Dɔwɔwɔwo 7:1-60
7 Ke nunɔlagã la biae be: “Nya siawo le emea?”
2 Stefano ɖo eŋu be: “Ŋutsuwo, nɔviwo kple fofowo, miɖo tom. Ŋutikɔkɔe ƒe Mawu la ɖe eɖokui fia mía tɔgbui Abraham esi wònɔ Mesopotamia, hafi wòva ʋu yi Haran,+
3 eye wògblɔ nɛ be: ‘Ʋu le mia denyigba dzi kple wò ƒometɔwo gbɔ ne nàyi anyigba si mafia wò la dzi.’+
4 Ale wòdzo le Kaldeatɔwo ƒe anyigba dzi va nɔ Haran. Eye le fofoa ƒe ku+ megbe la, Mawu na wòʋu va anyigba sia, si dzi miele fifia la dzi.+
5 Gake mena domenyinu aɖekee le edzi o, ao, mena afɔ ɖeka ƒe kekeme teti hãe o; gake edo ŋugbe nɛ be yeatsɔe anɛ wòazu etɔ, eye emegbe yeatsɔe ana eƒe dzidzimeviwo,+ evɔ vi aɖeke menɔ esi ɣemaɣi o.
6 Ke Mawu gblɔ nɛ hã be eƒe dzidzimeviwo ava zu amedzrowo le dzronyigba dzi, eye anyigba ma dzi tɔwo awɔ wo kluviwoe, eye woawɔ fu wo ƒe alafa ene sɔŋ.+
7 Mawu gblɔ be, ‘Madrɔ̃ ʋɔnu dukɔ ma si woanye kluviwo na+ la, eye le nu siawo megbe la, woadzo, eye woasubɔm le teƒe sia.’+
8 “Ebla nu kplii, si ƒe dzesidenue nye aʋatsotso,+ eya ta esi wòdzi Isak+ la, etso aʋa nɛ le ŋkeke enyia gbe.+ Isak dzi Yakob, eye Yakob hã dzi ƒome wuieveawo* tɔgbuiwo.
9 Ke mía tɔgbui siawo ʋã ŋu Yosef,+ wodzrae eye wokplɔe yi Egipte.+ Gake Mawu nɔ kplii,+
10 eye wòɖee tso eƒe xaxawo katã me, eve enu, eye wòna nunyae le Egipte-fia Farao ŋkume. Eye Farao ɖoe dziɖula ɖe Egipte kple eƒe aƒe blibo la katã dzi.+
11 Ke dɔ va to le Egipte bliboa kple Kanaan, xaxa gã aɖe ŋutɔe wònye, eye mía tɔgbuiwo mekpɔ nuɖuɖu aɖeke o.+
12 Ke Yakob se be nuɖuɖu* le Egipte, eye wòdɔ mía tɔgbuiwo ɖa zi gbãtɔ.+
13 Esi woyi zi evelia la, Yosef ɖe eɖokui fia nɔviawo, ale Farao hã va nya Yosef ƒe ƒomea.+
14 Ale Yosef dɔ woyi ɖakplɔ fofoa Yakob kple eƒe ƒometɔwo katã tso afi ma vɛ;+ wo katã wole ame* blaadre vɔ atɔ̃.+
15 Eya ta Yakob ʋu yi Egipte,+ eye afi mae eya+ kple mía tɔgbuiwo ku ɖo.+
16 Eye wokɔ wo yi Sekem hetsɔ wo mlɔ yɔdo si Abraham tsɔ klosalo ƒle le Hamor viwo si le Sekem+ la me.
17 “Esi ɣeyiɣi la gogo be ŋugbe si Mawu do na Abraham nava eme la, dukɔ la dzi hesɔ gbɔ ɖe edzi le Egipte,
18 va se ɖe esime fia bubu aɖe va ɖu Egipte dzi, si menya Yosef o.+
19 Ame sia ɖo tame vɔ̃ ɖe míaƒe ƒome la ŋu, eye wòzi vifofowo dzi madzemadzee be woagblẽ woƒe vidzĩwo ɖi ne woaku.+
20 Ɣemaɣie wodzi Mose, edze ɖeka ŋutɔ le Mawu ŋkume. Eye wona noe* le fofoa ƒe me ɣleti etɔ̃.+
21 Ke esi wogblẽe ɖi+ la, Farao vinyɔnu va kɔe, eye wòna hehee abe eya ŋutɔ via ene.+
22 Ale wofia Egiptetɔwo ƒe nunya blibo la katã Mose. Nyateƒee, ŋusẽ ɖo eŋu le nya kple nuwɔna me.+
23 “Ke esi wòxɔ ƒe blaene la, eva dzi me nɛ be* yeayi aɖakpɔ ye nɔvi Israel-viwo ɖa.+
24 Esi wòkpɔ be wole nu madzɔmadzɔ wɔm ɖe wo dometɔ ɖeka ŋu la, eʋli eta, eye wòbia hlɔ̃ na ame si wole fu wɔmee la hewu Egiptetɔ la.
25 Esusu be ye nɔviwo ase egɔme be Mawu aɖe wo to yeƒe asi dzi, gake womese egɔme nenema o.
26 Le ŋufɔke la, eva do ɖe wo dzi esime wole kɔ dam, eye wòdze agbagba be yeadzra wo dome ɖo be ŋutifafa nava aƒe, eye wògblɔ be: ‘Ŋutsuwo, nɔviwoe mienyee! Nu ka tae miele nu vevi wɔm mia nɔewo?’
27 Ke ame si le nu vevi wɔm nɔvia la tu asii ɖa gblɔ be: ‘Ame kae ɖo wò dziɖula kple ʋɔnudrɔ̃la ɖe mía nu?
28 Ðe nèdi be yeawu nye hã abe ale si nèwu Egiptetɔ la etsɔ enea?’
29 Esi Mose se nya sia la, esi, eye wòzu amedzro le Midian-nyigba dzi, afi si wodzi ŋutsuvi eve nɛ+ le.
30 “Le ƒe blaene megbe la, mawudɔla aɖe ɖe eɖokui fiae le ŋuve si le bibim+ la me le gbedzi le Sinai To la gbɔ.
31 Esi Mose kpɔe la, eƒe nu ku le nu si wòkpɔ la ŋuti. Ke esi wòle tetem ɖe eŋu be yealé ŋku ɖe eŋu nyuie la, ese Yehowa* ƒe gbe be:
32 ‘Nyee nye tɔgbuiwòwo ƒe Mawu, Abraham kple Isak kpakple Yakob ƒe Mawu.’+ Mose dzo nyanyanya, eye meke atse be yeagalé ŋku ɖe eŋu nyuie o.
33 Yehowa* gblɔ nɛ be, ‘Ðe wò afɔkpawo le afɔ, elabena teƒe si nèle tsitre ɖo la, anyigba kɔkɔe wònye.
34 Ɛ̃, mekpɔ ale si wole nye dukɔ tem ɖe anyii le Egipte, mese woƒe ŋeŋe,+ eye meɖi va be maɖe wo. Azɔ va madɔ wò ɖe Egipte.’
35 Mose sia si gbɔ wogbe nu le hegblɔ be: ‘Ame kae ɖo wò dziɖula kple ʋɔnudrɔ̃lae?’+ la, ame sia tututue Mawu dɔ+ to mawudɔla si ɖe eɖokui fiae le ŋuve la me dzi, be wòanye dziɖula kple ɖela.
36 Ŋutsu sia kplɔ wo dzoe;+ ewɔ nukunuwo kple dzesiwo le Egipte,+ le Ƒudzĩ+ la me kple gbea dzi ƒe blaene sɔŋ.+
37 “Mose siae gblɔ na Israel-viwo be: ‘Mawu aɖo nyagblɔɖila aɖe tso mia nɔviwo dome na mi abe nye ene.’+
38 Eyae nye ame si nɔ ha la dome le gbea dzi hekpe ɖe mawudɔla+ si ƒo nu kplii+ le Sinai Toa dzi la ŋu, eye wòƒo nu kple mía tɔgbuiwo hã, eye wòxɔ gbedeasi kɔkɔe siwo me agbe le la be yeatsɔ ana mí.+
39 Mía tɔgbuiwo gbe toɖoɖoe hetu asii ɖa,+ eye le woƒe dzi me la, wotrɔ yi Egipte,+
40 esi wogblɔ na Aron be: ‘Wɔ mawuwo na mí, ne woanɔ ŋgɔ na mí. Elabena míenya nu si dzɔ ɖe Mose sia si kplɔ mí tso Egipte-nyigba dzi la dzi o.’+
41 Ale wowɔ nyivi le ŋkeke mawo me, eye wosa vɔ na legba la, eye wodo dzidzɔ na wo ɖokuiwo le woƒe asinudɔwɔwɔwo ŋu.+
42 Ale Mawu trɔ megbe de wo, eye wòɖe asi le wo ŋu be woasubɔ dziƒonuwo,+ abe ale si woŋlɔe ɖe Nyagblɔɖilawo ƒe agbalẽ la me ene be: ‘Oo, Israel ƒe aƒe, menye nyee miewu lãwo na hesa vɔ na ƒe blaene le gbea dzi o ɖe?
43 Ke boŋ Molok+ ƒe agbadɔ kple mawu Refan ƒe ɣletivi si ŋu mietrɔ ɖo, siwo ƒe nɔnɔme miewɔ hesubɔ lae. Eya ta manya mi aɖo ɖe keke Babilon godo ke.’+
44 “Ðaseɖiɖigbadɔ* la nɔ mía tɔgbuiwo si le gbea dzi; wowɔe ɖe nɔnɔme si tututu Wòtsɔ fia Mose esi wònɔ nu ƒom kplii la nu.+
45 Mía tɔgbui siwo si me wotsɔe dee la kple Yosua hã kɔe ɖe asi yi dukɔ siwo Mawu tu asii ɖa le mía tɔgbuiwo ŋgɔ+ la ƒe anyigba dzi.+ Enɔ afi ma va se ɖe David ŋɔli.
46 Mawu ve enu, eye wòbia be woana mɔnukpɔkpɔ ye yeatu xɔ na Yakob ƒe Mawu la.+
47 Gake Salomo ye tu xɔ nɛ.+
48 Ke Dziƒoʋĩtɔ la menɔa xɔ siwo wotsɔ asi tui la me o,+ abe ale si nyagblɔɖila la gblɔe ene be:
49 ‘Dziƒoe nye nye fiazikpui,+ eye anyigbae nye nye afɔɖodzinu.+ Yehowa* be, xɔ ka ƒomevie miebe yewoatu nam? Alo afi kae anye gbɔɖemeƒe nam?
50 Menye nye asie wɔ nu siawo katã oa?’+
51 “Mi kɔlialiatɔ siwo ƒe dzi kple to tri,* mietsia tsitre ɖe gbɔgbɔ kɔkɔe la ŋu ɣesiaɣi; nu si mia tɔgbuiwo wɔ va yi la ke wɔm miawo hã miele.+
52 Nyagblɔɖilawo dometɔ ka yomee mia tɔgbuiwo meti o?+ Ɛ̃, wowu ame siwo gblɔ ame dzɔdzɔe la ƒe vava ŋu nya ɖi,+ ke azɔ la, miawoe va zu ame siwo fia ame sia yome mɔ hewui,+
53 evɔ miawoe wotsɔ Se la na to mawudɔlawo+ dzi hafi, gake mielé eme ɖe asi o.”
54 Ke esi wose nya siawo la, eku dzi na wo vevie,* eye woɖu aɖukli ɖe eŋu.
55 Ke eya la, esi gbɔgbɔ kɔkɔe yɔe fũu la, ekpɔ dziƒo gãa, eye wòkpɔ Mawu ƒe ŋutikɔkɔe kple Yesu wòle tsitre ɖe Mawu ƒe ɖusime,+
56 eye wògblɔ be: “Kpɔ ɖa! Mekpɔ dziƒo nu ʋu, eye mekpɔ Amegbetɔvi+ la wòle tsitre ɖe Mawu ƒe ɖusime.”+
57 Ale wodo ɣli sesĩe hetsɔ asi xe tome, eye wo katã wolũ ɖe edzi zi ɖeka.
58 Eyome wohee yi dua godo eye wofɔ kpewo nɔ eƒum.+ Ke ɖasefoawo+ ɖe woƒe awudziwuiwo da ɖe ɖekakpui aɖe si woyɔna be Saul ƒe afɔnu.+
59 Esi wonɔ kpe ƒum Stefano la, eɖe kuku be: “Aƒetɔ Yesu, xɔ nye gbɔgbɔ la.”
60 Eye esi wòdze klo la, edo ɣli sesĩe be: “Yehowa,* mègabu nu vɔ̃ sia na wo o.”+ Esi wògblɔ esia vɔ la, edɔ alɔ̃ le ku me.
Etenuŋɔŋlɔ
^ Agate ŋu afia, “Isak wɔ nenema ke na Yakob, eye Yakob hã na ƒome wuieveawo.”
^ Alo, “agblemenukuwo.”
^ Alo, “luʋɔ.”
^ Alo, “wonyii.”
^ Alo, “eɖoe be.”
^ Kpɔ Megbenyawo A5.
^ Kpɔ Megbenyawo A5.
^ Alo, “Avɔgbadɔ.”
^ Kpɔ Megbenyawo A5.
^ Efia, ame siwo meɖe woƒe dzi ƒe boloyiwo ɖa o.
^ Alo, “etɔ wo vevie.”
^ Kpɔ Megbenyawo A5.
