GƏNCLƏRİN SUALLARI
Əgər dostum qəlbimi qırıbsa...
Nələri bilməlisən?
İnsan münasibətləri problemsiz ötüşmür. Qeyri-kamil olduğu üçün yaxşı dost, hətta ən yaxın hesab etdiyin dost belə söz və ya hərəkəti ilə səni yaralaya bilər. Təbii ki, sən də qeyri-kamilsən. Dürüst ol, məgər sən heç vaxt heç kimin qəlbini qırmamısan? (Yaqub 3:2).
İnternet daha asanlıqla inciməyə gətirib çıxara bilər. Məsələn, Deyvid adlı bir yeniyetmə deyir: «Sosial şəbəkədə dostunun hansısa məclisdəki şəklini görürsən. Düşünə bilərsən, mən niyə dəvət olunmamışam?! Sənə elə gələ bilər ki, xəyanətə uğramısan. Ona görə də məyusluğa qapıla bilərsən».
Problemi həll etməyi öyrənə bilərsən.
Nə edə bilərsən?
Özünü yoxla. Müqəddəs Kitabda deyilir: «Küsəyən olma, inciklik axmaqların köksündə yuva salır» (Vaiz 7:9, haşiyə).
«Bəzən bir müddətdən sonra anlayırsan ki, səni dilxor edən məsələ elə də ciddi məsələ deyilmiş» (Alisa).
Fikirləş: Tez inciyənsən? Bəs başqalarının qeyri-kamilliyinə qarşı daha tolerant olmağı öyrənə bilərsən? (Vaiz 7:21, 22).
Bağışlamağın faydaları üzərində düşün. Müqəddəs Kitabda deyilir: «Günahın üstündən keçmək insanın yaraşığıdır» (Məsəllər 19:11).
«Şikayətlənməyə səbəbin olsa belə, yaxşı olar ki, birdəfəlik bağışlayasan. Yəni həmin məsələni dönə-dönə insanın başına qaxınc etməyəsən və hər dəfə onun səndən üzr istəməsinə gətirib çıxarmayasan. Bağışladınsa, bir də o məsələyə qayıtma» (Malori).
Fikirləş: Vəziyyət, doğrudan da, ciddidir? Sülh naminə bağışlamaq olar? (Koloslulara 3:13).
Başqalarını nəzərə al. Müqəddəs Kitabda deyilir: «Təkcə özünüzü fikirləşməyin, başqalarını da fikirləşin» (Filippililərə 2:4).
«Dostlar arasında sevgi və hörmət olanda, problemləri dərhal həll etməyə əsaslı səbəb olur, çünki bu dostluq münasibəti üçün çox zəhmət çəkmisən və onu itirmək istəmirsən» (Nikol).
Fikirləş: Qarşı tərəfi haqlı çıxaracaq hər hansı bir səbəb tapa bilərsən? (Filippililərə 2:3).
Yadda saxla. İnciklik hissini dəf etmək yetkin yaşlarında sənə böyük xeyri dəyəcək bir bacarıqdır. Niyə də bu bacarığa indidən yiyələnməyəsən?!