruveze ndwi okuhonga ovandu mba ri mbo! Eye kari tjimuna ovahonge vozongamburiro voruveze ndwo mbe ha ri nondengero kovakazendu, nungwari aa hongo ovakazendu ohunga nOuhona waMukuru owo ku kwa zikamenene omahongero we aehe. Maria wa ungurisa oruveze ndwi nawa, nu wa kahaama pozombaze zaJesus okupuratena omambo aehe ngu ma hungire.

7, 8. Ongwaye Marta tja ri nongurunguse tjinene, nu we i raisa vi?

⁷ Ripura uriri nongendo Marta ndja ri na yo. Mena rovikurya ovingi mbyaa sokuzika noviṋa vyarwe oviwa mbyaa sokuungura kutja ma yakure ovayenda ve nawa, eye wa uta okurikenda tjinene, nu wa kurungire momuinyo. Otja tjaa ryanga mondjuwo okuungura oviṋa avihe mbi, wa muna omuangu we a haama ne hi nokutjita otjiṋa okumuvatera. Marta u na pa unauna poo okupindika? Katja rira otjikumise andakuzu wa pindika orondu eye kaa yenene okuungura oviṋa avihe mbyo erike!

⁸ Korusenina, Marta kaa yenene okuritjaera rukwao. Eye wa ya ku Jesus ngunda ama hungire na tja: “Muhona, Ove ko na ko na tja kutja omuangu wandje me ndji tarere ame ungura oviungura avihe mbi are? Mu raera e ndji vatere!” (Luk. 10:40) Ingo tjiri ya ri  omambo omakukutu. Nu okuzambo eye wa ningira Jesus kutja ma raere Maria me mu vatere.

9, 10. (a) Jesus wa zira Marta momuano uṋe? (b) Matu tjiwa vi kutja Jesus kaa vyura Marta mena roviungura vye?

⁹ Eziriro raJesus mape ya ra kumisa Marta tjimuna tji ri kumisa ovengi mbe lesa Ombeibela. Jesus we mu zira neraka etarazu na tja: “Marta, Marta! Ove mo rikende nu mo kurungisiwa i oviṋa ovingi nai, nungwari otjihepwa itjimwe uriri. Maria we ritoororere ihi otjinanḓengu tjinene tje hi na indu maa sokuyekwa.” (Luk. 10:41, 42) Hapo Jesus aa hee tjike? Aa hee kutja Marta wa suvera oviṋa vyouye kombanda yaMukuru? Poo kaa twako onḓengu keriro Marta ndee ve ṱunine?

¹⁰ Kako. Jesus aa tjiwa kutja Marta wa ri nondando ombwa. Nu wina kaa munu kutja okurongerisa eriro enene tja ri otjiṋa otjivi, orondu komurungu wanao eye wa ya “komukandi omunene” mbwa ṱuninwa i Levi. (Luk. 5:29) Eriro Marta ndaa rongerisa kanda ri epu enene Jesus nde mu vyurira, nungwari ya ri kutja Marta ma yandje ombango ku imbi mbi nonḓengu onene. Marta wa yandjere ombango tjinene kokurongerisa eriro ndi nga tja zemba kutja oviṋa ovinanḓengu tjinene ooviṋe. Nu hapo ovikwaye mbya ri ovinanḓengu tjinene?

11, 12. Jesus wa vyura vi Marta neraka etarazu?

¹¹ Omuna omukwatwaerike waJehova Mukuru, wa ri moyaMarta ama hongo ouatjiri. Kapa ri otjiṋa tjarwe otjinanḓengu kombanda yomahongero waJesus. Okutja Jesus wa hihamwa omutima okumuna kutja Marta kaa yenene okupuratena ku ye kutja me rihonge oviṋa mbi mavi kurisa ongamburiro ye, posi yokutja wa isa Marta me ritoorere omuhunga we omuini. * Marta wa ri nousemba okuritoororera kutja ma tjiti vi, posi yokutja ka ri nousemba wokutya kutja Maria u sokutjita vi.

¹² Okutja Jesus wa ronga Marta neraka etarazu ama isana ena re potuvari kutja Marta ma wise omutima pehi. Jesus we mu raera kutja kahepero ‘okurikenda noviṋa ovingi.’ Tji pe novikurya ovingi vyombepo, eriro eṱiṱi uriri atja ri yenena. Jesus aa tjiwa kutja okupuratena ku ye tjari otjiṋa otjinanḓengu tjinene,  nu otja ha yenenene okuisa po Maria pomahongero omananḓengu nga!

13. Matu rihongere tjike komuano Jesus mbwa vyura Marta?

¹³ Matu rihongere ovingi kehungi reṱunḓu ndi. Katu sokuyandjera otjiṋa ngamwa atjihe kutja tji rire otjinanḓengu kombanda yovikurya ‘vyombepo.’ (Mat. 5:3) Nandarire kutja matu vanga okuhorera kongaro yaMarta yokusekirisa ovayenda nokuhinatjirweyo kwe, katu sokuyandjera kutja oviṋa otja imbyo vi tu ‘kendise nokutukurungisa’ tjinene nga tji matu pandjara ombango moviṋa ovinanḓengu tjinene. Katu varurasana mena rovikurya uriri, nungwari tu varurasana kutja tu zeuparisasane mombepo nokuyanḓiparisasana. (Lesa Ovaroma 1:11, 12.) Nandarire kutja katu karere neriro enene, okukara pamwe ku tu vatera kutja tu yanḓiparisasane.

14. Ongwaye tji matu yenene okukara nongamburiro kutja Marta wa raisa otjihorera otjiwa indu tja yakura omavyuriro nga pewa?

¹⁴ Marta wa yakura eronga Jesus nde mu pa ne rihongere ko poo indee? Katu nakuhepa okuhaka otjiṋa ho. Pa kapita omieze kombunda ya indu Jesus tja karyangera Lasarus novaṱena poyawo moBetanie. Oukahu kutja Marta ka karere nongore na Jesus mena romavyuriro worusuvero nge mu pa. Eye wa yakura omavyuriro nga nomutima auhe. Ihi otjihorera otjiwa tjongamburiro ku eṱe okukongorera wina, orondu povikando tjiva atuhe tu hepa omavyuriro?

15, 16. (a) Marta wa tjita vi indu omuṱena tja verere? (b) Ongwaye omaundjiro waMarta na Maria tji ye ha yenenisirwe?

¹⁵ Indu omuṱena tja vera, Marta aa hungu omuṱena nombango aihe. Eye wa ungura oviṋa avihe mbyaa yenene okuvatera Lasarus kutja ma veruke. Posi yokutja ouvere waLasarus aau ririre ko ouvi. Oure woruveze aruhe Lasarus ndwa verere ovaṱena va ri mbo okumuvatera. Marta ngahino aa tara momurungu waLasarus nambano mbwa u raisa kutja wa verere tjinene ame ripura nomayuva omengi ngu va kara pamwe mondjoroka na moruhoze!

¹⁶ Tji va muna kutja kaave yenene okuvatera omuṱena rukwao, Marta na Maria va hinda ombuze ku Jesus. Eye aa zuvarisa popezu nokahuro mu va turire. Nu ombuze yawo ku Jesus ya tja: “Muhona, epanga roye esuverwa ra vera.” (Joh. 11:1, 3) Owo aave tjiwa kutja Jesus wa suverere omuṱena, nu va ri nongamburiro kutja Jesus ma tjiti avihe mbi ma yenene kutja ma vatere epanga re. Owo hapo va ri nomaundjiro wokutja Jesus me ya tjimanga ngunda Lasarus e hiya ṱa? Ndovazu va ri nomaundjiro ngo, owo ngahino va hihamwa tjinene, orondu Lasarus wa ṱa ngunda Jesus e hi ya vaza.

17. Otjikeṋa tji tja kumisire Marta nu eye wa tjita vi tja zuva kutja Jesus wa ri popezu notjihuro tjawo?

¹⁷ Ngunda Marta na Maria ava ri moruhoze, owo aave sokukayendisa ozondyero azehe ohunga nombakero nokuyakura ovayenda ovengi mbe ya kombakero okuza moBetanie nongondoroka. Nungwari, ngunda kapa ri ombuze okuza ku Jesus. Otja omayuva tjaaye kayenda Marta ngahino wa kumisirwe i yotjiṋa hi tjinene. Korusenina, kombunda yomayuva yetatu, Marta wa zuva kutja Jesus wa ri popezu notjihuro tjawo. Nandarire ngunda a ri moruveze rwouzeu ndwi, Marta wa sekama nokuhinakuraera Maria okukatjakanena Jesus.​—Lesa Johanes 11:18-20.

18, 19. Marta wa ri nomaundjiro waye nu ongwaye ihi tji tja ri otjiṋa otjiwa?

¹⁸ Indu tja muna oMuhona we, Marta wa tja: “Muhona, Ove andakuzu wa ri mba omuṱena kwandje katja ṱa!” Posi yokutja  Marta wa ri nongamburiro kutja Jesus ma tjiti otjiṋa. Eye komurungu wa tja: “Nungwari ami me tjiwa kutja nangarire nambano nai Ndjambi me Ku pe ngamwa atjihe tji mo Mu ningire.” Tjimanga Jesus we mu raera otjiṋa tji tja yanḓiparisa ongamburiro ye indu tja tja: “Omuṱena kwoye ma penduka movakoke.”​—Joh. 11:21-23.

¹⁹ Marta aa munu kutja Jesus ma hungire ohunga nombendukiro ndji mai kakara ko moruyaveze, opa zokutja: “Ami me tjiwa kutja eye ma penduka movakoke meyuva esinina.” (Joh. 11:24) Ongamburiro Marta ndja raisa mombendukiro ya ri otjiṋa otjiwa tjinene, orondu ovahonge vOvajuda tjiva aave pataṋa kutja kaku nokukara ombendukiro nandarire kutja inga ya ri omahongero nga ri mOmbeibela. (Dan. 12:13; Mar. 12:18) Marta aa tjiwa kutja Jesus aa hongo ovandu ohunga nombendukiro nokutja wina wa pendurire ovandu, posi yokutja ovandu mbo kava ri ava ṱu oure womayuva omengi nao tjimuna Lasarus. Marta kaa tjiwa kutja ma ku tjitwa tjike.

20. Kahurura omaheero womambo waJesus nge ri metjangwa raJohanes 11:25-27 nokutja Marta we mu zira vi.

 ²⁰ Okuzambo Jesus wa hungira omambo nge hi nakuyenena okuzembwa nga: “OwAmi ombendukiro nomuinyo.” Otjiperi, Jehovah Mukuru wa yandja ouvara wokupendura ovaṱi mouye auhe moruyaveze kOmuna we. Jesus wa pura Marta epuriro ndi: “Mo kambura momambo nga are?” Nu Marta opa yandjera eziriro ku kwa zikamene ekondwa ndi. Marta wa ri nongamburiro kutja Jesus ongu ri Kristus poo Messias, Omuna waMukuru ngwa kwizikwa i ovaprofete kutja me ya mouye.​—Joh. 5:28, 29; lesa Johanes 11:25-27.

21, 22. (a) Jesus wa raisa vi ondjenda ye kovandu mba ri moruhoze? (b) Serekarera kutja ombendukiro yaLasarus ya tjitwa vi.

²¹ Jehova nOmuna we Jesus Kristus hapo ongamburiro otja indjo ve i vara vi? Oviṋa mbya tjitwa kombunda yanao vi yandja omaziriro omasemba. Marta wa hakahana okukapaha omuangu we. Okuzambo, Marta wa muna kutja Jesus wa ri nomuhihamwatima tjinene ngunda ama hungire kuna Maria novandu varwe mba ri mbo. Eye wa muna omahoze tji maye toto momeho waJesus, okuraisa kutja tjiri u nomuhihamwatima. Eye wa zuva Jesus tji ma raere ovandu kutja ve ise po ewe peyendo romuṱena.​—Joh. 11:28-39.

²² Otjomundu ngu ripura nondunge ombwa aruhe, Marta wa raera Jesus kutja orutu rwaLasarus nai ngahino maru ṋuka orondu wa ṱu oure womayuva yane. Jesus we mu pura atja: “Ami hi ku raerere kutja tji wa kambura, mo munu omasa waNdjambi tji maye riraisa are?” Marta wa kambura na munu omasa waJehova Mukuru. Moruveze ndwo, Jehova wa yandja omasa kOmuna we kutja ma kotore Lasarus komuinyo! Ripura noviṋa mbya ri momeripura waMarta oure womuinyo we, indu tja zuva Jesus ama tja: “Lasarus, penduka u pite!”; tja zuva ombosiro okuza mondimba ndjo indu Lasarus tja penduka na piti a mangwa monguyu; nerakiza raJesus kovandu mba ri mbo rokutja: “Iseye ko indji ombanda yonguyu, nu mu mu ese a yende.” Marta na Maria ngahino va tupuka komuṱena nave mu pukata. (Lesa Johanes 11:40-44.) Marta kari nomuhihamwatima rukwao!

23. Jehova na Jesus ve vanga okukutjitira tjike, nu ove mo hepa okuraisa tjike?

²³ Ehungi ndi ma ri tu raisire kutja ombendukiro yovaṱi karuroto uriri, nungwari omahongero wOmbeibela nge tu huhumiṋa nu oviṋa mbya tjitirwe rukuru. (Job 14:14, 15) Jehova nOmuna we ve nonḓero yokusera ovandu mbe nongamburiro ondaya tjimuna tji va tjita ku Marta, Maria na Lasarus. Jehova nOmuna we wina mave ke ku sera ozondaya otja inḓo tji wa kara nongamburiro yomasa.

24. Ombeibela otjikando otjisenina i tja vi ohunga na Marta?

²⁴ Ombeibela mai hungire ohunga na Marta otjikando tjimwe rukwao. Ya ri otjivike otjisenina tjomuinyo waJesus kombanda yehi. Jesus aa tjiwa kutja otja otjivike tji matji ya komaandero ma kamuna omarorero omanene, okutja eye wa ya ko yomapanga we koBetanie rukwao. Okuzambo eye aa sokukayenda ozokilometa ndatu okuyenda koJerusalem. Jesus na Lasarus va kara neriro poyomurumendu ngwa ri omuremane wena Simon, nu ngunda ave ri mbo opu matu zuvire omambo ohunga na Marta mOmbeibela ngu maye tja: “Marta onguya yandja ovikurya pomariro.”​—Joh. 12:2.

25. Ongwaye ozombongo ndino tji za serwa ondaya okukara novakazendu mbe nongaro yaMarta?

²⁵ Otja tji pe kara aruhe, Marta aa raisa kutja wa ri omukazendu ngu hi natjirweyo! Otjikando otjitenga tji matu lese ohunga na ye mOmbeibela eye tjandje ma ungura, notjisenina tji matu lese ohunga na ye rukwao, aa ungura, ama kondjo okusekirisa ovandu mba ri puna ye. Ozombongo zOvakriste ndino, za serwa ondaya okukara novakazendu mbe ri tjimuna Marta mokati kawo, ovakazendu ovehinatjirweyo, nu ovaharupu, aruhe mbe raisa ongamburiro yawo mu Jehova mokuungura oukukutu okumukarera nokuvatera varwe. Marta tjiri wa kara pokuraisa ongamburiro ye momuano mbwo poo indee? Pe munika nao. Ongamburiro ndjo ye mu vatera okutoṋa momauzeu ngamwa nga ri na wo.

26. Ongamburiro yaMarta ye mu vatera kutja ma tjite vi?

²⁶ Omayuva omaṱiṱi kombunda yanao, Marta aa sokukara nomasa wokukayenda komurungu indu Omuhona we Jesus tja zepewa. Kombanda yanao, ovandu mba zepa Jesus aave vanga okuzepa Lasarus wina, orondu ombendukiro ye ai yanḓiparisa ongamburiro yovengi. (Lesa Johanes 12:9-11.) Otjiperi kutja kombunda, onḓiro ya kahaṋa Marta neṱunḓu re esuverwa. Katu nakutjiwa kutja pa kayenda tjike, posi yokutja matu yenene okukara nongamburiro kutja ongamburiro yomasa Marta ndja ri na yo, ye mu vatera okuṱakama nga komaandero. Indi eepu enanḓengu eṱe ndi matu sokuhorerera kongamburiro yaMarta.