Mga Proberbios 15:1-33
15 An malumo* nga baton nakakapawara hin kapungot,+Pero an mapintas* nga pulong nakakaaghat hin kasina.+
2 An dila han mga maaramon nagamit han kahibaro ha maopay nga paagi,+Pero an baba han mga lurong nagpapasamwak hin kalurongan.
3 An mga mata ni Jehova aada ha ngatanan nga dapit,Nagkikinita ha magraot ngan ha mag-opay.+
4 An kalmado nga dila* usa nga kahoy han kinabuhi,+Pero an baliko nga panyakan nakakahulop.*
5 An usa nga lurong diri narespeto ha disiplina han iya tatay,+Pero an maaramon nga tawo nakarawat hin pagtadong.*+
6 Ha balay han matadong nga tawo may-ada damu nga bahandi,Pero an ani* han maraot nga tawo naghahatag ha iya hin problema.+
7 An mga im-im han mga maaramon nagpapasarang hin kahibaro,+Pero diri sugad hito an kasingkasing han lurong nga tawo.+
8 An halad han magraot mangil-ad kan Jehova,+Pero an pag-ampo han magtadong nakakapalipay ha Iya.+
9 Mangil-ad kan Jehova an dalan han maraot nga tawo,+Pero nahigugma hiya ha tawo nga nangangalimbasog nga magin matadong.+
10 An disiplina baga hin maraot* para ha tawo nga nabaya ha dalan,+Pero an bisan hin-o nga nangangalas ha pagsaway mamamatay.+
11 An Lubnganan* ngan an lugar han kabungkagan* nakikita gud ni Jehova.+
Labi na gud an mga kasingkasing han mga tawo!+
12 An paratamay diri nahigugma ha tawo nga nagtatadong* ha iya.+
Diri hiya mapakadto ha mga maaramon.+
13 An malipayon nga kasingkasing nakakapaopay ha pamahongpahong,Pero an kasakit ha kasingkasing nagdudugmok han espiritu.+
14 An masinabuton nga kasingkasing namimiling hin kahibaro,+Pero an baba han mga lurong nakaon hin* kalurongan.+
15 Maraot an ngatanan nga adlaw han tawo nga nasasakit,+Pero an tawo nga may malipayon* nga kasingkasing nagpapadayon ha pagpiyesta.+
16 Mas maopay na la an gutiay pero may kahadlok kan Jehova+Kay han damu nga bahandi pero may kabaraka.*+
17 Mas maopay na la an pagkaon hin utan pero may gugma+Kay ha pagkaon hin baka nga pinatambok* pero may kangalas.+
18 An tawo nga mapaso an ulo nag-aaghat hin samok,+Pero an tawo nga diri madagmit masina nagpapakalma hin araway.+
19 An dalan han hubya nga tawo pariho hin alad nga tunukon,+Pero an aragian han magtadong pariho hin patag nga kalsada.+
20 An maaramon nga anak nakakapalipay ha iya tatay,+Pero an lurong nga tawo nagtatamay ha iya nanay.+
21 An kalurongan kalipay han tawo nga waray maopay nga panhunahuna,*+Pero an tawo nga may husto nga pagturotimbang nalakat hin diretso ha unhan.+
22 An mga plano napapakyas kon waray pagkonsultahay,*Pero may kalamposan ha damu nga magsaragdon.+
23 An usa nga tawo nalilipay ha paghatag han husto nga baton,*+Ngan an pulong nga ginyakan ha husto nga panahon—kaopay gud hito!+
24 Para ha tawo nga may hilarom nga pagsabot an dalan han kinabuhi tipakadto ha igbaw,+Basi ipahirayo hiya tikang ha Lubnganan* ha ubos.+
25 Rurub-on ni Jehova an balay han mga mapahitas-on,+Pero iya babantayan an giutan han balo nga babaye.+
26 Mangil-ad kan Jehova an mga plano han maraot nga tawo,+Pero putli para ha Iya an makalilipay nga mga pulong.+
27 An tawo nga nakakabentaha ha diri tangkod nga paagi naghahatag hin problema* ha iya kalugaringon nga panimalay,+Pero an tawo nga nangangalas ha mga hukip padayon nga mabubuhi.+
28 An kasingkasing han matadong nga tawo namamalandong antes bumaton,*+Pero an baba han magraot tigda nga nagyayakan hin magraot nga mga butang.
29 Hi Jehova hirayo ha magraot,Pero ginpapamatian niya an pag-ampo han magtadong.+
30 An mahayag nga mga mata* nagpapalipay han kasingkasing;An maopay nga sumat nagpapakusog han mga tul-an.*+
31 An tawo nga namamati ha naghahatag hin kinabuhi nga pagsawayNaukoy kaupod han mga maaramon.+
32 An bisan hin-o nga diri nakarawat hin disiplina nagtatamay ha iya kinabuhi,*+Pero an bisan hin-o nga namamati ha pagsaway nagkakaada pagsabot.*+
33 An kahadlok kan Jehova usa nga pagbansay nga nagtututdo hin kinaadman,+Ngan antes han kadungganan aada an pagkamapainubsanon.+
Mga footnote
^ O “nakakasakit.”
^ O “buotan.”
^ O “An dila nga nakakatambal.”
^ Lit., “nakakadugmok han espiritu.”
^ O “pagsaway.”
^ O “kità.”
^ O “mabug-at.”
^ O “ngan an Abadon.”
^ O “nagsasaway.”
^ O “nagpapadayon ha.”
^ O “maopay.”
^ O “kasamok.”
^ Lit., “nga ginpakaon ha tubongan.”
^ O “waray maopay nga pagturotimbang an kasingkasing.”
^ O “pribado nga pag-iristorya.”
^ Lit., “ha baton han iya baba.”
^ O “kaarawdan.”
^ O “naghuhunahuna hin maopay kon paonan-o mabaton; naghuhunahuna antes magyakan.”
^ O “An malipayon nga siplat.”
^ Lit., “nagpapatambok ha mga tul-an.”
^ O “kalag.”
^ Lit., “kasingkasing.”
