Kaat Kôlôsé 3:1-25
3 Ndi ibale ni bi tuge lôñni Kristô,+ wee kena ni bisu i yéñ mam ma ngii, i homa Kristô a yiine i woo walôm u Nyambe.+
2 Kena ni bisu i bok mahoñol manan i mam ma ngii,+ ha i mam ma ’isi bé.+
3 Inyule ni bi wo, yak niñ nan i sôlne i moo ma Kristô ikété adna lôñni Nyambe.
4 I ngéda Kristô, nu a yé niñ yés,+ a’ nene i mbamba, yak bé ni ga nene i mbamba lôñni nye ikété lipém.+
5 Jon nola ni bijô binan bi nyuu+ bi bi yé hana ’isi inyu mam mana le: malal ma nyega,* nyega, ngôñ malal ibabé gwel nyuu,+ ngôñ ibe, ni hép i i yé i bégés bisat.
6 Inyu mam mana nyen hiun hi Nyambe hi nlôl.
7 Hala nyen bébomede ni bé boñ* i ngéda ni bé niñ hala.*+
8 Ndi nano, ni nlama lep i mam mana momasôna haa ni bé: nyayak, ni hiun, ni béba;+ bisol+ to bipôdôl bi mahindi+ bi pémél bañ mu manyo manan.
9 Ni tembana bañ bé ni bé.+ Ni héya nlômbi mut*+ lôñni bilem gwé,
10 ndi ni haba* mut yondo,+ nu a nyila yondo ni njel bañga yi inoñnaga ni pôna i Nu a bi hek nye,+
11 mu nyen man Grikia a ta bé, to man Lôk Yuda, to likwee, to ngikweeba, to nkén mut, to man Lôk Sitia,* to nkol, to mut nu a ta bé nkol; ndi Kristô nyen a yé mam momasôna ikété bobasôna.+
12 Jon, kiki bôt le Nyambe a mpohol,+ bapubhaga ni bagwéha, ni haba ñem gwéha lôñni ñem ngôô,+ ni loñgeñem, ni suhulnyuu,*+ ni ñemlima+ lôñni wongut.+
13 Kena ni bisu i hônbana bé ni bé, ni nwéhlaga ki bé ni bé ni ñem wonsôna,+ to ibale wada nan a gwé njom i tjelel inyu numpe.+ Nlélém kiki Yéhôva* a bi nwéhél bé ni ñem wé wonsôna, yak bé ni nlama boñ nlélém.+
14 Ndi handugi i mam mana momasôna, ni haba gwéha,+ inyule yon i ñat toi bôt bobasôna i nya i yôni.+
15 Jon, nwaha le nsañ u Kristô u énél miñem minan,*+ inyule inyu nsañ u nyen ni bi séblana le ni ba kiki bijô bi nyuu yada. Ni yi ki ti mayéga.
16 Bañga i Kristô i yônôs miñem minan lôñni pék yosôna. Kena ni bisu i niigana ni i tina makénd* bé ni bé lôñni tjémbi di bibégés,+ bibégés inyu Nyambe, ni tôbôk tjémbi di mbuu ni ñem mayéga,* ni tublak Yéhôva*+ tjémbi ikété miñem minan.
17 To limbe jam ni mboñ, to i bipôdôl, to i minson, boña mam momasôna i jôl li Nwet le Yésu, ni tinak Nyambe Tata mayéga ni njel yé.+
18 A baa, suhlana bébomede isi balôm banan,+ kiki i kôli i Nwet.
19 A balôm, kena ni bisu i gwés baa banan,+ ni bep bañ unbene bo.*+
20 A bon, nôglana bagwal banan ikété mam momasôna,+ inyule hala a nlémél toi Nwet.
21 A basañ, ni hombok* bañ bon banan,+ tiga le ba nimis makénd map.*
22 A minkol, nôglana bet banan+ hana ’isi* ikété mam momasôna, ha ndik bé i ngéda ba mbéñge bé inyu lémél bôt,* ndi ni ñem maliga lôñni woñi u Yéhôva.*
23 To limbe jam ni mboñ, sala jo ni ñem* nan wonsôna wengoñle inyu Yéhôva,*+ ndi ha inyu bôt ba binam bé,
24 inyule ni nyi le n’a kuhul ngababum kiki bom+ yak Yéhôva.* Sala kiki minkol inyu Malét le Kristô.
25 Ibabé pééna, i mut a mboñ béba a’ kôhna nsaa inyu béba a mboñ,+ inyule Nyambe a ntodol bé mut.+
Ndoñi
^ Ni hop Grikia, “pornéia.” Béñge Ndoñi bibuk.
^ Tole “ni bé ke.”
^ Tole “i nlômbi nan niñ.”
^ Tole “ni eñgla nlômbi libak.”
^ Tole “ni eñgep.”
^ “Man Lôk Sitia,” i ngéda kôba, ba bé gwélél bibuk bini inyu yan mut le a gwé bilem bi mut nkoñ.
^ Tole “ñem nsôhga.”
^ Béñge Ndoñi bibuk.
^ Tole “u éga miñem minan.”
^ Tole “ni i béhna.”
^ Tole “ni ñem nlam.”
^ Béñge Ndoñi bibuk.
^ Tole “ni téédana bañ bo lôlha ñem.”
^ Tole “unbaha; nyumbla.”
^ Tole “miñem mi hoi bo.”
^ Ni hop Grikia, “ndi inyu sélél mis bé kiki balémél bôt.”
^ Béñge Ndoñi bibuk.
^ Ni hop Grikia, “bet banan i pes minsôn.”
^ Béñge Ndoñi bibuk (Nèphèsh).
^ Béñge Ndoñi bibuk.
^ Béñge Ndoñi bibuk.