UYehova wawunika abantu umhlaba. Ulikhaya lethu. Ngoko ke, isibini sokuqala esingabantu, uAdam noEva, abazange badalelwe ukuzalisa amazulu—uThixo wayesele edale iingelosi eziza kuphila emazulwini. (Yobhi 38:4, 7) Kunoko, uThixo wabeka umntu wokuqala kwiparadesi entle eyayibizwa ngokuba ngumyezo wase-Eden. (Genesis 2:15-17) UYehova wamnika ithemba lokuphila ngonaphakade emhlabeni kunye nenzala yakhe.​—Funda iNdumiso 37:29; 115:16.

Ekuqaleni, yayingumyezo wase-Eden kuphela oyiparadesi. Isibini sokuqala esingabantu kwakufuneka sizalise umhlaba ngenzala yaso. Ekuhambeni kwexesha, sasiza kuzalisa wonke umhlaba siwenze iparadesi. (Genesis 1:28) Umhlaba awusoze utshatyalaliswe. Uya kuhlala ulikhaya loluntu.​—Funda iNdumiso 104:5.

Bukela ividiyo ethi Kwakutheni Ukuze UThixo Adale Umhlaba?

UAdam noEva abazange bamthobele uThixo, ngoko wabagxotha emyezweni. Iparadesi yalahleka, yaye akuzange kubekho mntu wakwaziyo ukuyibuyisela. IBhayibhile ithi: “Umhlaba unikelwe esandleni songendawo.”​—Yobhi 9:24.​—Funda iGenesis 3:23, 24.

Ngaba uYehova wayiyeka injongo awayenayo ngoluntu? Akunjalo! Ungusomandla. Akanakuze angaphumeleli. (Isaya 45:18) Uya kubuyisela uluntu kwimeko awayefuna lube kuyo.​—Funda iNdumiso 37:11, 34.

IParadesi iya kubuyiselwa emhlabeni xa uYesu elawula njengoKumkani kaThixo. Kwidabi elibizwa ngokuba yiArmagedon, uYesu uya kukhokela iingelosi zikaThixo ekutshabalaliseni  bonke abangamfuniyo uThixo. Emva koko uya kuvalela uSathana kangangeminyaka eli-1 000. Abantu bakaThixo baya kusinda kuba uYesu uya kubakhokela aze abakhusele. Baya kunandipha ubomi obungunaphakade kwiParadesi emhlabeni.—Funda iSityhilelo 20:1-3; 21:3, 4.

UThixo uya kubuphelisa nini ubungendawo emhlabeni? UYesu wanika “umqondiso” obonisa ukusondela kwesiphelo. Iimeko zehlabathi namhlanje zisongela ubukho bomntu yaye zibonisa ukuba ngoku siphila kwixesha ‘lokupheliswa kwale nkqubo yezinto.’​—Funda uMateyu 24:3, 7-14, 21, 22.

Xa uYesu elawula umhlaba esezulwini kangangeminyaka eli-1 000, uya kukuphelisa konke ukubandezeleka. (Isaya 9:6, 7; 11:9) Ngaphandle kokuba nguKumkani, uYesu uya kuba nguMbingeleli Omkhulu aze aphelise izono zabo bathanda uThixo. Ngoko ke, esebenzisa uYesu, uThixo uya kuphelisa ukugula, ukwaluphala nokufa.​—Funda uIsaya 25:8; 33:24.

Abantu abamthobelayo uThixo baya kuphila eParadesi. (1 Yohane 2:17) UYesu wathumela abalandeli bakhe ukuba baye kukhangela abantu abalulamileyo baze babafundise indlela yokwamkeleka kuThixo. Namhlanje, uYehova ulungiselela izigidi zabantu ukuze zifumane ubomi kwiParadesi ezayo emhlabeni. (Zefaniya 2:3) KwiiHolo zoBukumkani zamaNgqina kaYehova, abantu bafunda ukuba ngabayeni nootata, abafazi noomama ababhetele. Abantwana nabazali banqula kunye baze bafunde indlela yokungenelwa kwiindaba ezilungileyo.​—Funda uMika 4:1-4.