Matto 20:1-34
20 Osmon Shohligi, tong saharda uzumzoriga mardikorlarni yollagani chiqqan bog‘ egasiga o‘xshaydi+.
2 Kuniga bir dinordan* kelishgandan so‘ng, u mardikorlarni uzumzoriga jo‘natibdi.
3 Ertalab soat to‘qqizlarda* uzumzor egasi yana chiqib, bozor maydonida ishsiz turgan kishilarni ko‘ribdi-da,
4 ularga: “Sizlar ham uzumzorimga boringlar, haqlaringizni to‘layman”,— deb aytibdi.
5 Shunda ular ham ketishibdi. Uzumzor egasi kunduzi soat o‘n ikki va tag‘in uchlarda* chiqib, yana shunday yo‘l tutibdi.
6 Nihoyat u soat beshlarda* chiqibdi-da, o‘sha joyda turgan boshqalarni ko‘rib: “Nega kun bo‘yi bu yerda ishsiz turibsizlar?” — deb so‘rabdi.
7 Javoban ular: “Bizni hech kim ishga yollamadi”,— deyishibdi. Shunda u: “Sizlar ham uzumzorimga boringlar”,— deb aytibdi.
8 Kech kirganda, uzumzor egasi boshqaruvchisiga shunday debdi: “Mardikorlarni chaqirib, oxirgisidan boshlab birinchisigacha haqlarini to‘la”+.
9 Soat beshlarda* ish boshlaganlar kelib, har biri bir dinordan olishibdi.
10 Shu sababli birinchi yollanganlar ko‘proq haq olamiz deb o‘ylashibdi. Ammo ularga ham bir dinordan* to‘lanibdi.
11 Haqlarini olgach, ular uzumzor egasiga nolib:
12 “Oxirgi kelganlar atigi bir soat ishlashdi. Siz esa ularni jaziramada kun bo‘yi og‘ir mehnat qilgan bizlar bilan teng ko‘rdingiz!” — deyishibdi.
13 Uzumzor egasi javoban ulardan biriga shunday debdi: “Do‘stim, men sizga nohaqlik qilganim yo‘q. Axir siz bilan bir dinorga kelishmaganmidik?+
14 Haqingizni oling-da, ketavering. Sizga qancha bergan bo‘lsam, oxirgi kelganlarga ham shuncha bermoqchiman.
15 O‘z pullarimdan xohlaganimcha foydalanishga haqqim yo‘qmi? Yoki saxiyligimni ko‘rolmayapsizmi?”+
16 Shunday qilib, oxirgilar birinchi, birinchilar esa oxirgi bo‘ladi»+.
17 Quddusga ketishayotganda, Iso 12 ta shogirdini alohida chaqirib, dedi+:
18 «Mana, biz Quddusga boryapmiz. U yerda Inson O‘g‘lini bosh ruhoniylar va ulamolar qo‘liga tutib berishadi. Ular bo‘lsa uni o‘limga mahkum etib+,
19 o‘zga xalqlarning qo‘liga topshirishadi. Ular uni masxara qilishadi, qamchilashadi va ustunga mixlashadi+. Lekin u uchinchi kuni tiriladi»+.
20 Bundan so‘ng, Zabadiyning+ xotini ikkita o‘g‘li bilan Isoning yoniga keldi-da, ta’zim qilib, nimalarnidir so‘ramoqchi bo‘ldi+.
21 Iso bo‘lsa: «Mendan nima istaysiz?» — deya so‘radi. Ayol javoban: «Shohligingizda bu ikki o‘g‘limdan birini o‘ng tomoningizga, ikkinchisini chap tomoningizga o‘tqazishga so‘z bering»+,— dedi.
22 Iso uning o‘g‘illariga: «Sizlar nima so‘rayotganingizni bilmaysizlar. Men ichadigan kosadan* icha olasizlarmi?»+ — deb so‘radi. Ular: «Icha olamiz»,— deyishdi.
23 Shunda Iso: «Men ichadigan kosadan ichasizlarku-ya+, ammo o‘ng yoki chap tomonimda kim o‘tirishini men hal qilmayman. Bu o‘rinlarni Otam kim uchun tayyorlab qo‘ygan bo‘lsa, o‘sha o‘tiradi»+,— deb aytdi.
24 Qolgan o‘nta shogird buni eshitib, ikki aka-ukadan achchiqlana boshlashdi+.
25 Biroq Iso ularni yoniga chaqirib, shunday dedi: «Hukmdorlar xalqlar ustidan boshqarishini va buyuk odamlar xalqlarga hokimlik qilishini bilasizlar+.
26 Ammo sizlarning orangizda bunday bo‘lmasin+. Orangizda kim buyuk bo‘lishni istasa, sizlarga xizmatkor bo‘lsin+.
27 Orangizda kim birinchi bo‘lishni xohlasa, sizlarga qul bo‘lsin+.
28 Chunki Inson O‘g‘li ham o‘ziga xizmat qildirishga emas, aksincha, xizmat qilgani+ va ko‘plar uchun jonini* to‘lov sifatida bergani kelgan»+.
29 Ular Yerixodan chiqayotganlarida, orqalaridan katta olomon ergashib borardi.
30 Yo‘l bo‘yida o‘tirgan ko‘zi ojiz ikki kishi Isoning o‘tib ketayotganini eshitib: «Hazrat, Dovudning O‘g‘li, bizga rahm-shafqat qiling!» — deb qichqirdi+.
31 Olomon ularga jim bo‘lishni buyursa-da, ular yanada baland ovozda: «Hazrat, Dovudning O‘g‘li, bizga rahm-shafqat qiling!» — deya baqirishardi.
32 Shunda Iso to‘xtab, ularni chaqirdi-da: «Mendan nima istaysizlar?» — deb so‘radi.
33 Ular: «Hazrat, iltimos, ko‘zlarimiz ochilsin»,— deyishdi.
34 Isoning rahmi kelib, ularning ko‘zlariga qo‘lini tekkizgan edi+, shu ondayoq ikkovi ham ko‘ra boshlab, uning orqasidan ergashdi.
Izohlar
^ So‘zma-so‘z «uchinchi soatda». Quyosh chiqishidan hisoblaganda.
^ So‘zma-so‘z «oltinchi va to‘qqizinchi soatda».
^ So‘zma-so‘z «o‘n birinchi soatda».
^ So‘zma-so‘z «o‘n birinchi soatda».
^ «Kosa» so‘zi ramziy ma’noda Iso, Xudoning irodasi bilan soxta guvohlarning haqoratiga qolib, o‘lishini bildiradi.
^ Yoki «hayotini».
